Kitail Naineki Mehn Doadoahk Kapw Ong Tepida Onop en Paipel Rehn Aramas akan!
1 Emen lihen Amerika kin poadidiong ah sarawi en Roman Catholic. E kin kalapw kasalehda me e kin uhdahn kamehlele padahk kan me ah sarawi kin padahkih. E pil kohla ni ihmw sarawi laud en Kadolik me adaneki “Vatican” pwehn wia ah kaudok wasao. Ahpw, ahnsou me emen Sounkadehdehn Siohwa kohla reh ni imweo, e pwungki en onop Paipel rehn sistero. Dahme kahrehda? Pwehki e men sukuhliki dahme Paipel mahsanih oh ah sarawi sohte kin wia koasoandi en onop Paipel rehn aramas akan. Dahme ekspiriens wet kin padahkiong kitail? Kitail sukuhliki me kitail sehse ihs me kak pwungki en onop Paipel rehtail.—Eklesiasdes 11:6.
2 Mie pak me ke pweiek en padahkiong aramas akan me kitail kin onop Paipel rehn aramas akan—sohte lipilipil ihs ih—ma e kin perenki rong? Aramas koaros nan ahmw wasahn kousoan kin wehwehki me kitail kin kak onop rehn aramas akan ni soh isepe? Iaduwen kitail kak tehk ma aramas akan wehwehki de soh? Ni atail pahn doadoahngki mehn doadoahk kapw! Mehn doadoahk wet iei kisin doaropwe me oaralap koasoia Ke Men Kalaudehla Ahmw Wehwehki Paipel? Mwein kitail kak koasoiapene doaropwe wet ni atail pahn koasoiapene sawaspen oaralap kan me mihmi loale.
3 “Dahme Kahrehda Ke Anahne Wadek Paipel?” Kahrepe kan me doaropwe kan kin kihda kin inenen mwahu. E kin kawehwehda me Paipel kin audaudki “kaweid limpoak sang rehn Koht,” oh e kin kasalehda iaduwen kitail kak kapakapki sawas oh iaduwen kitail kak alehdi sapwellimen Koht kisakis en mour soutuk. (1 Deselonika 2:13) Doaropweo kin kasalehda ekei “padahk mehlel kan me kin ketikihda mehn kamarain,” duwehte dahme kin wiawi ong aramas mwurin mehla oh dahme kahrehda suwed ah nohn tohto nan sampah. E kin pil kasalehda duwen “kaweid en Koht nan Paipel” me pahn kak wahdohng kitail kapai kan en war oh pil kak kihong kitail peren, koapworopwor, oh pil irair mwahu teikan. Doaropweo kin kasalehda pil ehu kahrepe e mwahu en wadek Paipel—pwe Paipel kin kohpada duwen dahme pahn wiawi ni ahnsou kohkohdo.—Kaudiahl 21:3, 4.
4 “Sawas ong Wehwehkihla Paipel”: Doaropweo koasoia: “Kitail koaros anahne sawas pwe kitail en wehwehki Mahsen en Koht.” Mwurin mwo, e kin kawehwehda duwen atail koasoandi en onop Paipel ni e kin koasoia: “E kin kalap mwahu ma onop en Paipel kin tepikihda sukuhliki padahk kesempwal kan oh ahpw doudoulahsang.” Doaropweo kin kasalehda ni sansal me “Paipel iei pwuhk en kaweid mehlel,” oh mwurin mwo, e kin kasalehda me Kupwurki brochure pahn sewese aramas akan me men sukuhliki Paipel “en wehwehkihla mehkan me pid pali ngehn, me pid soangsoangen oaralap tohto.” Mwurin mwo, sawaspen oaralap kin kihda peidek mwahu ehu.
