En Eimah Pwurehng Pwurala Rehn Aramas Akan

¹ Ke kin perenki pwurehng pwurala rehn aramas akan? Sounkalohk tohto kin perenki met. Mwein nin tepio ke kin ekis salohda ahnsou me ke pwurala rehn aramas akan, keieu ong irail tohnihmw kan me sohte uhdahn perenki rong. Ahpw, pwehki ke nantiong ‘en eimah pwehki Koht kakehlailkitailla pwe kitail en kalohki Rongamwahwo’ nin duwen kitail en pwurala rehn aramas akan, ke pahn pwuriamweiki uwen mengei oh katapan en doadoahk wet. (1 Des. 2:⁠2) Iaduwen?

² Ni mehlel, ahnsou me kitail tepin tuhwong tohnihmwo e weksang ahnsou me kitail kin pwurehng pwurala rehrail. Ahnsou me kitail kin pwurala rehrail, kitail eseiehr aramaso, aramaso sohla wie emen me kapw ong kitail, oh ni mehlel, e mengei en koasoiong emen me kitail ese sang en koasoiong emen me kitail sehse. Uhdahn mie katapan atail en pwurehng pwurala rehn aramas akan pwehki e kak en imwikihla tepiada onop en Paipel rehn aramaso.

³ Ahnsou me kitail kin kohla ihmw-lel-ihmw, kitail kin kohla pak tohto rehn aramas me sohte kin perenki rong. Dahme kahrehda kitail kin kalap pwurala rehrail? Kitail anahne tamataman me irair en mour en aramas kak wukila oh emen me mwomwen sohte nsenohki eh pali ngehn de kin uhwong kitail ni ahnsou me kitail tuhwong ih rahn teio kakete wukila oh ehu rahn e pahn men rong. Pwehki irair pwukat, kitail anahne kaunopada mwahu oh kapakapki sawas sang rehn Siohwa pwe kitail en kak nda mehkot me pahn kahrehda aramas men rong.

⁴ Ma, nan atail doadoahk en kohseli ihmw-lel-ihmw, kitail kin nannanti kalohk ong aramas me sohte kin perenki rong ahnsou me kitail tuhwong irail rahn kan en mwohwe, e soh pahn kamwekid kitail en pwurala rehn aramas akan me uhdahn perenki rong duwen Wehio?​—⁠Wiewia 10:34, 35.

⁵ Pali laud en kitail rahnwet mihmi nan padahk mehlel pwehki emen sounkalohk, ni kanengamah, pwurehng pwurala rehtail. Ma kowe emen, ke kak idek pein uhk, ‘Nin tepio, ahnsou me I ahpwtehn tuhwong sounkalohk men, I kin perenki rong de soh? I mwadang koledi padahk mehlel? De I sohte perenki rong?’ Kitail anahne tamataman me sounkalohk men me pwurala rehtail kin medemedewe me kitail warohng rong padahk mehlel oh pwurala rehtail, oh kasalehda ‘eimah pwehki Koht’ kihong ih kehl en pwurala rehtail, oh padahkiong kitail padahk mehlel. Iaduwen aramas kan me nin tepio kin perenki rong ahpw mwuhr, irail kin rukala de nda me irail nohn kedirepw oh sohte kak rong? Kitail anahne anehki lamalam en ehi, nin duwen eksperiens wet kasakehda.

⁶ Ni ahnsou me sister riemen wia kalohk nanial ehu menseng, ira tuhwong emen lih me uradekih emen seri nan waren seri (stroller). Liho ale nah makasihn oh luhke sister kan en kohla ni imweo Rahn Sarawi mwuri. Ira kohla ni ahnsou me irail koaros koasoanehdi, ahpw liho ndaiong ira me sohte eh ahnsou en koasoi. Ahpw, e inoukihong ira me e pahn kaunopada oh awih ira wihk mwuhri. Sister kan sohte lemeleme me liho pahn kolokol eh inou, ahpw ahnsou me ira pwurala, liho awih ira. Sister kan tepida onop Paipel rehn liho, oh ahn liho kekeirada inenen kapwuriamwei. Sohte pwand, e tepida iang mihding kan kaukaule oh iang kalohk. Met e pepdaisehr.

