Aramas Wie Tohtohla
1 Duwehte me wiawi nan keieun senturi, kekeiradahn mwomwohdiso en Kristian me wiawi rahnwet inenen laud mehlel. (Wiewia 2:41; 4:4) Pahr me ahpwtehn nek, tohnpadahk kapw kan me 366,579 pepdaisla, wehwehki me uwen me tohto aramas dauli 1,000 ehu ehu rahn! Aramas dauli rar me pepdaisla nan pahr siluh kan me ahpwtehn nek. E sansal me Siohwa kin katohtohla irail kan me kamehlele Ih.—Wiewia 5:14.
2 Irail me kapw kan, me ahpwtehn pepdaisla, oh saikinte ahnla mour en Kristian anahne sawas sang irail me kehlail ni pali ngehn. (Rom 15:1) Kisehn irail Kristian en mahs ko iei irail me, mendahki irail pepdaislahr wereila, irail saikinte “doulahng ni mehkan me unsek duwen Krais.” (Ipru 5:12; 6:1) Ihme kahrehda, nan nah kisin likou ong mehn Ipru kan, Pohl kasansalehda wasa kan me Kristian kan anahne mahla ie ni pali ngehn. Ia wasa pwukat, oh iaduwen mehn sawas kan kak kohwong irail kan me anahne?
3 Sukuhliki Wie Onop Mwahu: Nin duwen kaweid me Pohl kihda, ma emen men wiahla tohnsukuhl mwahu men, e anahne sukuhliki mehkot, kousapahlih dahme e sukuhliki, oh doadoahngki “mwenge kekeluwak” me sapwellimen Siohwa pwihn sansal kin kihda. (Ipru 5:13, 14; kilang August 15, 1993 Watchtower ni lokaian wai, pali 12-17.) Nin duwen ke kin koasoiaiong irail me kapw kan duwen soahng ngehnin kan oh kasalehda ire kapw kan me ke sukuhliki sang pein ahmw onop, ke kak sewese irail en pil men wia pein arail onop mwahu. Mwein ekei pak ke kak luhke emen me kapw en iang uhk wia pein ahmw onop de onop en peneinei.
4 Iang Mihding Kan Kaukaule: Ahmw wia mehn kalemeng mwahu oh lokaia kangoang kin sewese irail kapw kan nan mwomwohdiso en dehr wia mehkot me Pohl pil koasoia—tokedihsang atail tiahk en pokonpene. (Ipru 10:24, 25) Sewese irail en wehwehki me mihding kan iei ahl kesempwal ieu pwehn kekeirada ni pali ngehn. Kasamwo irail pwe ren kak pehm me irail kisehn riatail kan.
5 Kapakap Ni Saledek: Pwehn powehdi atail luwet kan ni paliwar oh pali en pepehm, kitail anahne peki sawas sang Siohwa ni kapakap, kasalehiong ih atail madamadau loal kan oh pwunod kan. Me kapw kan anahne wehwehki me ma irail pahn peki sawas sang Siohwa, irail sohte pahn sapwungala. (Ipru 4:15, 16; 10:22) Ni ahmw kin kasalehda iaduwen kapakap kin sewese iuk pahn kakehlail irail me kapw kan pwe ren wehwehki me Siohwa kin karonge kapakap kan me kin kohsang mongiongatail.
6 Koasoanehdi Ahmw Ahnsou Ong Kalohk: Pohl kasalehda me ni ahnsou me kitail kin “wiahiong Koht atail tungoal meirong en kaping rehn Sises,” e kin wia mehn kakehl ni pali ngehn. (Ipru 13:15) Ke kak luhke sounkalohk kapw men en iang uhk nan kalohk? Mwein kumwa koaros kak kaunopada amwa padahk kan oh koasoiada ehu ahl en kalohk me sounkalohk kapwo saikinte wia.
7 Ni en aramas wie tohtohla e kin kihong kitail peren laud. Ni atail kin sewese kakoahiukiela oh kaweid irail me kapw kan nan mwomwohdiso e pahn sewese irail en kakehlailla arail pwoson me pahn wahdo ‘kamourparail.’—Ipru 3:12, 13; 10:39.