Anahn​—⁠Tepida Pil Ekei Onop en Paipel Rehn Aramas akan

¹ E sansal me Siohwa Koht kin ketin kapaiada sapwellime aramas akan pwehki irail wie tohtohla ahnsou koaros. Nan pahr koaros, aramas kid kid kei kin papidaisla wasa koaros nan sampah​—met wehwehki me average en tohnpadahk kapw kan me papidaisla iei me 1,000 nan ehuehu rahn! Mendahki riatail brother oh sister kan kin lelohng apwal oh uhwong nan sounpahr tohto, doadoahk en kalohki Wehio kin nannantihweite mwowe oh irail me kin wiahla sapwellimen Sises tohnpadahk kan kin tohtohla. E kin inenen kaperen en wadek duwen kekeirada mwahu me kin wiawi pwehki sounkalohk kan kin pwerisek en kalohkiseli duwen Rongamwahuwo!

² Nan mwomwohdiso kan me mihmi pahnangin epwelpen Guam Branch nan pahr en kalohk me ahpwtehn nek, kitail pil kilang kekeiradahn irail me iang doadoahk en Auxiliary Pioneer, oh kekeiradahn awa kan me sounkalohk kan kin iang kalohk oh pwurehng pwurala rehn aramas akan, oh pil kekeiradahn pwuhk, brochure oh makisihn me kitail kihla. Oh pil, irail me papidaisla pil tohtohla. Dahme wiawi nan doadoahk en onop Paipel rehn aramas akan? Kitail pil kilang me atail onop Paipel rehn aramas akan pil tohtohla. E sansal me atail onop Paipel rehn aramas akan kin kesempwal pwehki doadoahk wet me pahn sewese aramas en wiahla sapwellimen Sises tohnpadahk kan. Dahme emen emen kitail kak wia pwe onop en Paipel rehn aramas akan en tohtohla?

³ Kakehlailihala Atail Ineng en Onop Paipel Rehn Aramas akan: Pein kitail anahne wia uwen atail kak koaros en kehlail ni pali ngehn oh ngoangki soahng ngenin kan. Sapwellimen Krais tohnpadahk mehlel kan kin “ngoangkihte wiewia me mwahu.” (Taitus 2:​14) Ni ahnsou me kitail kin kasawihada pein atail pepehm ong duwen kalohk, kitail kak nda me kitail kin ngoangki pwurehng pwurala rehn aramas koaros me kin ale neitail pwuhk, brochure de makisihn kan? Kitail kin ngoangki tepida onop Paipel rehn aramas akan koaros me kin perenki rong? (Rom 12:11) De kitail anahne kalaudehla atail ineng en pwurehng pwurala rehn aramas akan oh tepida onop Paipel rehrail?

⁴ Pein atail onop Paipel, oh kaukaule iang towehda mihding kan, oh onop sawaspen Paipel kan pahn sewese kitail en kehlail ni pali ngehn oh ale sawas en sapwellimen Koht ngehn sarawi. (Episos 3:​16-​19) Ma kitail pahn wia mehpwukat, e pahn kakehlailihala atail pwoson oh likih Siohwa oh pil kakehlailihala atail limpoak ong aramas teikan. Kitail pahn inengieng padahkiong aramas teikan duwen padahk mehlel, oh met pahn kahrehong kitail en perenki atail kalohk oh pil pweida mwahu nan doadoahk wet. Ei, kitail men tepida pil ekei onop en Paipel rehn aramas akan!

⁵ Onop Paipel Rehn Peneinei Kin Keieu Kesempwal: Pahpa oh nohno Kristian kan me neirail seri kan kin mihmi rehrail anahne keieu kesempwaliki arail koasoandi en onop Paipel rehn neirail seri kan. (Deuderonomi 31:12; Melkahka 148:12, 13; Lepin Padahk 22:6) E pahn mwahu ma pahpa oh nohno kan kak doadoahngki brochure Kupwurki de pwuhken Knowledge de pwuhken Mour Kohkohlahte pwehn sewese neirail seri kan en kaunopada ong arail inoukihong Siohwa arail mour oh papidaisla. Ahpw, ma pahpa oh nohno pehm me e mwahu en doadoahngki pwuhk teikan pwehki anahn de sounpahr en neira seri kan, met pil pahn mwahu. Emen pahpa de nohno me kin onop rehn nah seri me saikinte papidais kak wadek Paipel Study, awa kan oh return visit nin duwen me Atail Doadoahk Ong Wehio en November 2003 nan Koakon en Peidek kasalehda.