⁷ Ni Ahnsou Me Ketipin Tuhwong Aramaso, Kaunopada Dahme Ke Pahn Nda Ahnsou Me Ke Pahn Pwurehng Pwurala: Ma ke men pweida ni ahmw pwurala rehn aramas akan, ke anahne kaunopada ahnsou me ke tepin tuhwong aramaso. Rong kanaieng dahme tohnihmw kin nda. Ia mour en eh koasoi? E kin nsenohki soahng ngenin kan? De e kin nsenohki soahng kan me pid aramas? De e kin nsenohki soahng kan me pid saiens? poadoapoad en aramas? irair en sampah? Ni kaimsekalahn ahmw koasoiong tohnihmwo, ke kak idek rehn tohnihmwo ehu peidek me pahn kahrehong ih en medemedewe met oh inoukihong ih me ni ahnsou me ke pahn pwurehng pwurodo reh, ke pahn kihong pasaseng en peideko sang nan Pwuhk Sarawi.

⁸ Karasepe ehu, ma tohnihmw kin perenki rong duwen inou kaselel me mihmi nan Paipel me pid duwen sampah paradais, e pahn konehng en koasoia duwen ireo. Mwohn ke pahn mwesel, ke pahn idek reh, “Iaduwen kitail kak ese ma inou kan en Koht pahn pweida?” Oh kapataiong: “I men pwurodo ahnsou me ahmw peneinei pwon mihmi met oh kasalehda pasepeng ong peidek wet me Paipel kin kihda.”

⁹ Ma tohnihmw sohte kasalehda me e nsenohki oaralap kan me ke kin koasoia, ke kak wia peidek kan me kin pwarada nan pali 8 en Atail Doadoahk Ong Wehio oh doadoahngki peideko pwehn kaunopada ong ahnsou me ke pahn pwurehng pwurala.

¹⁰ Ntingihdi Rekord Pwung en Aramas me Ke Tuhwong: Noumw rekord en ihmw-lel-ihmw anahne pwung oh unsek. Ntingihdi eden aramas oh wasao me e mihmi ie ahnsou me ke kohsang ihmwo. Ke dehr kasarkihte nempehn ihmwo de eden ahl me e kin mihmi ie​—⁠tehk mwahu pwehn kak ntingihdi pwung. Kawehwe ekis duwen aramaso. Ntingihdi dahme kumwa koasoia, iren Paipel ke wadek ong ih, oh peideko me ke ndaiong ih me ke pahn sapengla ahnsou me ke pwurala. Ntingihdi rahn oh kulok depe ke tuhwong ih oh iahd ke ndaiong ih me ke pahn pwurala. Pwehki ahnsou wet me noumw rekord kilelediehe soahng koaros, ke dehr kesehla! Kihdi noumw rekord nan wasa me e sohte pahn salongala de aramas sohte pahn kauwehla de wahsang pwe ken kak pwurehng tehk audepe mwuhr. Medemedewe duwen aramaso oh dahme ke pahn nda ahnsou me ke pahn pwurehng pwurala reh.

¹¹ Tamataman Ahmw Mehn Akadei: Keieu, nin duwen ahmw koasoi oh kasalehda me ke nsenohki ih, wia uwen me ke kak en kahreong ih en meleilei. Kasalehda me ke kin nsenohki ih, ahpw en dehr wia nohn tohto peidek kan duwen pein eh mour. Mwurin mwo, ke pahn katamankin ih duwen peideko me kin kihong ih rahn teio. Rong kanaieng duwen dahme e kin nda, oh ndaiong ih me ke kin inenen kesempwalki dahme e kin medemedewe. Mwurin mwo, kasalehda dahme kahrehda kitail koaros anahne kesempwalki dahme Pwuhk Sarawi kin mahsanih. Ma ke kak, pakalahng ehu wasa nan pwuhken Ke Kak Mour Kohkohlahte Nan Paradais Nin Sampah me kin dokedoke ireo. Tamataman me atail mehn akadei ahnsou me kitail kin pwurala rehn aramas iei en tepida onop en Paipel rehrail.

