Kahrepe kan me Tract kan kin Kesempwal
1 Nan The Watchtower (lokaiahn wai) en January 1, 1991, pali 30, ekspiriens ehu me ntingdi me oaralap koasoia “E Diarada Tract ehu Pohn Mete me Kisa kin Tang Powe.” E koasoi duwen ohl emen me kin wia kaun en apwalih kisa oh e diar tract ehu pohn mete me kisa kin tang powe. E mwadang wadek tracto oh ndaiong ohlo me pwoudki nah lih: “Rahnwet I diarada padahk mehlel!” Ohl riemen pwukat oaht pwuhk kan sang Society oh onopki pwuhk pwukat. Rahnwet, kadaudok en ohl riemen pwukat me tohtohki aramas epwiki samwa kehlail nan padahk mehlel. Ekspiriens wet kin kasalehda dahme kin wiawi ahnsou me emen kin wadek tract ehute.
2 Doadoahngki Mwahu Atail Ahnsou Mwahu kan en Kalohk: Sounkadehdehn Siohwa wasa koaros nan sampah kin kalohk oh doadoahngki tract kan ni ahl me mwahu. Emen sister pwulopwul kilang me eh sounpadahk inenen nsensuwed pwehki emen nan eh peneinei mehla. E ntingihdi kisinlikou me pahn kamweitih liho oh pil kihong nan envelope tract me oaralap koasoia Koapworopwor Dahieu Mie Ohng Kompoakepahmw Mehlahr Akan? Sounpadahko kalahngan ong sister pwulopwulo oh met e kin kaukaule ale makisihn kan sang sistero.
3 Tract kan kin tikitik oh mengei en wahda wasa sohte lipilipil me kitail pahn kohla ie. Ni atail pahn koasoiong meteikan, mehnda ma aramas me kitail sehse de aramas me kitail ese, kitail en nantihong nda mehkot mwotomwot me pahn kak kahrehong kitail en kak koasoia tract ehu sang neitail tract kan me kitail kin kolokol ahnsowo. Kitail kak wia met ni atail pahn koasoi ong mehn mpatail kan, de ahnsou me kitail kohla netinet, de ahnsou me kitail awiawih tuhwong toahkte, de ahnsou me kitail mwemweitla rehn atail peneinei, de sohte lipilipil ahnsou me kitail kak kalohk ong aramas akan.
4 Kahrepe kan Tract kan kin Mwahu ong Kalohk: Tract kan kin lingan pwe pohn kilel kan me tohto. Oh pil, audepen tract kan kin mwotomwot. Tohnihmw kan oh irail me kitail kin tuhwong nan kalohk ni ahnsou sohte lipilipil sohte pahn pehm me e anahne wadek mehkot me nok reirei oh loal. Ahpw, audepen tract kan kin kaperen oh katapan. Irail akan me kin wadek tract kan pahn kak wehwehki duwen oaralap me re wadek oh iren Paipel kan me pid oaralapo. Emen ohl ale tract me oaralap koasoia Mour Nan Sampah Kapw Meleilei Ehu oh mwurin emen sounkalohk kousapahlih audepen tracto rehn ohl, ohl koasoia ni ngilen peren: “Ehdin I rong duwen mehkot kaperen me pid dahme pahn wiawi ong sampah ni ahnsou kohkohdo!”
5 E pahn mwahu ma kitail pahn doadoahngki tract kan ahnsou koaros pwehn kalohk ong aramas akan. Sounkalohk tohto diarada me re kin doadoahngki tract kan nan kalohk en ihmw-lel-ihmw oh met kin sewese irail en koasoi ong aramas akan. Sounkalohk tohto kin tepida onop en Paipel rehn aramas akan ni arail kin tepikihda doadoahngki tract. Ei, tract kan kin tikitik ahpw re inenen katapan pwe re kin wia mehn doadoahk mwahu kan ong kalohk.