Koasoandi Lingan ong Neitail Kisin Doaropwe Kapw kan!
1. Mehn sawas dah kei ong atail doadoahk en kalohk me wiawihda ni koasoandi kapw oh lingan?
1 Kisin doaropwe kapw limau kohda ni Mihting Tohrohr (District Convention) en pahr 2013 me oaralap iei “Sapwellimen Koht Mahsen Iei Me Mehlel!” Patehng met, Kingdom News No. 38, me oaralapo iei “Me Melahr akan Uhdahn Kak Pwurehng Mourda?” pil iangalahr kisin doaropwe pwukat. Kisin doaropwe weneu pwukat kin wiawihda ni koasoandi kapw oh lingan. Ia kahrepen soangen koasoandi kapw pwukat? Ni ahnsou me kitail kihla ni ihmw lel ihmw, ia duwen atail kak doadoahngki mwahu mwomwen soandi en ire kan nan doaropwe pwukat?
2. Ia kahrepen koasoandi kapw pwukat?
2 Ia Kahrepen Koasoandi Kapw Wet?: Kahk pahieu me kak kahrehiong omw padahk en ihmw lel ihmw en kak pweida: (1) Idek ahn tohnihmwo madamadau oh tepida koasoiapene. (2) Ehukihpene ekei ire sang nan Paipel. (3) Kihong tohnihmwo kisin doaropwe pwehn kak wadek. (4) Kihdi ehu peidek pwe ken pwurodo mwuhr oh sapengala, oh wiahda koasoandi en pwurala. Koasoandi kapw en kisin doaropwe pwukat sewese kitail en mengeiki idawehn kahk pwukat koaros.
3. Ia duwen atail pahn kak kihla ehu neitail doaropwe kapw kan nan wasahn kalohk?
3 Ia Duwen Atail Kak Doadoahngki Mepwukat: (1) Mwurin omw rahnmwahu, kasalehiong tohnihmwo peidek oh pasapeng siluh mwahu kan me mi mwohn kisin doaropweo, oh idek re ia eh madamadau. (2) Pahkpeseng kisin doaropweo, oh koasoiapene “Dahme Paipel Mahsanih.” Wadek ireo sang nan pein noumw Paipel ma mie ahnsou. Ma tohnihmwo mie eh ahnsou, koasoiapene “Dahme Met Kak Wiahiong Uhk.” (3) Kihong ih kisin doaropweo, oh kangoange en wadekala ahnsou me e kak. (4) Mwohnte omw kohkohla, kasalehiong ih peidek me mi pahnangin oaralap “Pwehn Medemedewe Duwen” oh wiahda koasoandi en koasoiapene pasapeng kan sang nan Paipel ni omw pahn pwurala.
4. Ia duwen atail kak doadoahngki kisin doaropwe kapw kan ni atail pwurala rehn me men rong?
4 En pwurala rehn me men rong kin pil mengei. Uhdahte doadoahngki iren Paipel kan me mi nan tihnsewen doaropweo pwehn sapengala peidek me ke kihong ih ni tepin omw tuhwong ih. Mwohn omw pahn kohkohla, kasalehiong ih kilel en pwuhken Rohng Mwahu, kasalehiong tohnihmwo iren mehn kasukuhl me kileldi wasao me audaudki kalaudepen oaralapo oh kihong ih kisin pwuhk wet. Ma e ale, wiahda koasoandi me ke pahn pwurehng pwurala oh koasoiapene kisin pwuhko. Met ke tepidahr onop Paipel reh! De ma ke sohte kihong ih pwuhk wet, ke kak kihla pil ehu kisin doaropwe oh koasoanehdi ken pwurehng pwurala rehn tohnihmwo oh koasoiapene kisin doaropweo.
5. Ia kesempwalpen neitail kisin doaropwe kan?
5 Sounpar 130 samwa kitail kin doadoahngki neitail kisin doaropwe nan atail doadoahk en kalohk. Mendahki ma koasoandi en ire kan loale wekpeseng, kisin doaropwe pwukat kin wia mehn doadoahk mwahu nan kalohk. Kitail en doadoahngki mehn doadoahk mwahu kapw pwukat en lohkiseli padahk en Paipel nan sampah pwon.—Lep. Pad. 15:7a.