¹² Audepen pwuhken Mour Kohkohlahte kin kamwekid kitail ‘en eimah’ ni atail kin luhke irail kan me kitail kin onop Paipel rehrail pwe ren iang towehda mihding kan oh miniminiong sapwellimen Siohwa pwihn. Mahso, kitail kin ekis awih lao aramaso onopki Paipel ahnsou werei, kitail ahpw kin luhke ih en iang towehda mihding kan. Ahpw met, aramas tohto me ahpwtehn tepiada onop Paipel kin mwadang tepida iang towehda mihding kan, oh irail wia kekeirada mwadang.

¹³ Pwopwoud ehu kalohk ong emen iengara tohndoadoahk ni ahnsou soh lipilipil. Pwehki e perenki rong, ira idek reh ma e men onopki Paipel oh doadoahngki pwuhken Mour Kohkohlahte. Ni ahnsouohte, ira luhke ih en iang towehda mihding kan, oh ih wasao me peidek tohto me e wia pahn pasapengla ie. Ohlo tepiada onop Paipel rehn pwopwoudo oh pil tepida iang towehda mihding kan kaukaule ni Kingdom Hall.

¹⁴ Doadoahngki Brochure Dahme Koht Kupwurki Kitail en Wia?: Kitail kak doadoahngki brochure Dahme Koht Kupwurki Kitail en Wia? pwehn tepiada onop en Paipel rehn aramas me kin lahn Koht menda ma irail sukuhl laud de soh. E kin dokedoke padahk kan me aramas akan anahne ese sang nan Pwuhk Sarawi. Brochure wet pahn kawehwehda mwahu duwen loalokong en Koht. E kin kasansalehda mwahu padahk mehlel ni ahl mengei pwe kitail sounkalohk koaros kak doadoahngki pwehn padahkiong mehteikan dahme Koht kupwurki kitail en wia. Sounkalohk tohto kak tepida onop en Paipel rehn aramas akan ni arail doadoahngki brochure wet.

¹⁵ Ekei aramas me lemehda me sohte arail ahnsou en onopki pwuhken Mour Kohkohlahte mwein pahn pwungki onopki brochure Kupwurki brochure ni ahnsou mwotomwot. Irail pahn perenki dahme irail pahn sukuhliki! Ni arail pahn onopki iren mehn kasukuhl ehu de riau, irail pahn sukuhliki pasepeng ong peidek kan me aramas tohto pwonopwonki sangete mahs: Ihs Koht? Ihs Tepilo? Ia kupwuren Koht ong sampah? Dahkot Wehin Koht? Iaduwen ke kak diarada kaudok mehlel? Mendahki brochure kin kasansalehda padahk mehlel ni mengei, audepen brochure kin kamwekid aramas. E kin wia ekei peidek kan me elder kan kin idek rehn irail me men pepdais oh kitail kak doadoahngki brochure oh mwurin mwo uhd onopki pwuhken Mour Kohkohlahte.

