Doadoahngki Ahnsou Koaros
1. Doaropwehn Esehla Padahk Mehlel kin mwahu ong dah?
1 Doaropwehn Ke Sou Men Esehla Duwen Padahk Mehlel? wiawihda pwehn sewese kitail tapiada onop en Paipel kan. Ahpw e pil wia mehn doadoahk mwahu ehu me kitail kak doadoahngki pwehn kamwerehdi weren padahk mehlel. (Ekl. 11:6) Iet ekei ire kan me kak sewese kitail en doadoahngki mwahu doaropwe wet.
2. Ia duwen atail kak doadoahngki doaropwe wet en tapiada koasoi?
2 Pwehn Tapiada Koasoi: Ke kak kihong tohnihmwo doaropweo oh kasalehda peidek weneu me mi ni kilio oh idek: “Mehnia rehn peidek pwukat me mie pak ke kin medewe duwe?” Mwurin tohnihmwo sapeng, tehk dahme Paipel sapengki eh peideko nan doaropweo oh wadek ehu iren Paipel me kileldi loale. Wadek de oaralapihada mwurin doaropweo oh kihong ih pwuhken Paipel Padahngki. Mehnda ma e sohte ale pwuhko, e alehier doaropweo me kak kahrehiong padahk mehlel en kamwakid eh mohngiong.—Mad. 13:23.
3. Dahme kitail kak wia ma tohnihmwo kedirepw?
3 Ma Tohnihmwo Kedirepw: Ke kak nda: “Pwehki ahnsou wet kaidehn ahnsou mwahu ehu, I pahn kihong uhk doaropwe wet. Mie peidek weneu me pali laud en kitail kin idek oh e kihda pasapengpen ehuehu peidek pwukat sang nan Paipel. Ni ei pahn pwurehng tuhwong uhk, menlau padahkihong ie omw madamadau.”
4. Dahme kitail kak nda ni atail kihla doaropweo nanial?
4 Ni Atail Kalohk Nanial: Ke kak nda: “Kaselehlie. Mie pak ke kin medewe duwen ehu rehn peidek pwukat? [Rong pasapeng.] Doaropwe wet kin kasalehda pasapeng kan me dierek nan Paipel.” Ma aramaso sohte karuwaru, ke kak koasoia ehu pasapeng nan doaropweo oh kihong ih pwuhken Paipel Padahngki.
5. Ekei pak, ia duwen atail kak doadoahngki doaropwe wet ni ihmw akan me sohte towe?
5 Sohte Tohnihmw: Nan ekei wasahn kalohk kan, sounkalohk kan kin kalapw kihdi doaropwe ni ihmw me sohte towe. Ma ihme omw mwomwohdiso kin wia, ke sou kihdi doaropwehn Esehla Padahk Mehlel ekei pak? Ni omw pahn pwurala, ke kak nda: “Se kohdo me rahn teio. Ke sohte mie kahrehda se pwilikihdi doaropwe wet. Mehnia rehn peidek pwukat me ke men en pasapengla?”
6. Dahme kahrehda doaropwehn Esehla Padahk Mehlel kin wia mehn doadoahk mwahu ehu?
6 Doaropwehn Esehla Padahk Mehlel kin kasalehda padahk mehlel ni mengei oh inen. E kin kamwakid aramas me kohsang pelien lamalam oh tiahk koaros. E mengei en doadoahngki. Pil irail me pwulopwul kan oh sounkalohk kapw kan kak kihla. Ke kin doadoahngki doaropwe wet ahnsou koaros me ke kak?