⁶ Kamwahuwihala Pein Atail Koasoandi kan: E sansal me kitail kin kamwarek weren tuhke tohto wasa koaros ni ahnsou me kitail kin kihseli pwuhk, brochure oh makisihn kan rehn aramas akan wasa kan me re kin mie. Weren tuhkehn padahk mehlel pwukat me kamwarekdiong pwehl wasa koaros kakete pweida oh wiahla tohnpadahk kapw kan ehu rahn. Ahpw, soumwet men pahn kak nsenamwahu mehlel ma e pahn kalap padokedi weren tuhke kan oh sohte pahn dolungada mehkot, mendahki e kin kesehla ahnsou laud doadoahk nan ah mwetuwel? Uhdahn soh. Eri, e sansal me atail doadoahk en kalohk kin wehwehki me kitail anahne pwurehng pwurala rehn aramas akan me kin perenki rong.

⁷ Ke kin koasoanehdi ahmw ahnsou pwehn kak pwurehng pwurala rehn aramas me kin perenki rong? E pahn mwahu ma kitail pahn pwurehng pwurala rehn aramas koaros me kin perenki rong. Kitail men pwurehng pwurala rehn aramas akan pwehn kak tepiada onop en Paipel rehrail. Ke kin koasoanehdi mwahu ahmw rekord en aramas me kin perenki rong pwehn soandi mwahu oh pil ntingihdi ahnsou dah kan me ke kin tuhwong irail oh ahnsou mwahu ong irail pwe ken pwurehn pwurala rehrail? E pahn mwahu en ntingihdi eden aramaso, iawasa e kin mihmi ie, rahn me ke tepin tuhwong ih, dahme ke kihla, dahme kumwa koasoiapene, oh pil dahme ke men kumwa en koasoiapene ahnsou me ke pahn pwurehng tuhwong ih. Ntingihdi soahng pwukat koaros nan doaropwe ehu oh koasoanehdi mwahu dahme ke ntingihdi pohn noumw doaropwe pwehn kak mie wasa en ntingihdi dahme ke pil pahn nda de wasa me ke pahn koasoi nan brochure ni rahn kohkohdo kan pwehn kak tamataman dahme wiawi ehuehu ahnsou me ke pahn tuhwong tohnihmwo.

⁸ Kasawihada Mwahu Dahme Ke Pahn Nda de Wia Ni Ahmw Pahn Pwurehng Pwurala Rehn Aramas akan: Soahng dah kan me kitail anahne tamataman ni ahnsou me kitail kin pwurehng pwurala rehn aramas akan? (1) Kitail en kasalehong aramaso kadek, limpoak oh ngoangki padahkiong ih duwen padahk mehlel. (2) Koasoia duwen oaralap kan oh peidek kan me e men ese. (3) Ken koasoia soahng kan me pid Paipel oh koasoi ni ahl me sansal oh mengei en wehwehki. (4) Ehu ehu ahnsou me kumwa pahn koasoipene, ken akadeiong padahkiong tohnihmwo mehkot me pahn katapan ong ih. (5) Kihda peidek duwen oaralap me tohnihmwo perenki oh ndaiong ih me ke pahn sapeng peideko ni ahnsou me ke pahn pwurodo. (6) Ken dehr mihmi rehn tohnihmwo nohn werei. (7) Ken dehr wia peidek kan me pahn kasarowehdi tohnihmwo. (8) Doadoahngki ahmw loalokong pwehn dehr mwadang kauwe madamadau sapwung kan me tohnihmw ahneki de mwadang kauwe tiahk suwed kan me tohnihmw kin wia mwohn ke pahn sewese ih en wehwehki oh kalahnganki duwen soahng ngenin kan.​—Menlau tehk insert en Atail Doadoahk Ong Wehio en May 1997 pwehn alehdi pil ekei sawas iaduwen kitail kak pweida mwahu ni ahnsou me kitail pahn pwurehng pwurala rehn aramas akan oh ni ahnsou me kitail pahn onop Paipel rehrail.

⁹ Wia Uwen Me Kitail Kak en Tuhwong oh Kalohk ong Aramas Koaros: Nan mwomwohdiso ehu, irail sounkalohk kan ale eden aramas akan me kin mihmi nan ihmw laud ehu (apartment) me security kin tehk ahnsou koaros (high security) iangahki nempehn arail pere kan me irail kin mihmi loale. Sounkalohk kan ntingihdi kisinlikou kan ong emenemen irail me kin mihmi nan ihmwo, oh pil kihong irail koaros tract riau iangahki kisinlikouo. Ni imwin kisinlikouo, sounkalohko pahn idek rehn tohnihmwo ma e men onop Paipel oh mwurin mwo ntingihdi nempehn telephone me tohnihmwo kak call ma e men onop Paipel. Mwurin rahn kei, ohl pwulopwul men telephonela rehn sounkalohk men oh idek reh ma e kak onop. Mandahn rahno, sounkalohko kohla rehn ohlo oh tepida onop en Paipel ni e doadoahngki pwuhken Knowledge. Ni soutikohte, e iang towehda Pwuhk Study en Mwomwohdiso, oh mwurin mwo, e tepida iang towehda mihding kan koaros. E pil mwadang tepida wadek nah Paipel rahn koaros oh kekeirada mwahu ni pali ngehn pwehn kak papidais ehu rahn.