¹⁶ Pwehn tepida onopki Paipel rehn emen ahnsou me ke pwurala reh, ke kak nda: “Ke kin wehwehki me ke kak sukuhliki pasepeng en ahmw peidek duwen Paipel ni minit kei?” Mwurin mwo, wia peidek ehu me kin pwarada nan iren mehn kasukuhl ehu nan brochure. Karasepe ehu, ma ke pwurala rehn emen mah, ke kak nda: “Kitail wehwehki me Sises kin kamwahuiala aramas mahs. Ahpw, ni ahnsou kohkohdo, dahme Sises pahn wiaiong me soumwahu kan? me mah kan? me mehlahr kan?” Pasepeng kan mihmi nan iren mehn kasukuhl 5. Emen me kin nsenohki soahng ngehnin kan pahn perenki sukuhliki pasepeng en peidek wet: “Koht kin karonge kapakap koaros?” Pasepeng mihmi nan iren mehn kasukuhl 7. Irail tohnpeneinei pahn men ese duwen peidek wet: “Dahme Koht kupwurki pahpa oh nohno kan oh pil seri kan en wia?” Irail kak sukuhliki nan iren mehn kasukuhl 8. Iet ekei peidek mwahu teikan: “Mehlahr akan kak lidere irail akan me memour?”​—⁠pasepeng mihmi nan iren mehn kasukuhl 11; “Dahme kahrehda pelien lamalam tohto kose dene irail Kristian akan?”​—⁠pasepeng mihmi nan iren mehn kasukuhl 13; oh “Dahme ke anahne wia pwen wiahla koampoakepahn Koht?”​—⁠pasepeng mihmi nan iren mehn kasukuhl 16.

¹⁷ Sewese Irail me Kin Doadoahngki Ehu Lokaia Tohrohr Sang Met: Iaduwen tohnihmw kan me kin doadoahngki ehu lokaia tohrohr sang met? Ma kak, e keieu mwahu en kasukuhlih irail ni lokaia me irail keieu wehwehki. (1 Kor. 14:⁠9) Brother me kin apwalih kahnihmw ehu (city overseer) [de nan wasa kan me sohte city overseer: sounapwalih en circuit] pahn ese duwen mwomwohdiso kan de pwihn kan me kin lokaiaki lokaiahn aramaso me ke tuhwong. Secretary en mwomwohdiso pahn kadarala doaropwe adaneki Foreign Language Follow-up Slip (S-70a) sang irail tohn pein eh mwomwohdiso ong mwomwohdiso de pwihn me konehng. Ma sohte mwomwohdiso de pwihn me kin doadoahngki lokaiahn aramaso me ke tuhwong oh sohte emen me ke ese me kin doadoahngki lokaiao, ke kak onop rehn tohnihmwo oh doadoahngki brochure Kupwurki ni ahmw lokaia oh eh lokaia.

¹⁸ Emen sounkalohk me kin doadoahngki lokaiahn wai tepida onop Paipel rehn pwopwoud ehu, ohlo kin lokaiahki lokaiahn Vietnam oh liho kin lokaiahki lokaiahn Thailand. Edetehn lokaiapene inenen apwal nin tepio, sounkalohko ntingihdi: “En pwopwoudo kekeirada inenen mwadang. Ira kilang kesempwalpen en iang neira seri riemeno towehda mihding kan, oh irail koaros kin wadekpene Pwuhk Sarawi pwong koaros. Neira serepein me sounpahr weneu kin anehki ehu onop en Paipel rehn emen.”

¹⁹ Ahnsou me ke kin onopki Paipel rehn emen me kin doadoahngki lokaia tohrohr sang ahmw lokaia, ke anahne lokaia wawai, nda lepin lokaia kan ni sansal oh doadoahngki lepin lokaia mengei kan. Tamanda en wahuneki aramas kan me kin doadoahngki pil ehu lokaia tohrohr. Ken dehr mwamwahliki irail oh wiahkin irail duwehte kisin seri kan.

²⁰ Doadoahngki mwahu kilel kaselel kan me mihmi nan brochure Kupwurki. Mie lepin kahs en Wai ehu me kin nda “kilel ehu kin kesempwalsang lepin lokaia kid,” oh met kin mehlel pwehki ahnsou kitail kin doadoahngki kilel kan en koasoiong aramas, aramas kin wehwehki laud. Luhke ih en wadek iren Pwuhk Sarawi kan nan pein nah Pwuhk Sarawi. Ma onop en Paipel kin wiawi ahnsou me emen me kin wehwehki lokaian wai mihmi wasao pwehn kawehwe, eri met pahn mwahu.​—⁠Kilang Atail Doadoahk Ong Wehio (lokaiahn wai), October 1990, pali 7-8; March 1984, pali 8.

