Ni Ahnsou Aramas akan Sohte Kin Mihmi ni Imwarail kan
1. Soangen kahpwal dahieu kitail kin lelong ahnsou me kitail kin kalohk ihmw lel ihmw?
1 Nan wasa tohto, kin wia apwapwalla en diar aramas nan imwarail kan. Nan ahnsou pwukat en “ahnsou apwal ekei,”me tohto kin anahneier en doadoahk awa tohto kan pwehn kak apwalih arail mour. (2 Timoty 3:1) Ekei mwein kin kohsang imwarail kan en kohla netnetseli de rapahki soangen mehn kamweit teikan. Iaduwen kitail kak tuhwong irail pwukat ki rongamwahuo?
2. Iaduwen kitail kak ese ni mehlel, ma ihmw me sohte towe ko pahn mie me pahn apwalihala?
2 Kolokol Rekord Mwahu: Keieun kahk iei en ntingihdi irail kan me sohte kin mihmi ni imwarail kan. Met kin keieu kesempwal ma ke kin kalapw kalohk nan ahmw wasahn kalohk. Ke kin ntingihdi eden wasahn kousoan, nempe en wasahn kalohk, edomw oh rahno? Nan tehn doaropweohte, ke kak mweidohng ekis wasa en kapataiong mehn kataman kan ahnsou me kowe oh emen sounkalohk pahn pwurala kalohk ni ihmw oko me sohte towe kan. Ni kaimwisekpen ahnsou en kalohk, tamataman en kihong rekord kan me ke ntingihdi irail kan me ahneki wasahn kalohko, ihte ma e pwungki ken apwalihala ihmw me sohte towe kan. Doadoahngki ehu tehn doaropwe tohrohr pwehn kilelehdi wasa kan me perenki rong pwe ke pahn pwurala rehrail.
3. Ia ekei kaweid kan ong tuhwong irail me sohte mihmi ni imwarail kan?
3 Song Kohla Ehu Ahnsou Tohrohr: Ele ekei me sohte kin mihmi ni imwarail kan ni rahn en doadoahk kan mwein kin mihmi mwo ni soutik kan de ni imwi wihk kan. Ke kak koasoanehdi ahmw ahnsou en pwurala ahnsou me pahn mwahu? (1 Korint 10:24) Ma soh, ele ke kak kihong rekord en ihmw sohte towe kan ong emen sounkalohk me pahn kak pwurala ehu ahnsou tohrohr. Ke pil kak ntingla rehn irail kan me sohte mihmi ni imwarail de song en tuhwong irail ki telephone. Irail sounkalohk kan me kin ahneki kahpwal en paliwar me kahrehong irail sohla kak kalohk ihmw lel ihmw pahn perenki sewesehkin uhk duwen met.
4. Karasaras dah me pid kesempwalpen pwurehng pwurala ni ihmw akan me sohte towe?
4 Ehu irair karasahda kesempwalpen nantiong tuhwong irail kan me sohte mihmi ni imwarail kan. Mwurin sounkalohk kan kin pwurepwurehng kalohkla ni ehu ihmw erein sounpar siluh, irail eri tuhwongada tohnihmwo. Re diarada me liho kin awiawih en pwurehng tepida onop en Paipel duwen me e kin wia mahs mwohn e kohdo oh kousoanla wasao.
5. Ahnsou dah me wasahn kalohk kan kin kasalehda me e nekier?
5 Kanekehla Wasahn Kalohk: Iahd ehu wasahn kalohk pahn nekier douluhl? Ni oaralap, met iei ahnsou me wiepe konehng koaros wiawier pwehn kak tuhwong aramas akan nan arail wasahn kousoan. Ele konehng en pwilikihdi ehu tract de ehu makasihn me ekis wereila ong ihmw me sohte towe ni wasa ehu me sohte pahn sansal ong meteikan, ahpw mehlel ong wasahn kalohk kan me kalohk kin sohte kalapw wiawi. Wasahn kalohk anahne en kaneknekla nanpwungen sounpwong pahieu. Mwurin mwo, anahne en kapwurehla doaropwehn wasahn kalohk kan pwe brother men me kin apwahpwalih wasahn kalohk kan en kileledi nan rekord.
6. Dahme kahrehda kitail anahne song en tuhwong aramas koaros nan atail wasahn kalohk ki rongamwahu?
6 Kitail men aramas tohto en kak alehdi ahnsou mwahu en esehla likweriong mwaren Siohwa pwe re en kak komourala. (Rom 10:13, 14) Met pil pid irail me sohte mihmi nan imwarail kan ahnsou me kitail kin wia doadoahk en kalohk ihmw lel ihmw. Duwehte wahnpoaron Pohl, kitail en wiahki atail ineng “en uhdahn kalohkiseli Rongamwahu duwen kalahngan en Koht.”—Wiewia 20:24, NW.