Sewese Irail me “Konehng Ale Mour Soutuk”
1. Soangen aramas dah kan me Siohwa kin ketikihpene nan atail ahnsou?
1 Emenemen kin ahneki irair kan me poahsoanda nan eh mohngiong karasaras. (Madiu 12:35) Paipel kin koasoia duwen irail me “arail mohngiong kin perenki pei.” (Melkahka 55:21) Ekei aramas kin “mwadang en lingeringer.” (Lepin Padahk 29:22) Ahpw, mie pil ekei aramas me “konehng ale mour soutuk.” (Wiewia 13:48) Nan atail ahnsou, Siohwa kin ketikihpene irail akan me konehng ale mour soutuk pwe ren kaudokiong Ih. (Akkai 2:7) Iaduwen kitail kak sewese irail en wiahla sapwellimen Siohwa tohnkaudok mehlel akan?
2. Dahme kitail anahne ahneki ma kitail pahn kapwaiada mwahu atail pwukoa en katohnpadahkih aramas akan?
2 Pwurehng Pwurala Rehn Aramas akan: Atail ahneki madamadau pwung duwen pwurehng pwurala rehn aramas akan kin kesempwal ong kitail ma kitail pahn kapwaiada mwahu atail pwukoa en katohnpadahkih aramas akan. (Madiu 28:19, 20) Kitail kin mwadang pwurehng pwurala rehn aramas akan me kin perenki rong? Kitail kin pwurehng pwurala rehn irail me kin ale neitail pwuhk, brochure oh makisihn kan de irail me kin kasalehda me irail perenki rong duwen Rongamwahu? Kitail kin nantihong sewese irail en kekeirada ni pali ngehn? Pwehki kitail wehwehki me atail doadoahk kin pid mour en aramas akan, kitail anahne wia uwen atail kak koaros en nantihong sewese aramas koaros me kin perenki rong.
3. Dahme kitail anahne mwadang wia mwurinte kitail koasoi ong aramas emen nan kalohk?
3 Mwurinte ahmw koasoi ong aramas emen me kin perenki rong oh pwehki ke tamatamante dahme ke koasoiong aramaso, e pahn mwahu en mwadang ntingihdi eden aramaso oh iawasa e kin mihmi ie. Ntingihdi oaralap me kumwa koasoiapene, iren Paipel kan me kumwa wadek, oh mehnia pwuhk, brochure, makisihn de tract me ke kihdi reh. Mwurin mwo, ke pahn wia uwen ahmw kak koaros en mwadang pwurala rehn aramaso.
4. Dahme kitail kak nda oh wia ma kitail men pweida mwahu ni ahnsou me kitail pahn pwurehng pwurala rehn aramas akan?
4 Dahme Ke Pahn Nda oh Wia Ni Ahmw Pahn Pwurehng Pwurala Rehn Aramas akan: Ni ahnsou me ke pahn pwurehng pwurala rehn aramas emen, ke pahn kadek ong ih oh kasalehda me ke kin nsenohki ih. Koasoi ni ahl me sansal oh poahsoanda pohn iren Paipel kan. Koasoia oaralap kan sang nan Paipel me e pahn perenki rong, oh ni imwin ahmw koasoiong ih, ke kak kihda peidek ehu me ke pahn sapeng ehu rahn me ke pahn pwurehng pwurala reh. E pahn mwahu en dehr koasoi duwen mehkot me aramaso kin kamehlele me sohte pwung nin duwen dahme Paipel kasalehda. Koasoia duwen soahng kan me kumwa pwungkihpene.—Kolose 4:6.
5. Dahme emen brother me kin iang doadoahk en Regular Pioneer wia, oh ia imwilahn ah doadoahk?
5 Mehlel, e kin wia doadoahk laud en pwurehng pwurala rehn aramas akan me kin perenki rong, ahpw ahmw nannanti pahn kaperen oh imwila mwahu. Emen brother me Regular Pioneer nan Japan wiahda mehn akadei en kalaudehla ah nantihong pwurehng pwurala rehn aramas akan nan sounpwong koaros. E tepida ntingihdi eden aramas koaros me e kin tuhwong nan ah kalohk en ihmw-lel-ihmw, oh e kin song en pwurehng pwurala rehn aramas pwukat erein rahn isuh. E kin kaunopada mwahu dahme e pahn nda oh e kin nantihong tamataman ahnsou koaros me ah doadoahk en kalohk me inenen kesempwal. Emen aramas me e pwurehng pwurala reh tepida onop Paipel oh aramaso ndaiong ih: “I kin ahnsou koaros padahkiong kumwail me I sohte men rong. Edin I pahn rong kumwail rahnwet.” En pioneer menet eh nannanti imwila mwahu. Ni imwin sounpwongo, e ripohtki onop en Paipel rehn aramas ehk.
6. Dahme kahrehda kitail anahne nantihong pwurehng pwurala rehn aramas akan?
6 Ahn aramas arail irair kan kin kalap wekiwekila. (1 Kor. 7:31) Ong ekei aramas, kitail anahne pwurala rehrail pak tohto mwohn atail pahn kak pwurehng tuhwong irail. Ma kitail pahn nantihong pwurehng pwurala rehn aramas akan, kitail kak sewese irail me konehng ale komourparail en keid nan elen ale mour soutuk.—Madiu 7:13, 14.