Ia Duwen Atail Pahn Tapiada Koasoakoasoi ni Atail Doadoahngki Kisin Doaropwe

Sang ni January 2018, pali keieun Doaropwehn Kasukuhl ong Mihting en Mour oh Kalohk kin kasalehda iren sawas kan ong koasoakoasoipene. Kitail kin ale kangoang en nantihong koasoiong aramas akan, a kaidehn en ihte kihla pwuhk kan. Pwehn sewese sounkalohk kan ren wekidala mwomwen arail pahn koasoiong aramas akan, kisin kasdo ong koasoakoasoipene kan kin kasalehda ia duwen atail pahn doadoahngkihte Paipel oh tapiada koasoiong aramas akan. Ahpw met wehwehki me kitail en dehr doadoahngki neitail sawasepen Paipel kan ni atail kalohk ihmw lel ihmw? Uhdahn soh! Karasepe, kisin doaropwe kan iei ehu ahl me kin pweida mwahu pwehn tapiada koasoakoasoiong aramas. Kitail kak doadoahngki wiepe wet ni atail doadoahngki ehu sohte lipilipil rehn kisin doaropwe kan (tracts):

1. Doadoahngki ehu rehn peidek kan me mi pali keieun neitail doaropwe.

2. Kasalehda pasapeng sang Paipel me mi nan iren Paipel (kan) powe nan pali 2. Ma miehte ahnsou, wadek oh koasoiapene ekei ire kan me mi nan kisin doaropweo.

3. Kihong tohnihmwo kisin doaropweo, oh kangoange ih en wadekala ahnsou me soanamwahu ong ih.

4. Mwohn omw pahn kohkohla, kasalehiong peideko “Pwehn Medemedewe Duwen” oh koasoanehdi kumwa en koasoiapene pasapengpen peideko sang nan Paipel mwuhr.

Ni omw pahn pwurala, koasoiapene pasapengo oh kihdi ehu peidek me kumwa pahn koasoiapene mwuhr. Ke kak pilada ehu peidek sang nan neitail website de sang sawaspen Paipel ehu me kileldi ni pali 4 en doaropweo. Ni ahnsou me konehng, kasalehda kisin pwuhko Rohng Mwahu Sang Rehn Koht! de ehu sawasepen Paipel sang Koakon en Kasukuhl (Teaching Toolbox).