Onopada Ahnsou Koaros en Tapiada Onop en Paipel
1. Dahme kin pid kehkehlik en Sises nan Madiu 28:19, 20?
1 Sises ketin kehkehlikihong kitail en padahkih oh katohnpadahkih aramas. (Mad. 28:19, 20) Kahrehda kitail men onopada ahnsou koaros en tapiada onop en Paipel rehn aramas akan a kaidehn ongete koasoandi en tepin rahn kaunop en ehuehu sounpwong. Koasoandi pwukat pahn sewese kitail.
2. Ihs me kitail kak luke pwehn onop Paipel?
2 Kasalehda Duwen Onop en Paipel: Ni atail kin kalaudehla atail luke meteikan en onop Paipel, e kin kihong kitail ahnsou mwahu en pil diarada emen me men onop Paipel. (Ekl. 11:6) Ke songehr tapiada onop en Paipel ni omw tepin tuhwong tohnihmwo? Ehu mwomwohdiso nan Amerika kin nantihong wia met erein sounpwong ehu. Irail peren laud ni arail tepida onop Paipel rehn aramas 42! Ke dehr leme me irail kan me kin men rong ese me ke men onop Paipel rehrail. Ke sou luke irail en onop Paipel ni omw pahn pwurehng pwurala rehrail? E sohte pahn wia kahpwal ehu ma irail sohte men onop ni ahnsowo. Ke kak doulahte kangoange irail en men onop. Mie pak me ke idek rehn mehn mpomw kan, omw peneinei kan, iengomw tohndoadoahk kan de tohnsukuhl kan ma re men onop Paipel? Ke pil kak idek rehn irail me onop Paipel rehmw ma mie kompoakparail kan de arail peneinei me pil men onop Paipel.
3. Mehn sawas dahieu me wiawihda ong tapiada onop en Paipel? Iahd me kitail kak doadoahngki?
3 Mehn Sawas Kesempwal: Ehu mehn sawas kesempwal ong tapiada onop en Paipel iei doaropwe me adaneki Ke Sou Men Esehla Duwen Padahk Mehlel? Ke kak kihong tohnihmw kan mehnda ma re ale pwuhk teikan de soh. Ke kak doadoahngki ni ahnsou me ke kalohk wasahn pesines kan, nanial, ni omw kin kadar kisinlikou kan oh ni omw pahn pwurehng pwurala rehn aramas akan. Ke pil kak kihdi ni ihmw kan me sohte towe. Ke sou wahda ni omw kin iang weren nansapw akan, ni omw kin netinet oh nan omw wasahn doadoahk? Nan tihnsewen doaropweo kin kawehwehda duwen koasoandi en onop Paipel oh e pil kasalehda duwen pwuhken Paipel Padahngki.
4. Ia duwen atail pahn doadoahngki doaropwehn Esehla Padahk Mehlel pwehn tapiada onop en Paipel?
4 Mwurin omw kihong aramaso doaropweo, ke kak kasalehiong peidek kan me mi mwoweo oh idek reh, “Mehnia rehn peidek pwukat me ke keieu men ese pasapengpe?” Eri wadekpene pasapeng sang nan doaropweo oh oaralapihada koasoandi en onop Paipel me mi nan tihnsewen doaropweo. Eri ke kak kasalehiong ekei ire kan duwen dahme kumwa koasoia sang nan pwuhken Paipel Padahngki. Kihong ih pwuhko oh wiahda koasoandi en pwurehng pwurala pwehn usehla amwa koasoi.
5. Dahme kahrehda kitail en kin onopada pwehn luke aramas en onop Paipel?
5 Miehte irail kan me kin men ese dahme Paipel uhdahn padahngki nan atail wasahn kalohk. Ni atail kin onopada pwehn luke aramas en onop Paipel, kitail pahn diar ahnsou mwahu en sewese meteikan en iang keid nan ahl me kahluwalahng mour.—Mad. 7:13, 14.