²¹ En Mwadang Pwurehng Pwurala Rehn Aramas Akan: Ia uwen werei ke pahn awih lao ke pahn pwurala rehn aramas akan? Ekei sounkalohk kan kin pwurala rahn ehu de riau mwuhri. Ekei kin pwurala rahnohte! E nohn mwadang? Pali laud en tohnihmw kan kin perenki ma sounkalohk kan kin mwadang pwurala. Pali laud en ahnsou, sounkalohk kan anahne kekeirada arail lamalam en ehi iangahki eimah. Iet ekei eksperiens kan.

²² Emen pwutak sounkalohk me mahki sounpahr 13 kalohk ihmw-lel-ihmw ehu rahn ni ahnsou me e kilangda lih riemen alialu nanial. E tamanda mehn kangoang me kitail en kalohk ahnsou koaros oh tuhwong aramas wasa kan me kitail kak diarada irail, ih eri tuhwong lih riemeno. Ira perenki rong oh ira koaros ale neira pwuhken Mour Kohkohlahte. Pwutak menet ntingihdi iawasa ira kin mihmi ie, oh e pwurala rehra rahn riau mwuhro, oh tepida onop Paipel rehra.

²³ Emen sister kin koasoanehdi rehn tohnihmw me e tepin tuhwong me e pahn pwurehng pwurala reh wihk kohkohdo. Ahpw rahn ehu de riau mwuhro, e kin pwurala rehn tohnihmwo oh kihong ih makasihn ehu me kin pid oaralapo me ira koasoia. E ndaiong tohnihmwo: “I kilang artikel wet oh I lemeleme ke men wadek artikelo. I sohte kak koasoi ahnsouwet, ahpw I pahn pwurodo mwurin souwas en Ni Esil nin duwen me kita koasoanehdier. Mwurin souwas en Ni Esil mwahute rehmw?”

²⁴ Ahnsou me emen kin perenki rong padahk mehlel, kitail wehwehki me e pahn lelong uhwong. Ni atail kin mwadang pwurala rehn aramaso e pahn kakehlail ih en powehdi uhwong kan me pahn lelong ih sang rehn peneinei, kompoakepah kan oh mehteikan.

²⁵ Pwurala Rehn Aramas Akan me Ke Tuhwong Nan Wasahn Wehi Pokon: Tohtohn kitail kin perenki kalohk nanial, ni wasa kan me sidohsa kan kin peidi, nan taxi oh bus kan, ni wasa kan me aramas kin netinet ie, oh ni wasahn mwemweit kan. Likin kihdi makasihn, brochure oh pwuhk kan, kitail anahne pwurala rehn aramas akan me kitail kin tuhwong. Ihme kahrehda, kitail anahne ntingihdi eden aramaso, iawasa e kin mihmi ie oh ma kak, nempehn telephone en irail me kitail kin tuhwong. E sohte apwal en idek rehn aramaso soahng pwukat. Ni kaimseklahn amwa koasoipene, kihsang doaropwe oh pen nan ahmw kopwou oh idek reh: “Kita kak pousehla ata koasoipene ehu rahn?” De nda: “I mwahuki ken wadek artikel ehu me I ese me ke pahn perenki. I kak wahla artikel wet rehmw ni imwomw de ni ahmw ohpis?” Emen brother kin idek rehn aramaso: “Ia ahmw nempehn telephone?” E nda me mwurin sounpwong siluh, koaros kihong ih arail nempehn telephone, ihte aramas silimen me sohte kihong ih

