Pwurehng Pwurala Rehn Aramas akan Kak Kamwekid Irail en Onop Paipel
1. Dahme kahrehda e kesempwal en pwurehng pwurala rehn aramas akan me perenki rong?
1 Sises kehkehlikiong sapwellime tohnpadahk kan en dehr ihte kalohk ahpw pil “katohnpadahk . . . , padahk ong irail.” (Madiu 28:19, 20) Sounkalohk men kin kalohk, ahpw sounpadahk men kin wia laud sang met. E kin padahk, kawehwe, oh kasalehda kadehdehpen mehkot. Ehu ahl en padahk ong aramas akan iei en pwurehng pwurala rehn aramas akan oh akadeiong tepida onop Paipel rehrail.
2. Kitail pahn pwurehng pwurala rehn ihs?
2 Kitail pahn pwurehng pwurala rehn ihs? Kitail en nantihong pwurehng pwurala rehn koaros me kin ale neitail pwuhk kan, brochure kan oh makisihn kan oh pil pwurehng pwurala rehn irail me kin perenki rong duwen Rongamwahuwo. Ma ke tuhwong aramas emen nanial me perenki rong de wasa teikan likin ahnsoun kalohk ihmw-lel-ihmw, idek reh iawasa e kin mihmi ie de nah nempehn telephone pwe ken kak pwurala reh. Ken nantihong tepida onop Paipel reh. Nantihong rapahki irail me pahn kak onop Paipel rehmw, oh ke pahn diar aramas pwukat.—Madiu 10:11.
3, 4. Dahme kitail kak wia ni ahnsou me kitail kin pwurehng pwurala rehn aramas akan?
3 Kasalehda Me Ke Nsenohki Irail: Ahmw kaunopada ong ahnsou me ke pahn pwurala kin tepida ni ahmw tepin tuhwong aramas akan. Sounkalohk kan me kin pweida mwahu kin tehk mwahu dahme tohnihmwo kin perenki de kesempwaliki, oh irail kin doadoahngki met ahnsou me irail kin pwurehng pwurala rehrail. Ekei sounkalohk kin diarada me ma irail pahn wia peidek rehn tohnihmwo ni kaimwiseklahn arail koasoakoasoipene, met pahn kamwekid tohnihmwo en kasikasik ahnsou me sounkalohko pahn pwurehng pwurala reh. Atail mehlelki atail nsenohki aramas teikan pahn kamwekid kitail en medemedewe aramas akan me kitail kin tuhwong oh e pil kin kamwekid kitail en mwadang pwurehng pwurala rehrail. Ma kak, nantihong pwurehng pwurala rehrail mwadang—mwein erein rahn ehu de riau—pwe ren kak tamataman dahme kumwa koasoiapene.
4 Ni ahnsou me ke pahn pwurehng pwurala rehn aramas akan, ke pahn song en koasoia mehkot me pid dahme kumwa koasoiapene ni ahnsou me ke tepin tuhwong ih. Ke pahn akadeiong ehukihong aramaso iren Paipel ehu me mwahu, oh ken nantihong rong mwahu dahme e kin koasoia. Ken nantihong sukuhliki duwen irair kan en tohnihmwo. Eri, ni ahnsou me ke pahn pwurehng pwurala reh mwuhr, ehukihong ih padahk mehlel kan sang Mahsen en Koht me kin keieu pid ah kahpwal akan oh dahme e kin nsenohki nan eh mour.
5. Dahme ke kak wia pwehn tepida onop Paipel rehn aramas akan?
5 Nantihong Tepida Onop Paipel Rehn Aramas Koaros: Ni ahnsou me ke pahn pwurehng pwurala rehn aramas akan, ke pahn akadeiong tepida onop Paipel rehrail. Iaduwen met e kak wiawi? Ke pahn ndaiong tohnihmwo me ke men ehukihong ih ire ieu me ke perenki, oh ke pahn pahkpeseng noumw pwuhken Knowledge de noumw brochure Kupwurki oh wadek ong ih parakrap ehu loale me ke lemeleme e pahn perenki. Wadek parakrapo, wia peidek en parakrapo, oh koasoiapene ehu de riau iren Paipel kan me sohte kileledi nan parakrapo. Met kak wiawi likinte wenihmwo erein minit limau de eisek. Ke kak kaimwisekala amwa koasoi ni ahmw pahn wia pil ehu peidek oh mwurin mwo, ke pahn koasoanehdi pwe ken pwurehng pwurala reh oh koasoia pasapengpen peideko.
6. Iaduwen kitail kak kasalehda me kitail wehwehki duwen kesempwalpen pwurehng pwurala rehn aramas akan me kin perenki rong?
6 Mehkot me inenen kesempwal me pid atail doadoahk en kalohk iei atail pwurehng pwurala rehn koaros me kin kasalehda me irail men rong oh sewese irail en kekeirada ni pali ngehn. Ihme kahrehda, e kesempwal kitail en koasoanehdi ahnsou nan wihk koaros en pwurehng pwurala rehn aramas akan me kin perenki rong. Met pahn sewese kitail en pweida mwahu nan kalohk oh e pil pahn wahdohng kitail peren mehlel.