Doadoahk Tohrohr Pahn Wiawi October 16–November 12!
1 “Imwin Sarawi Likamw Kerendohr!” Met iei oaralap en Kingdom News Nempe 37, me pahn kohpeseng wasa koaros nan sampah tepida sounpwong kohkohdo. Tepin wihk riau en October, kitail pahn kihla Kahn Iroir oh Awake! makisihn kan. Tepida Ni Ehd, October 16 lel Rahn Sarawi, November 12, kitail pahn wia doadoahk en kihseli Kingdom News Nempe 37. Ni Rahn Kaunop kan oh Rahn Sarawi kan, kitail pahn kihla met iangahki neitail makisihn kapw kan.
2 Ihs Me Kak Iang Kisehn Doadoahk Wet: Irail koaros me kin kaukaule iang kalohki Rongamwahu kak wia uwen me irail kak koaros nan doadoahk wet. Ekei sounkalohk kak iang auxiliary pioneer. Mie noumw seri kan de ahmw Paipel Study kan me kin kekeirada ni pali ngehn? Kangoange irail en kak tuhwong elder kan oh kilang ma irail sou kak iang wia sounkalohk kan me saikinte papidais. Elder kan anahne tiengla mwowe oh koasoiong irail sounkalohk kan me sohlahr kin iang kalohk pwehn kangoange irail en iang kalohk, ele mwein ni arail pahn koasoanehdi irail en iang sounkalohk koahiek kan kalohk.
3 Tohto Kingdom News Nempe 37 me pekederlahngehr ni mwomwohdiso koaros pwe sounkalohk kan oh pioneer kan kak ale neirail sohte malaulausang meh 50. Irail kan me saikinte wiahla sounkalohk kak ale meh limau pwehn kihong ahr peneinei oh kompoakparail kan. Koaros anahne tehk meh depe me irail kihla oh ntingihdi met ni tihnsouwen neirail ripoht en kalohk kan ni imwin sounpwong en October oh November. Secretary en mwomwohdiso pahn uhd kapatapene uwen me mwomwohdiso kihla oh pakairki ong Branch Ohpis ni imwin sounpwong ko. Kingdom News koaros me luwehdi mwurin doadoahk tohrohr wet kak doadoahk ni elen kalohk soh lipilipil kan.
4 Dahme Ke Pahn Nda: Wia ahmw koasoi en mwotomwot pwe ke en kak tuhwong aramas tohto. Ke kak nda: “I kin iang wia doadoahk kesempwal ehu me wiawi wasa koaros nan sampah oh se kihseli rohng kesempwal wet. Ke kak naineki met, sohte pweine. Menlau wadek.” E pahn mwahu ma ke sohte wa ahmw ehd en kalohk kohla ni ihmw akan. Ntingihdi eden irail akan me perenki rong.
5 Iaduwen Ahmw Pahn Tuhwong Aramas Koaros nan Ahmw Wasahn Kalohk: Kaidehn ihte ke en kihla Kingdom News ni ahmw pahn kalohk nanial ahpw konehng ken pil nantihong kohla ihmw lel ihmw oh pil wasahn pisnis kan. Ntingihdi ihmw akan me sohte towe, oh nantihong pwurala ehu rahn tohrohr de pil nan wihkohte. Tepida Ni Ehd, November 6, ke kakehr kihdi Kingdom News ni ihmw akan me sohte towe. Ahpw, ma en mwomwohdiso wasahn kalohk me inenen laud oh tohnmwomwohdiso sohte kak lella wasa koaros, elder kan kak koasoanehdi me Kingdom News en kohdi ni ihmw akan me sohte towe erein ahnsou me doadoahk tohrohr pahn wiawi.
6 Kasohrlahn “Papilon Lapalap” kerendohr. Aramas akan anahne pedoisang loale mwohn eh pahn sohrala. (Kaudiahl 14:8; 18:8) Wiahda ahmw koasoandi met ken iang kalohk ni ahnsoun doadoahk tohrohr wet pahn wiawi oh ehukihong aramas koaros me imwin kaudok likamw kerendohr!