Doadoahngki Tract kan Pwehn Tepiada Koasoi Ong Aramas akan
1 Ke soh pahn pwungki me ma ke pahn kak kalohk ong emen, e kin poahsoanda pohn ma ke pahn tepiada koasoi ong aramas akan? Ahpw, dahme apwal iei en pilada oaralap ehu me aramaso men rong oh pahn perenki oh e pahn uhd men koasoi ong komwi. Ahpw iaduwen met kak wiawi?
2 Sounkalohk tohto diarada me ma re pahn doadoahngki lepin lokaia keite, oh ma re pahn doadoahngki tract kan (tract kan koaros kin poahsoanda pohn Pwuhk Sarawi) re kak tepiada koasoi ong aramas akan. Aramas tohto kin perenki wadek oaralap en tract kan, oh pil aramas pahn perenki kilang kilel lingan kan. Aramas akan kin perenki ale neirail tract kan pwe tract kan kin tikitik oh re wehwehki me e sohte pahn kangala ahnsou laud en wadek. Ahpw, audepen tract kan, mendahki ire kan ntingihdi ni mwotomwot, ire kan inenen kesempwal oh kak sewese sounkalohk en tepiada onop Paipel rehn aramas akan.
3 Emen Sounkadehde kawehwehda pein ah pepehm: “Aramas tohto kin kedirepw rahnwet, oh ihme kahrehda, sohte arail ahnsou en wadawad, ahpw, tract kan kin mwahu pwe re pahn kak wadek ire kesempwal kan nan ahnsou mwotomwot. Ma mie mehkot laud en wadek, duwehte pwuhk kan, ekei pak re sohte pahn ale pwe re medemedewe me e pahn kangala ahnsou laud en wadek. Pein ngehi—I wadek tract tohto. Kedekedeo, I sukuhlikihdi padahk mehlel.” Kitail en dehr mwamwahliki manaman en Mahsen en Koht oh tamataman me dahme ntingihdi nan kisin tract kan kin kesempwal.—Ipru 4:12.
4 Ewen Kahk Pahieu me Mengei: Sounkalohk tohto diarada me ma ke pahn doadoahngki padahk mengei, ke pahn kak pweida. (1) Kasalehong aramaso ekei tract kan oh idek reh mehnia tract e men wadek. (2) Mwurin aramaso pahn pilada ehu tract, idek reh peidek ehu me ke kaunopada me pahn kasalehda ire kesempwal nan tracto. (3) Ni ahmw pahn sapengla peideko, wadek parakrap oh iren Paipel me kohsang tracto me pahn pid peideko. (4) Ma aramaso perenki rong, pousehla ni ahmw pahn koasoia audepen tract oh kasalehda wasakis nan brochure Kupwurki de pwuhken Knowledge me pid oaralap me ke koasoia. Ni ahl wet, ke pahn kak tepiada onop Paipel rehn aramaso. Iren sawas pwukat pahn sewese iuk en kaunopada ahmw padahk me pid tract pahieu.
5 Ke kak doadoahngki oaralap en tract wet: “Ihs me Uhdahn Kaunda Sampah?” oh wia peidekohte ong tohnihmwo.
◼ Ma aramas me ke koasoiong pahn sapengki peidek wet “Koht” de “I sehse,” wadek tepin sentence riau nan pali 2 oh keieun parakrap ni pali 3. Kasalehda 1 Sohn 5:19 oh Kaudiahl 12:9. Ma aramaso kin kamehlele me mie Sehdan me Tepil de soh, ke kak kasalehda ire kan pahnangin sawaspen oaralap me koasoia “Ehu Sawas Sang Irair en Sampah Wet” oh pousehlahte ahmw koasoi ong aramaso. Ma aramaso perenki rong, ke kak kawehwehda iawasa Tepil kohsang ie, oh doadoahngki ire kan sang pali 3 oh 4 en tracto.
6 Tract me oaralap koasoia “Koapworopwor Dahieu Mie Ohng Kompoakpahmw Mehlahr Akan?” kak kahrehong tohnihmwo en men wehwehki duwen peidek wet. Ke kak idek rehn tohnihmwo:
◼ “Ke lemeleme me ehu rahn kitail pahn pwurehng tuhwong atail peneinei oh kompoakpatail me mehlahr?” Mwurin tohnihmwo pahn sapeng peideko, kasalehong ih keriaun parakrap ni pali 4 en tract oh wadek Sohn 5:28, 29. Mwurin mwo, kawehwe ong ih me e pahn mwahu ma e pahn pil wehwehki duwen keieun sawaspen oaralap nan tracto. Ke kak idek rehn tohnihmwo ma kumwa kak koasoiapene sawaspen oaralapo.
7 Peneinei kan koaros kin perenki wadek tract me oaralap koasoia: “Paieki Mour En Peneinei.” Ni ahmw doadoahngki tract wet, ke kak nda:
◼ “Mwein ele ke pahn pwungki me peneinei tohto kin lelohng kahpwal kan rahn pwukat. Dahme tohnpeneinei kan kak wia pwehn kaminiminpene peneinei kan rahnwet?” Mwurin tohnihmwo pahn sapeng, kasalehong ih ire kan me mihmi ni pali 6, parakrap 1. Pilada iren Paipel ehu sang iren Paipel kan me mihmi ni pali 4 oh 5 en tracto, oh kawehwehda iren Paipel me ke pilada. Mwurin mwo, idek rehn tohnihmwo ma e men onop Paipel ni soh isepe.
8 Ke kak doadoahngki tract me oaralap koasoia “Dahme Kahrehda Komw Kak Likih Paipel” ni ahmw pahn nda met:
◼ “Pali laud en aramas rongehr duwen poadoapoad en Kain oh Eipel me mihmi nan pwuhken Senesis. Senesis pil kin koasoia duwen ahn Kain pwoud. Mie pak me ke medemedewe: “Iawasa Kain kihsang ie eh pwoud?” Wadek kaimwiseklahn parakrap ni pali 2 en tracto pwehn wehwehki pasepeng en peidek wet. Ke kak pil kawehwehda me tract wet pahn kawehwe dahme Paipel kin mahsanih duwen dahme pahn wiawi ni ahnsou kohkohdo. Ke kak tepida wadek sang pali 5, parakrap 3 kohdi oh kilang iren Paipel kan oh kawehwe ong tohnihmwo.
9 Sangete mahs lel met, kihseli tract kan me kin kawehwe Pwuhk Sarawi wia ehu ahl en kalohki Rongamwahu. Pwehki tract kan kin mengei en wahseli, ke kak doadoahngki irail wasa koaros me ke pahn kohla: kalohk ihmw-lel-ihmw oh iangahki kalohk ahnsou sohte lipilipil. Doadoahngki tract kan kin kesempwal ong atail kapwaiada atail pwukoah en kalohk ong aramas koaros. Ken wahda soangsoangen tract kei, oh doadoahngki tract kan ahnsou koaros pwehn tepiada koasoi ong aramas akan.—Kolose 4:17.