Kaunopada Mwahu Pahn Seweseiuk en Pweida ong Pwurehng Pwurala Rehn Aramas
1. Ni ahl dah me kalohk en Kristian nan mwehin Sises pahn lella wasa koaros?
1 Sises uhdahn kaunopada mwahu sapwellime tohnpadahk kan en wia sounkalohk mwahu ong “Rongamwahu en Wehin Koht.” (Mad. 4:23; 9:35) Sises ketin kasukuhlih irail ni ar kin kalokalohk nan Palestine. Ahpw mwohnte e ketidahla nanleng, Sises kasalehda me kalohk en Kristian pahn lella wasa koaros pwehn ‘padahkihong tohn wehi kan koaros; pwe re en wiahla nah tohnpadahk.’—Mad. 28:19, 20.
2. Dahme kin pidada en peikiong sapwellimen Sises kehkehlik en ‘wia katohnpadahk’?
2 Doadoahko pahn pidada pwurehng pwurala rehn aramas akan me kasalehda men rong rongamwahu en Wehin Koht oh padahkihong irail en peikiong mehkoaros me Sises kehkehlingki. Pwehn sewese en pweida mwahu ong pwurehng pwurala rehrail, kitail anahne kaunopada mwahu.
3. Mendahki ahmw ahpwtehn tuhwong aramaso, iaduwen ke kak pwurehng pwurala reh?
3 Pilahn Mwowe: Ekei sounkalohk kan kin kihda peidek ni imwilahn ar tepin tuhwong aramaso oh inoukihda en pwurehng pwurala oh koasoia pasapengpe. Re diarada me doadoahngki pwuhken Bible Teach (Paipel Padahngki) kin sewese irail en tapihada wia onop en Paipel.
4. Dahme kahrehda kitail en dehr kapwandehla en pwurehng pwurala reh lao lel kitail naineki makasihn kapw?
4 Kitail sohte anahne awiawih sounpwong ehu lao lel makasihn kapw pwehn pwurehng pwurala. Kitail kak kalaudehla arail men rong ni atail koasoiapene ire kan nan makasihn me re aleier.
5. Ia kamwahu en ahneki mehn akadei?
5 Ahneki Mehn Akadei: Mwohn pwurala, tehk noumw rekord kan oh koasoanehdi mwahu dahme ke pahn koasoia. Karasepe, koasoia ehu ire sang makasihn me ke ahpwtehn kihdi. De kihdi pwuhk teikan me pid te dahme kumwa koasoia mwowe. Ma ke kihda peidek mwowe, ahmw mehn akadei pahn pidada pasapengpen peideko. Ni ahnsou me ke kasalehda iren Paipel ehu me pid ireo, nantihong wadek sang nan Paipel.
6. Ia atail mehn akadei ong pwurehng pwurala rehn aramas akan?
6 Atail Mehn Akadei: Atail mehn akadei iei en tepihada wia onop en Paipel. Emen brother kangoange emen ohl en onop Paipel, ahpw e sohte mwahuki. Brothero pwurala reh kihong makasihn kapw ehu oh nda, “Se kin sapeng peidek en Paipel ehu ong aramas akan rahn pwukat.” Mwurin brothero rongehr dahme ohlo nda, e wadek ehu iren Paipel oh ehu parakrap me pid iren Paipel sang nan ehu pwuhk me e kin doadoahngkihong onop Paipel. Met imwikihla ehu onop en Paipel.
7. Iaduwen kaunopada mwahu seweseiuk en tepihada onop en Paipel?
7 Kihong ahnsou pwehn kaunopada mwahu mwohn pwurehng pwurala rehn aramas akan mie katepe. Atail peren pahn laudla, oh kitail ahneki ahnsou mwahu en sewese “irail kan me mihmier nan irair en kak ale mour soutuk.”—Wiewia 13:48, NW.