²⁶ Doadoahngki Telephone en Rapahki oh Pwurala Rehn Aramas Akan: Emen sister me kin pioneer kin doadoahngki telephone pwehn rapahki aramas me kin mihmi nan ihmw kan me apwal en pidelong pwehki perepe tohto. E kin pil doadoahngki telephone en pwurehng koasoiong aramas akan. Ni eh tepin koasoiong aramas nan telephone, e kin nda: “I ese me ke sehse ie. I men koasoiong aramas akan nan ahmw wasa pwe I men ehukihong kumwail iren Paipel ehu. Ma mie ekis ahmw ahnsou, I men wadek inou ehu me ntingihdi nan Paipel nan . . . ” Mwurin e kin wadek iren Paipelo e koasoia, “E soh pahn kaperen ma kitail kak kilang inou pwukat pweida? I perenki wadek ong uhk ireo. Ma ke pil perenki, I men pwurehng eker uhk oh koasoia pil ehu iren Paipel.”

²⁷ Ni eh kin pwurehng dengwa, e kin katamankin tohnihmwo duwen ara koasoipene rahn teio oh e padahkiong tohnihmwo me e men wadek dahme Pwuhk Sarawi mahsanih duwen ahnsowo me soahng suwed koaros pahn kohsang pohn sampah. Mwurin mwo e koasoia duwen iren Paipelo oh kawehwehpe. Sang ahnsou me e tepida dengwa aramas ni telephone lel met, aramas 35 me luhke ih en tuhwong irail ni imwarail kan oh e tepida onop Paipel rehn me isimen! Ekei pak e kin apwal en pwurala rehn aramas pwehki ansoun kopou, de e keper en kohkohseli, de soumwahu? Ma iei, dahme ke soh doadoahngki telephone en tuhwong aramas akan?

²⁸ Pwurala Rehn Aramas Akan Nan Wasahn Pisnis: En kalohk sang sidohwa-lel-sidohwa kaidehn ihte doadoahk en kihseli makasihn kan. Ekei tohnsidohwa kan kin perenki rong padahk mehlel, oh ihme kahrehda kitail anahne sewese irail ni ahl wet. Ekei pak, kitail kak koasoipene Paipel de pil onopki Paipel nan sidohwaohte. Ma soh, ke kak tuhwong ih ehu wasa ni ahnsou me e kin mwengehn souwas de pil ehu ahnsou me mwahu ong ih.

²⁹ Emen soundoulik tuhwong emen me anehki sidohwa en mwenge tikitik oh brothero idek rehn ohlo ma e kak wia kisin kamwomwada duwen onopki Paipel. Ahnsou me ohlo idek rehn brothero ia uwen werei kamwomwadao, brothero nda me ihte e pahn wia ni minit 15te. Ni ahnsouohte, ohlo kalangada doaropwe ehu ni wehnimwo me ntingihdi: “I pahn pwurodo mwurin minit 20,” oh ih eri koasoanehdi sehr riau oh ira koaros mwondi oh koasoipene keieun parakrap limau nan pwuhken Knowledge That Leads to Everlasting Life. Ohl menet inenen perenki ara onop me e iang mihding Rahn Sarawi mwuri (Kapahrek en Wehi Pokon oh Onop en Watchtower) oh koasoanehdi en pwurehng onop wihk mwuri.

³⁰ Ma ke men tepida onop en Paipel rehn aramas me kin mihmi nan arail wasahn pisnis, ke kak nda: “Aht wia kamwomwada onop en Paipel pahn reireiki minit 15te. Ma ke kak rong aht kamwomwada met, I pahn perenki wia.” Mwurin mwo ke pahn kileledi minit 15 pwehn dehr daulih minit ko. Ma e apwal en koasoiong aramaso nan eh wasahn pisnis, e pahn mwahu en kohla reh ni imweo.