¹⁰ Ehu rahn, ekei sounkalohk kan doadoahngki sidohsa pwehn pwurehng pwurala rehn ekei aramas me perenki rong. Ni ahnsou me emen sister kohla ni ihmw ehu pwehn pwurehng pwurala rehn lih emen me perenki rong, e diarada me liho sohte mie, ahpw emen lih tohrohr ritingada wenihmwo oh nda: “I awiawih iuk.” Tohnihmwo kasalehda me e ale nah pwuhken Knowledge rahn teio sang aramas emen me e ese. Mwurinte mwo, e wadek nah pwuhken Knowledge pak riau oh inenen perenki dahme e sukuhliki. Liho nda me e sohte pwuriamwei en Sounkadehde kan arail kohdo reh pwehki e kapakapki me Sounkadehdehn Siohwa en kohdo oh onop Paipel reh. Sistero tepida onop rehn liho, oh liho tepida iang towehda mihding kan koaros, oh kekeirada mwadang ni pali ngehn.

¹¹ Emen sister, me papidaislahr kereniong sounpahr 25, ahpwtehn kihong ah nohno nah pwuhken Knowledge. Ah nohno, me kin kalap iang ah sarawi, tepida wadek pwuhko. Mwurin e wadek irelaud riau, e call nah serepeino oh nah serepeino pwuriamweikihla ah nda me: “I men wiahla emen Sounkadehdehn Siohwa!” Liho (ahn sistero nohno) tepida onop Paipel oh mwurin mwo papidaisla.

¹² Song en Doadoahngki Sawas Pwukat: Ke kin song en idek rehn tohnihmwo ma e men onop Paipel? Ke kak nda: “Ma ke men onop Paipel ni sohte isepe, I kak kasalehong komwi iaduwen se kin wia met ni minit keite. Ma ke perenki met, ke kak pousehla.” Aramas tohto kin perenki met, oh irail kin mwadang nda me re men kilang kamwomwada en onop Paipel.

¹³ Mwurin ahmw tepida onop rehn aramaso, ke pahn mwadang kasalehong ih ia mwomwen e pahn kaunopada ong ah onop ni e pahn kilang iren Paipel kan me mihmi nan brochure oh e pil pahn kak lainih lepin lokaia kan me kin sapeng peidek kan. Koasoia duwen ekeite ire kesempwal kan. Mehlel, kitail pahn toupahrek ahpw e kesempwal kitail en kasalehda me aramaso anahne onop Paipel kaukaule pwehn katapan. Medemedewe soangen ahnsou dah me pahn tepida kapakap rehn aramaso ni tepin onop oh imwin onop oh medemedewe iaduwen ke kak sewese aramaso en kaunopada ong aramas me pahn uhwong ih ni ahmw pahn kasalehong ih iren Paipel kan. Ahpw, mehlel, e kesempwal en wiahda onop pwe aramas en perenki!

¹⁴ Mehlel, kaidehn aramas koaros me kin onop Paipel kin kekeirada ni soangen mwekid teieu. Ekei sohte kin mwadang koledi mour en iren Paipel kan oh ire kesempwal kan duwehte ekei. Ekei aramas kin nohn soupisengki arail kedirepw kan oh irail sohte kak onop ehu irelaud pwon ehuehu wihk. Kahrehda, ni ahnsou me kitail kin onop rehn ekei aramas, e pahn mwahu en ekis ekis wia nan irelaud ehute oh kitail anahne onop rehrail nan sounpwong kei pwehn kanekehla brochure pwon. E pahn mwahu en onopki brochure Kupwurki rehn ekei aramas oh mwurin mwo kitail kak pousehla oh wia onop en pwuhken Knowledge de pwuhken Mour Kohkohlahte. Soangen koasoandi wet, iangahki arail iang towehda mihding kan koaros, pahn sewese aramaso en wiahda poahsoan kehlail oh sukuhliki mwahu padahk mehlel.

¹⁵ Ahpw, keieu kesempwal, kitail anahne kapakap oh peki rehn Siohwa en sewese kitail tepida onop Paipel rehn aramas akan! (1 Sohn 3:​22) Dahme kin keieu kesempwal rehn kitail Kristian kan iei me Siohwa pahn doadoahngki kitail en sewese aramas akan en wiahla sapwellimen Sises Krais tohnpadahk kan. (Wiewia 20:35; 1 Kor. 3:​6-9; 1 Dese. 2:8) E kesempwal ahnsou wet en kasalehda me kitail ngoangki onop Paipel rehn aramas akan oh kitail kak likih Siohwa me e pahn kapaiada atail nannanti en tepida onop en Paipel rehn pil ekei aramas!

[Blurb nan Pali 3]

Ke kin kapakap oh peki rehn Siohwa en sewese iuk en tepida onop en Paipel kapw?