5 “Ke Men Koasoanehdi Ahmw Ahnsou Nan Ehu Ehu Wihk Pwehn Sukuhliki oh Wehwehkihla Paipel?” Doaropweo kin kawehwehda me koasoandi en onop Paipel kak wiawi ni ahnsou ehu oh wasakis me soanamwahu ong aramaso, sohte lipilipil ma nan pein imweo de doadoahngki telephone pwehn onop. Ihs me kak iang onopo? Doaropweo koasoia: “Ahmw peneinei pwon. Sohte lipilipil kompoakepahmw kan me ke men luhkehdo pil kak iang. De ma ke men kelepw ah e pil pahn mwahu.” Awa depe emen anahne koasoanehdi ong onop? Doaropweo koasoia: “Me tohto kin koasoanehdi awa ehu nan ehu ehu wihk pwehn onop Paipel. Ma ke men koasoanehdi ahmw ahnsou laud sang met de pil mwotomwot sang met nan ehu ehu wihk, Sounkadehdehn kan pahn kak koasoanehdi arail ahnsou pwehn sewese iuk.” Met ire ehu me inenen kesempwal! Kitail kak koasoanehdi atail irair akan pwehn mwahu ong koasoandi en aramas akan me men onop Paipel rehtail.
6 “Luhk Ehu Kohwong Uhk en Iang Kasukuhl”: Mie coupon ni pali 6 me aramaso me ale doaropweo kak kadarala oh coupon wet kin kasalehda ma aramaso men ale Kupwurki brochure de ma e mwahuki emen Sounkadehde en onop Paipel reh ni soh pweipwei. Likin Kupwurki brochure me sansal wasao. Ke soh pwungki me doaropwe wet pahn kamwekid aramas mehlel tohto en ale atail sawas? Met, iaduwen kitail kak doadoahngki mehn doadoahk wet ni ahl me mwahu?
7 Kitail Pahn Kihong Ihs Doaropweo? Kitail kak kihong aramas sohte lipilipil doaropweo de kitail kak kihdi ni ihmw kan me sohte towe. Kitail pil kak kihseli doaropweo sang ihmw-lel-ihmw, de nanial, oh pil nan wasahn pisnis. Kitail kak kihong aramas akan me kin perenki wadek neitail pwuhk oh makisihn kan oh pil kitail kak kihong irail me sohte kin ale neitail makisihn de brochure kan. Kitail kak kihdi doaropweo nan makisihn kan de brochure kan de pwuhk kan ahnsou me kitail kihla mehpwukat. Kitail pil kak kihdi nan envelope ahnsou me kitail ntingihdi kisinlikou kan ong aramas akan. Kitail pil kak kadarala doaropweo rehn irail me kitail kin koasoiong ni atail doadoahngki telephone. Ahnsou koaros wahda doaropwe kan ahnsou me kitail kohla netinet, oh ahnsou me kitail iang taxi, oh ahnsou me kitail kalohk ni ahnsou sohte lipilipil. Kitail kak kihong aramas sohte lipilipil me kin kohdo ni imwatail kan. Kitail pil kak kihong atail peneinei kan, mehn mpatail kan, iengetail tohndoadoahk kan, iengetail tohnsukuhl kan, oh aramas teikan me kitail kin ese. Kitail en wia uwen me kitail kak en kihong aramas koaros me kitail kin tuhwong doaropweo! Mwurin mwo, dahme kitail pahn wia?
8 Ma Aramaso Pahn Mwadang Mwekidki Dahme E Wadek Nan Doaropwe: Ekei aramas pahn mwadang mwekidki dahme re wadek ni arail pahn idek rehn Sounkadehdehn Siohwa kan ma irail kak onop Paipel. Kahrehda, ahnsou koaros me kitail iang kalohk, e pahn mwahu en wahda Kupwurki brochure riau—ehu ong aramaso oh ehu ong pein kowe. Ma aramaso men onop, tepida onop reh mwadang. Pakalahng ni pali 2 en brochure, oh wadek wasao me koasoia: “Iaduwen Kitail Kak Doadoahngki Brochure wet.” Mwurin mwo, mwadang tepida Iren Mehn Kasukuhl 1, oh kasalehda iaduwen kitail kin onop brochureo. Ke soh lemeleme me met wia koasoandi me mengei?
9 Ma Aramaso Anahne Ahnsou en Medemedewe Dahme E Pahn Wia: Mwurinte ahmw tepin tuhwong aramaso, nantihong pwurehng tuhwong ih mwadang. Ni ahnsou me ke pahn wia met, tehk me ke weuwa Kupwurki brochure. Kasalehong ih audepen brochure ni pali 2 (Table of Contents). Mweidohng ih en pilada oaralapo me e keieu men ese. Pakalahng oaralapo me e pilada, oh tepida koasoia duwen iren mehn kasuhlo me e men ese.
