Sewese Irail Me Sohkoahiek kan en Wehwehkihla
1 Ni atail kin iang doadoahk en katohnpadahk, kitail kin sewese mehteikan en sukuhliki dahme Koht kupwurki irail en wia. (Madiu 28:19, 20) Daulih Sounkadehde limerar wie doadoahk laud wet pwehn sewese mehteikan ni ahl wet. Me keieu kesempwal kaidehn uwen tohtohn awa kan de uwen tohtohn brochure kan me kitail kihdi de uwen tohtohn aramas me tepida onopki Paipel. Ahpw ma aramas wehwehki oh mwekidki dahme irail sukuhliki, ih met me keieu kesempwal.
2 Ma kitail men sewese mehteikan ni pali ngehn, kitail anahne sewese “me sohkoahiek kan en wehwehkihla.” (Mel. 119:130) Mongiong en aramas pahn mwekidki dahme irail sukuhliki ihte ma irail kin “dehdehki mwahu.” (Madiu 15:10) Ni atail doadoahk kin laudla, kitail anahne wehwehki duwen kesempwalpen koasoi oh padahk ni ahl mengei. Ihme kahrehda Society wiahda brochure me adaneki Dahme Koht Kupwurki Kitail en Wia? E audaudki mehn kasukuhl kan me mengei en wehwehki oh kin dokedoke tepin padahk kan nan Paipel. Mehn kasukuhl kan kin mwotomwot, lepin lokaia kan mengei, oh padahk kan loale kin mengei en wehwehki, ihme tohto kin men naineki brochure kapwet oh wadek.
3 Kitail pahn kihla brochure wet iangahki makasihn kan nan sounpwong en May oh June. E pahn mwahu ma ke pahn koasoanehdi en kihla makasihn kan Rahn Kaunop oh Rahn Sarawi oh kihla brochure sang Ni Ehd lel Ni Alim. Idek rehn aramas me kin kalap ale neitail makasihn oh pwuhk kan ma irail men naineki brochure kapw. Tamataman me ke kak doadoahngki brochure ahnsou me ke padahkiong seri kan, oh padahki irail kan me sohte nohn wehwehki lokaiahn Pohnpei, oh pil irail kan me sohte nohn ese wadawad.
4 Doadoahngki Padahk Mengei: Ni ahnsou me ke wia padahk sang brochure Kupwurki, pakalahng pali 2 me kawehwehda me “brochure wet wiawihda pwehn kak kadoadoahk ong wia onop Paipel.” Mwurin mwo, kasalehda parakrap 3 ni pali 3 pwehn kasalehda dahme kahrehda tohnihmwo anahne onopki Paipel. Kasalehda ekei oaralap kan me pahn kahreong ih en men wadek oh wehwehki padahk mengei kan nan Paipel me mengei. Kasalehda iaduwen tohnihmwo pahn perenki sukuhliki Paipel nin duwen eh doadoahngki brochure, oh ndaiong tohnihmwo me ke pahn perenki sewese ih ni ahl wet.
5 Wia Onop en Paipel me pahn Kekeirada: Atail mehn akadei kaidehn ihte en onop Paipel rehn aramas akan—kitail men wiahda tohnpadahk kan me pahn kehlail pwehn utungada kaudok mehlel. Ke kak onopki brochure rehn tohnihmwo oh kanokehla onop wet erein wihk kei oh mwurin mwo, ke kak tepida onopkiong pwuhken Mour Kohkohlahte. Sang nin tepio, ke pahn sewese tohnihmwo en wehwehki ihs sapwellimen Siohwa pwihn. (Kilang pwuhken Reasoning, pali 283-284.) Kasalehda kesempwalpen mihding kan, oh kawehwehda me iang towehda mihding kan kin sewese kitail en wehwehkihla iaduwen kitail kak kaudokiong Koht ni ahl me pwung.—Ipru 10:24, 25.
6 Iang doadoahk tohrohr wet nan May oh June pahn wahdo peren pwehki kitail sewese aramas mehlel kan en “alehda kupwurokong” me pahn kaluwalahng mour soutuk.—Lepin Padahk 4:5.