Likih Siohwa Pwe Ih Me Kin Ketin Kakeirada Soahng Koaros
1 “Edin I pehm soangen peren me kin kohsang sewese koasoanehdi mwomwohdiso kapw. Ihme erein sounpahr riau I doadoahk laud, kapakap ahnsou koaros oh likih Siohwa pwe Ih me kin ‘kakeirada soahng koaros.’ ” Ihme pioneer men ntingihdi pwehki e sukuhliki uwen atail anahne likih Siohwa pwe Ih me kin kekeirada soahng koaros. (1 Kor. 3:5-9) Ni atail kin rapahki aramas me kin nsenohki arail pali ngehn, kitail pil anahne Siohwa en sewese kitail ma kitail mwahuki atail kalohk en pweida.—Lepin Padahk 3:5, 6.
2 Kalamwur Pahn Sewese Kakeirada: Ma werentuhken padahk mehlel pahn kakeirada, kitail anahne kalamwure. Ma kitail pwurehng pwurala rehn aramas rahn ehu de riau mwurin atail tepin tuhwong ih, e kak imwila mwahu. Kitail anahne kasalehda irair en kadek ong aramaso. Wia soahng kan me pahn kahrehda aramaso sohte pahn saloh. Ke dehpa koasoakoasoi ahnsou koaros. Mweidong tohnihmw en koasoi oh oh wia peidek pwehn esehla kowe, oh kasalehda me ke kin nsenohki ih.
3 Erein August oh pil nan September, kitail kak nannanti en kihla soangen brochure kan koaros ong aramas akan. Oh pil, kitail anahne pwurehng pwurala rehn aramas akan me kin perenki rong oh rehn irail kan me ale neitail pwuhk kan. Kitail wia met ni atail kin pwurehng pwurala rehn aramas akan oh tepida onop en Paipel rehrail. (Madiu 28:19, 20) Ihme kitail kak doadoahngki brochure Kupwurki en tepiada onop en Paipel rehrail. Ke kak ale sawas sang mehn sawas kan me ntingihdi wasaht.
4 Ma ke koasoiong emen me nsensuwedki susuwedlahn sampah, ke kak nda:
◼ “I kamehlele me komwi, duwehte ngehi, kin nsensuwedki susuwedlahn tiahk en sampah. Kitail kin rong nuhs en pei me kin wiawi nanpwungen pwopwoud, oh kin imwikihla tiahk suwedih seri kan, pahpa oh nohno kan, oh arail pwoud kan. Aramas tohto kin likamw oh pirap pwehn kapwaiada nsenarail. Ke lemeleme e katapan ong Koht iaduwen aramas mourki arail mour? [Mweidong en sapeng.] Koht koasoanehdi kosonned kan ong mour en aramas, oh kosonned pwukat sohte kin nohn toutou ong kitail.” Wadek 1 Sohn 5:3. Kasalehda brochure Kupwurki, oh pakalahng iren mehn kasukuhl 10. Wadek keieun parakrap. Mwurin mwo, wadek nting pinipin ni tepin parakrap 2 lel 6, oh idek rehn tohnihmwo mehnia tiahk me kin keieu kawehla mour en aramas. Wadek parakrap me pid duwen tiahk me tohnihmwo pilada oh wadek iren Pwuhk Sarawi ehu de riau ma kak. Ni kaimseklahn amwa koasoipene, ke kak wadek parakrap 7, oh mwurin mwo, ke kak koasoanehdi ahnsou me kumwa kak pwurehng tuhpene oh pousehla.
5 Ma ke koasoiong emen me kin nsenohki mour en peneinei, ke kak nda:
◼ “Ke lemeleme me kitail kak kasikasik me atail Sounkapikada pahn kihong kitail dahme kitail anahne pwehn wiahda mour en peneinei me pahn pweida?” Mweidong en sapeng. Kasalehda brochure Kupwurki, oh pakalahng iren mehn kasukuhl 8, oh kawehwehda me kaweid ong tohnpeneinei koaros mihmi loale. Ndaiong tohnihmwo me ke men kamwomwada iaduwen e kak doadoahngki brochure oh Pwuhk Sarawi pwehn paiekihda sang koaros. Idawehn kaweid me ntingihdi ni pali 2 en brochure. Koasoanehdi iahd ke pahn pwurehng pwurala rehn tohnihmwo pwehn pousehla onopki iren mehn kasukuhl 8, oh ma kumwa kanokehla iren mehn kasukuhl 8, mweidong tohnihmw en pilada pil ehu iren mehn kasukuhl me e men sukuhliki oh kumwa wia met.
6 Ma ke men tepida onop en Paipel rehn tohnihmwo ahnsou me kumwa tepin tuhpene, ke kak kasalehda brochure “Kupwurki” oh nda:
◼ “Brochure wet kin sewese emen en onopki Paipel oh kin pil kihda tepin padahk kan en Paipel. Iren mehn kasukuhl koaros kin kihda peidek kan me aramas pwonopwonki kin sangete mahs. Karasepe ehu, Ia kupwuren Koht ong sampah?” Pakalahng iren mehn kasukuhl 5, oh wadek peidek kan ni tepin iren mehn kasukuhlo. Idek rehn tohnihmwo mehnia peidek e keieu men ese. Wadek parakrap me pid peidek me e pilada oh wadek iren Paipel kan me mihmi nan parakrapo. Kawehwehda me pasepeng en peidek teikan pil kak diarekda mengei nan parakrap kan duwehte pasepeng me kumwa apwtehn rapahkihda. Padahkiong ih me ke men pwurehng pwurala reh pwehn wia pil ehu peidek oh rapahkihda pasepeng en peideko.
7 Ke kak wia padahk mengei pwehn tepida onop en Paipel oh ke kak nda:
◼ “Ke kin ese me, erein minit kei, ke kak diarada pasepeng en peidek en Paipel kesempwal ehu? Karasepe ehu, . . .” Ke pahn nda peidek ehu me kin pwarada ni tepin iren mehn kasukuhl ehu nan brochure, peidek ehu me ke lemeleme tohnihmwo men ese pasepengpen peideko. Ma ke men ale sawas ong mehnia peidek kan ke kak doadoahngki, tehk parakrap 15 oh 16 nan Atail Doadoahk Ong Wehio en May 1997 pahnangin oaralap: “En Eimah Pwurehng Pwurala Rehn Aramas Akan.”
8 Ma kitail kin alehda atail pwukoah oh perenki pwurehng pwurala rehn aramas akan oh tepida onop en Paipel rehrail, met kin kasalehda me kitail men wiahla “tohndoadoahk kei me kin iang Koht.” (1 Kor. 3:9) Ma kitail kin doadoahk laud oh nantiong pwurehng pwurala rehn aramas me kin perenki rong oh kin likih Siohwa pwe Ih en ketin kakeirada soahng pwukat koaros, kitail pahn pehm soangen peren me sohte kak kohsang ehu doadoahk likin doadoahk en katohnpadahk.