Ia Duwen Atail Pahn Doadoahngki Iren Sawas kan ong Koasoakoasoipene

Sangete January 2018, iren sawas kan ong koasoakoasoipene kin mi ni kilin Atail Mour en Kristian oh Kalohk​—Doaropwehn Kasukuhl ong Mihting. Ia duwen atail kak doadoahngki mepwukat?

Ma Ke Wia Padahk Ehu: Ke anahne doadoahngki peideko, iren Paipelo, oh peidek ong pwurehng pwurala sang iren sawas kan ong koasoakoasoipene. Ahpw met sohte wehwehki me ke anahne doadoahngki lepin lokaia kohte me mi nan kisin kasdou. Ke kak doadoahngki ehu wiepe, de tepin koasoi, de kawehwe, de soahng teikan me pahn weksang kasdou. Ke pil kak kihla ehu pwuhk sang nan neitail Koakon en Kasukuhl, mehnda ma e sohte mi nan koasoandi en padahko.

Nan Kalohk: Iren sawas kan ong koasoakoasoipene wiawihda pwehn kihda sawas mwahu kan. Ma aramas emen perenki rong oh men kalaudehla eh men ese, ke kak pousehlahte koasoio, ele ni omw doadoahngki iren sawas ong pwurehng pwuralao. Ke kak ekis wekidala iren sawas kan ong koasoakoasoipene de doadoahngki mehkot tohrohr. Ia duwe, oaralap ehu sang sounpwong en mwoweo de ehu iren Paipel tohrohr kin kamwakid laud aramas akan nan omw wasahn kalohk? Aramas akan wasa me ke kin mi ie kin men rong duwen dahme wiewiawi? Ke kak doadoahngki iren sawas kan ong koasoakoasoipene ni soangsoangen ahl akan. Ahpw omw mehn akadei iei en ‘wia soahng koaros pwehki rongamwahwo, pwe ken ehukihong meteikan.’​—1Ko 9:22, 23.