Doadoahk Tohrohr en Kihla Tract nan October 20–November 16!
1 Kitail pahn tapihada doadoahk tohrohr en kihla tract kapw me oaralap koasoia Ke Sou Men Esehla Duwen Padahk Mehlel? Doadoahk wet pahn tepiada Ni ehd, October 20 oh pahn wiawihki wihk pahieu. Kasikpe me doadoahk tohrohr wet pahn kamwakid aramas en men esehla padahk mehlel.—Sohn 17:17.
2 Tract wet kihda pasapeng pwung sang Paipel ong peidek weneu kesempwal pwukat: “Ia duwe, Koht kin ketin uhdahn nsenohkin kitail?” “Mahwen oh kahpwal akan pahn kak imwisekla?” “Dahme kin wiawihong kitail ni ahnsou me kitail kin mehla?” “E kin mie koapworopwor ong me melahr akan?” “Iaduwen ei pahn kapakap pwe Koht en kak karonge ie?” oh “Iaduwen ei pahn kak diarada nsenamwahu nan ei mour?” Pelien lamalam kan me kose me irail Kristian kan sohte kin kihla pasapeng pwung ong peidek pwukat. Tohto irail kan me sohte kin kose me irail Kristian kin pwonopwonki duwen ire pwukat, ahpw re sohte ese me pasapeng kan kak dierek nan Paipel. Ihme kahrehda kitail kasikasik aramas tohto pahn perenki wadek audepen tract wet.
3 Tuhwong Aramas Koaros nan Ahmw Wasahn Kalohk: Nantihong kanekehla ahmw wasahn kalohk uwen me kak. Ma ahn mwomwohdiso wasahn kalohk inenen laud, elder kan kak koasoanehdi kumwail en kihla tract pwukat ni ihmw akan me sohte towe. Taman en kihong tract pwukat ong mehn mpomw, tohn ahmw peneinei, iangomw tohndoadoahk oh sukuhl oh irail me ke kin koasoiong. Mwein ke kak wia pilahn en iang auxiliary pioneer nan sounpwong en October de November. Mie noumw seri kan de me ke kin wia onop en Paipel me kin kekeirda arail nanpwungmwahu rehn Koht me kak iang doadoahk tohrohr wet nin duwen sounkalohk saikinte papidais? Ma ei, kehsehkin elder kan.
4 Dahme Ke Pahn Koasoia: Pwehn tuhwong aramas tohto e pahn mwahu en wia koasoi mwotomwot. Ke kak idekte ehu peidek sang peidek weneu me mi pohn tract oh kasalehiong irail pasapeng me mi nan tracto. Met pahn mweidohng sounkalohk kan en wekid arail padahk me konehng wasahn kalohko. Ma emen kasalehda perenki rong, kilelehdi met oh pwurehng pwurala reh. Ni Rahn Kaunop kan oh Rahn Sarawi kan kitail kak kihla tract wet iangahki makasihn kapw kan. Mwurin doadoahk tohrohr wet pahn nek ni November 16, kitail pahn kihla pwuhken Mour Kohkohlahte. Luhwen tract pwukat pahn kak kihla duwehte tract teikan.
5 Tapihada Onop en Paipel: Tract wet wiawihda pwehn sewese kitail en tapihada onop en Paipel. Ni ahnsou me ke pwurehng pwurala rehn emen me kasalehda perenki rong, ke kak idek reh mehnia padahk kan nan Paipel me e perenki. Kasalehiong ih apali tract wet me kasalehda koasoandi en onop Paipel oh kihong ih pwuhken Kupwurki. Ma ke kak, koasoiapene parakrap ehu de riau me koasoia ire kan me e pilada.
6 Siohwa ketin kupwurki irail akan me pahn kaudokiong ih ni mehlel. (Sohn 4:23) Kitail koaros en ehukihpene doadoahk tohrohr wet pwehn sewese meteikan en esehla me mehlel!