Koakon En Peidek
◼ Soangen keper dah kan me kitail anahne tehk kanahieng ni atail kalohk ong irail me selidi nan imweteng?
Wasa koaros nan sampah, aramas million pak waluh selidi nan imweteng, oh ekei irail kin perenki rong duwen Rongamwahu en Wehin Koht. (1 Tim. 2:4) Ehu Branch Ohpis kin ale kisinlikou 1,400 samwa nan sounpwong koaros sang irail me selidi nan imweteng oh pil arail peneinei oh nan kisinlikou pwukat irail kin peki ma irail kak ale pwuhk kan, brochure kan oh makisihn kan de irail men tuhwong Sounkadehde men. Mehlel, ekei kin uhdahn men rong duwen kaweid en Paipel oh kawekila arail mour, ahpw ekei irail kin mwomwehda me irail men rong, ahpw ni mehlel, irail pahn isaneki kadek en Sounkadehde kan pwehn ale mehkot ong pein irail (pwehki roporop ong pein irail). Pwehki met, kitail anahne idawehn kaweid pwukat koaros ni ahnsou me kitail kin kalohk ong irail me selidi nan imweteng.
Pali laud en ahnsou, sounkalohk kan kin kalohk ong irail me selidi nan imweteng ki kisinlikou kan. Ihme kahrehda, kaweid kehlail kohda wasaht me sister kan en dehr nting ong irail ohl kan me selidi nan imweteng mehnda ma sister kan pahn nda me ihte me irail pahn wia: en sewese ohl pwukat en kekeirada ni pali ngehn. E pahn konehng en mweidohng brother koahiek kante en sewese ohl pwukat en kekeirada ni pali ngehn. Sister koahiek kan kak sewese irail lih kan me selidi nan imweteng ma irail kin kasalehda me irail men sukuhliki padahk mehlel. Kitail anahne pil tamataman me e sohte mwahu en kadarala mwohni de kisakis kan ong irail me selidi nan imweteng, mendahki ma irail pahn peki soahng pwukat.
Ni ahnsou me aramas emen me selidi nan imweteng pahn kasalehda me e men rong, kitail pahn kihong mwomwohdiso me kin mihmi wasa me imweteng mihmi ie eden aramaso oh pil eden wasao me e mihmi ie. Brother koahiek kan wasao kin wehwehki dahme irail pahn wia ni ahnsou me emen me selidi nan imweteng nan arail wasa pahn kasalehda me e men rong. Ma ke sehse mehnia mwomwohdiso kin apwalih kalohk nan wasao me imweteng mihmi ie, ke kak kadaralahng Branch Ohpis eden aramaso oh mehnia imweteng me e selidi loale.
E sohte suwed ma brother koahiek kan pahn koasoanehdi mihding kan ong irail me selidi nan imweteng pwe irail tohto me kak onop Paipel ahnsou teieu. Ahpw, e sohte pahn mwahu en koasoanehdi soangen wiewia kan me sounkalohk kan pahn kak miniminiong irail me selidi nan imweteng ni saledek. Oh pil, e sohte pahn mwahu ma sounkalohk kan kin mwemweitala rehn irail me selidi nan imweteng ni ahnsou soh lipilipil oh werekiong irail.
Kitail anahne “kanahieng duwehte sineik kan oh pil mpahi duwehte mwuroi kan” ni atail pahn ehukihong irail me selidi nan imweteng Rongamwahu en Wehin Koht.—Madiu 10:16.