³¹ Pwurala Rehn Aramas Akan Mendahki Irail Sohte Kin Ale Neirail Doaropwe, Makasihn, Brochure, de Pwuhk: E kesempwal en tamataman me menda ma aramaso uhdahn perenki rong de ekis perenki rong, kitail anahne en pwurala rehn koaros me kin perenki rong. Ahpw mehlel, ma tohnihmwo sohte perenki rong, kitail sohte anahne kesehla atail ahnsou en pwurala rehn aramas pwukat.

³² Emen sister, ahnsou me e iang doadoahk en ihmw-lel-ihmw, tuhwong emen lih me perenki koasoiong ih ahpw e sohte men ale nah makasihn kan. Sister menet ntingihdi, “Erein rahn kei, I medemedewe duwen liho oh pilada me I uhdahn pahn pwurala reh.” Eri, sistero kapakap, oh nantiong en anehki lamalam en eimah, oh letilet ni wehnimwen imwen liho. E inenen pwuriamwei pwe liho padahkiong ih en pidelong nan imweo. E tepida onopki Paipel rehn liho oh sistero pil pwurala rahnohte oh pwurehng onop rehn liho. Mwurin mwo, liho pidelong nan padahk mehlel.

³³ Kaunopada Mwahu Pwehn Wia Uwen Me Kitail Kak en Sewese Aramas Akan: E pahn mwahu ma kitail koasoanehdi atail ahnsou en pwurala rehn aramas akan ehu ehu wihk. E kesempwal en kaunopada mwahu. Koasoanehdi ihs me ke men pwurala rehrail ahnsou me ke kohla ihmw-lel-ihmw. Ma kumwail doadoahngki sidohsa, me iang sidohsa pahn malaulau pwe koaros en kak pwurala rehn aramas akan me irail tuhwong. E pahn mwahu ma koaros tohnsidohsa pahn kehsehki drivero iawasa irail men pwurehng pwurala rehn aramas akan pwehn ren dehr tangatangseli mwahl.

³⁴ Irail me kin pweida ni arail kin pwurala rehn aramas akan oh tepida onopki Paipel rehrail kin nda me mehkot inenen kesempwal iei en nsenohki aramas oh medemedewe irail pil mwurin amwa tuhpene. E pil kesempwal en doadoahngki oaralap ehu me tohnihmwo kin perenki rong oh kaunopada dahme kumwa pahn koasoia ni kaimwseklahn amwa koasoipene. Oh pil, e kesempwal en pwurala rehrail mwadang. Tamatamante ahnsou koaros me atail mehn akadei iei en tepida onopki Paipel rehn aramas akan.

³⁵ Irair ehu me kitail anahne pwehn kak pweida ni atail pwurehng pwurala rehn aramas iei eimah. Iaduwen kitail pahn anehki eimah? Wahnpoaron Pohl sapengla met ni eh mahsanih me kitail ‘en eimah’ en kalohki rongamwahu ong mehteikan pwehki “atail Koht ketin kakehlailkitailla.” Ma ke anahne kekeirada ni irair wet, kapakap ong Siohwa oh peki sawas reh. Mwurin mwo, ke pahn nannanti en pwurala rehn aramas koaros me kin perenki rong. Siohwa pahn uhdahn kapaiada atail nannanti oh eimah!

[Koakon nan pali 3]

Iaduwen Kitail Kak Pweida Mwahu ni Atail Kin Pwurala Rehn Aramas Akan

■ Kasalehda me ke kin nsenohki aramas.

■ Pilada oaralap ehu me tohnihmwo pahn perenki rong.

■ Kaunopada mwahu ong ahnsou me ke pahn pwurala reh.

■ Medemedewe tohnihmwo mwurinte amwa koasoipene.

■ Pwurala reh rahn ehu de riau mwurin amwa tuhpene.

■ Tamatamante atail mehn akadei iei en tepida onopki Paipel rehn aramas akan.

■ Kapakapki sawas pwehn eimah ni ahmw pwurala rehn aramas akan.