10 Pwurehng Pwurala Rehn Irail me Kin Ale Makisihn kan: Ma ke kihong aramas emen doaropweo iangahki makisihn kan, ke kak pwurehng pwurala rehn aramaso oh nda: “Rahn teio, ahnsou me I tuhwong uhk, I perenki kihong komwi noumw Watchtower makisihn. Mwein ke pil tehk me oaralap pwon en makisihno iei The Watchtower Announcing Jehovah’s Kingdom (Kahn Iroir—Pakpakairki Wehin Siohwa). Rahnwet, I men kawehwe duwen dahkot Wehin Siohwa oh iaduwen e pidada komwi oh ahmw peneinei.” Mwurin mwo, pahkalahng Iren Mehn Kasukuhl 6 nan Kupwurki brochure. Tepida keieun parakrap, wadek oh koasoia parakrap kan, oh parakrap depe me ke pahn wia pahn poahsoankihda ahn tohnihmwo ahnsou. Mwurin mwo, ke kak koasoanehdi mehnia rahn kumwa kak pwurehng tuhpene oh kanokehla Iren Mehn Kasukuhlo.
11 Tamataman en Wahda Doaropwe me Itar: Sounapwalih en kalohk oh pil brother me apwalih pwuhk kan pahn tehk en kin itar doaropwe kan me oaralap koasoia Ke Men Kalaudehla Ahmw Wehwehki Paipel? me mihmi nan mwomwohdiso ahnsou koaros. Menlau weuwa ekei doaropwe pwukat nan ahmw pwekid, nan ahmw kopwou, nan waromw sidohsa, nan ahmw wasahn doadoahk, nan sukuhl, oh pil karanih wenihmw en pedolong ni imwomw—sohte lipilipil wasa kan me ke kak mwadang ale oh kihong emen. Oh pil, ahnsou koaros weuwa doaropwe kan nan ahmw ehd en kalohk pwehn kak kihong aramas akan me ke kin tuhwong me ke kak koasoiong duwen Pwuhk Sarawi.
12 Siohwa en Ketin Kapaiada Ahmw Nanti: Mehn akadei me keieu mwahu ong Kristian koaros iei en padahkiong aramas emen duwen padahk mehlel. (Madiu 28:19, 20) Ke kin onop Paipel rehn emen ahnsou wet? Ma ke wia met, ke kak koasoanehdi ahmw ahnsou nan wihk koaros en diar pil emen en onop Paipel reh? Ma met sohte aramas emen me ke onop Paipel reh, e sansal me ke men onop Paipel rehn emen. Kapakap ong Siohwa pwehn kapaiukada ni ahmw nantihong rapahki emen en onop Paipel reh. Mwurin mwo, wia mwekid kan me pwung ong ahmw kapakap akan.—1 Sohn 5:14, 15.
13 Kitail naineki mehn doadoahk kapw ong tepida onop en Paipel rehn aramas akan! Ken nantihong wehwehkihla doaropweo. Kihseli wasa koaros me ke kin kohla. Wia uwen me ke kak en “wia me mwahu, oh kepwehpwehki doadoahk mwahu, oh sapan, oh perenki sewese meteikan” ni ahmw pahn sewese irail en sukuhliki Mahsen en Koht.—1 Tim. 6:18.
[Kaokon nan Pali 4]
AHNSOU MWAHU KAN EN KIHSELI DOAROPWEO
◼ Ehuehu rahn ahnsou me kitail koasoiong meteikan
◼ Ahnsou me emen pahn ale neitail pwuhk, brochure de makisihn
◼ Ahnsou me tohnihmw sohte mihmi ni imweo
◼ Ahnsou me kitail pwurehng pwurala rehn aramas akan
◼ Ahnsou me kitail tuhwong aramas nan kalohk en nanial
◼ Ahnsou me kitail kalohk nan wasahn pisnis
◼ Ahnsou me kitail kalohk ahnsou sohte lipilipil
◼ Ahnsou me kitail nting ong aramas akan
◼ Ahnsou me kitail iang bus de taxi
◼ Ahnsou me aramas akan kin kohdo ni imwatail
◼ Ahnsou me kitail koasoiong atail peneinei, mehn mpatail, iengetail tohndoadoahk kan, iengetail tohnsukuhl kan, oh aramas sohte lipilipil me kitail ese