Ke Kin Doadoahngki Kupwurki Brochure Pwehn Tepida Onop en Paipel Rehn Aramas akan?
1 Ke wehwehki me: ma ke kaukaule koasoiong aramas emen duwen Paipel, mendahki amwa koasoipene kin mwotomwot, oh ke doadoahngki pwuhk ehu de brochure ehu, eri met kin wehwehki me ke wia onop en Paipel rehn aramaso? Ei, met mehlel: sohte lipilipil ma ke koasoiong aramaso ni imwarail de doadoahngki telephone: mehpwukat koaros wehwehki me ke onop Paipel rehn aramaso. Dahme ke soh nantihong tepida onop Paipel rehn aramas akan ni ahmw doadoahngki Kupwurki brochure nan sounpwong en May oh June?
2 Kaunopada Pwehn Kak Pweida Mwahu: Ni ahnsou me ke doadoahngki Kupwurki brochure, koasoanehdi nan ahmw madamadau dahme ke pahn koasoia sang brochure wet. Ma ke pahn pwurala rehn aramas emen me perenki rong, e pahn mwahu ma ke kak medemedewe dahme kumwa koasoipene ahnsou me ke tepin tuhwong ih. Idek rehmw peidek pwukat: ‘Mehnia parakrap kan nan Kupwurki brochure me I kak doadoahngki pwehn kak tepida onop Paipel rehn aramas akan?’ Ma ke kalohk ihmw lel ihmw, mehnia oaralap ke kak koasoia me pahn kahrehong emen pwulopwul, me mah kan, ohl akan oh lih akan en rong. Kousapahlih oaralap kan nan brochure, oh pilada mehnia oaralap me ke lemeleme tohnihmw pahn perenki rong. Mwurin ahmw pilada dahme ke pahn koasoia, ke kak praktis pak tohto. Met ehu ahl me kak sewese iuk en pweida mwahu nan kalohk.
3 Nan insert en Atail Doadoahk Ong Wehio en January 2002 kin kasalehda padahk waluh pahnangin oaralap me koasoia: “Ekei Padahk kan Ke Kak Doadoahngki Ong Kihla Kupwurki Brochure.” Koakon me oaralap koasoia “Padahk me Ke Pahn Tepida Onop Paipel Rahno” kin pil kasalehda iaduwen kitail kak doadoahngki brochure en tepida onop Paipel rehn aramas akan. Ke kak kawekila keieun padahko duwehte met:
◼ “Ke wehwehki me, erein minit keite, ke kak diar pasapengpen peidek kesempwal ehu me ke ahneki duwen Paipel? Karasepe ieu, dahme kahrehda pelien lamalam tohto kin nda me irail Kristian? Mie pak me ke medemedewe duwen peidek wet?” Mwurin aramaso sapeng, pahkalahng Iren Mehn Kasukuhl 13 oh koasoia keieu oh keriaun parakrap ko. Ma mie ahnsou, wadek oh koasoia iren Paipel ehu de riau. Mwurin mwo, wadek kaimwiseklahn peidek me mihmi wasao oh nda: “Iren Mehn Kasukuhl wet pahn pil koasoia kilel limau me kin kasalehda iaduwen kitail kak diarada kaudok mehlel. I men pwurodo oh koasoia wasao nan brochure.”
4 Nannanti: Ken doadoahngki ahmw ahnsou mwahu koaros pwehn wiahda kamwomwada ong aramas akan pwehn kasalehda iaduwen kitail kin doadoahngki Kupwurki brochure pwehn tepida onop Paipel rehn aramas akan. Ken kapakap pwehn peki rehn Siohwa en kapaiada ahmw doadoahk. (Madiu 21:22) Ma ke pahn nantihong, ke pahn ahneki soangen peren me kin kohsang sewese aramas en mwekidki Rongamwahu!