IREN ONOP 35
Doulahte “Kangkakehlailih Emenemen”
“Kumwail kangkangoange oh kangkakehlailih emenemen nin duwen me kumwail kin wiewia.”—1 DES. 5:11.
KOUL 90 Kangoange Emenemen
AUDEPEN ONOPa
1. Nin duwen me 1 Deselonika 5:11 mahsanih, doadoahk dahieu me kitail koaros kin iang wia?
MIE pak me omw mwomwohdisou kauwada de onohnsapahlih Wasahn Kaudok ehu? Ma ei, ele ke tamatamante tepin mihting me kumwail wia nan Wasahn Kaudok kapwo. Ke uhdahn kalahngankihong Siohwa. Ni mehlel, mwein ke uhdahn peren me kahrehda ke kereniong sengiseng oh sohla kak koulki mwahu tepin koulo. Atail Wasahn Kaudok kan me kokouda mwahu kin wahdo kaping ong Siohwa. Ahpw kitail kak kalaudehla atail kapinga ih ni atail wia soangen doadoahk ehu me duwehte kauwada ihmw. Doadoahk wet pidada mehkot me kesempwalsang uhdahn ihmw kan. E pidada aramas akan me kin kohla ni wasahn kaudok pwukat. Wahnpoaron Pohl doadoahngki lepin lokaia ehu me pil kak wehwehki “kauwada” pwehn kasalehda madamadau en kakehlailihada emenemen, nin duwen me sansalda nan 1 Deselonika 5:11 me iren onop wet poahsoankihda.—Wadek.
2. Dahme kitail pahn koasoiapene nan iren onop wet?
2 Wahnpoaron Pohl wia mehn kahlemeng mwahu en emen me ese ia duwen eh pahn kakehlailihada rie Kristian kan. E kin wehwehki arail pepehm. Nan iren onop wet, kitail pahn koasoiapene ia duwen eh sewese rie Kristian kan en (1) dadaurete pahn kahpwal kan, (2) ahneki popohl rehn emenemen, oh (3) kakehlakahda arail pwoson Siohwa. Kitail pahn kilang ia duwen atail pahn kahlemengih ih oh kangoange riatail Kristian kan rahnwet.—1 Kor. 11:1.
POHL SEWESE RIE KRISTIAN KAN EN DADAUR PAHN KAHPWAL
3. Madamadau toupahrek dah me Pohl ahneki?
3 Pohl uhdahn poakohng rie Kristian kan. Pein ih pil lelohng kahpwal kan, eri e kak poakehla oh wehwehki pepehm en rie kan ni arail lelohng kahpwal kan. Ehu pak, sohla nein Pohl mwohni oh e anahne rapahki doadoahk pwehn apwalih ih oh ienge ko. (Wiewia 20:34) E kin wiahda ihmw likou. Ni eh lella Korint, e tepte iang Akwila oh Persila me kin pil wia ihmw likou. Ahpw ni “rahnen sapad koaros,” e kin kalohk ong mehn Suhs oh mehn Krihs ko. Eri ni Sailas oh Timoty ara lella reh, “Pohl ahpw tepida soupisengkihla kalohki mahseno.” (Wiewia 18:2-5) Pohl sohte manokehla dahme e kin keieu mwohneki, me iei en papah Siohwa. Pwehki eh mehn kahlemeng mwahu, e kak kangoange rie Kristian kan. E katamankihong irail ren dehr mweidohng kahpwal kan en mour oh anahn en apwalih peneinei en kahrehiong irail en sohla nsenohki “dahme keieu kesempwal,” me iei soahng koaros me wia kisehn atail kaudokiong Siohwa.—Pil. 1:10.
4. Ia duwen Pohl oh Timoty ara sewese riara Kristian ko en dadaur pahn kalokolok?
4 Mwurinte mwomwohdiso kapw en Deselonika wiawihda, Kristian kapw ko lelohng uhwong laud. Ni pwihnen aramas ko ar sohte kak diar Pohl oh Sailas, irail uhd wurahdekihieila ekei riarail Kristian ko “rehn kaun akan en kahnimwo,” oh weriwerki: “Ohl pwukat koaros uhwongada kosonned en Sihsar.” (Wiewia 17:6, 7) Ke kak medewehla uwen Kristian kapw ko ar masepwehkada ni ar esehda me aramas en kahnimwo uhwongiraildahr? Arail ngoangki papah Siohwa kakete tikitikla, ahpw Pohl sohte men met en wiawi. Mendahki ih oh Sailas anahne kohkohla, ira tehk mwahu me mwomwohdiso kapwo alehdi epwel mwahu. Pohl katamankihong mehn Deselonika ko: “Se kadarewei Timoty, riatail . . . , pwe en katengeikumwaildi oh kansenamwahwihala kumwail pwe en wia kamwahupen amwail pwoson, pwe emen en dehr luwetkihla kahpwal pwukat.” (1 Des. 3:2, 3) Ele Timoty pein lelohng kalokolok nan eh wasao Listra. E kilang duwen Pohl eh kakehlakahda Kristian ko wasao. Pwehki e kilang dahme Siohwa ketin wia, Timoty kak kamehlelehiong rie Kristian kapw kan me soahng koaros pahn imwila mwahu ong irail.—Wiewia 14:8, 19-22; Ipru 12:2.
5. Ia duwen brother men me adaneki Bryant eh paiekihda sawas me elder men kihong?
5 Dahme Pohl pil wia pwehn kakehlailihada rie Kristian kan? Ni Pohl oh Parnapas ara pwurala Listra, Aikoniomw, oh Andiok, ira “idihada sounapwalih kei ong irail nan ehuehu mwomwohdiso.” (Wiewia 14:21-23) Elder ko me idihdda kin kangoange laud mwomwohdiso ko, duwehte dahme elder kan kin wia rahnwet. Tehk dahme emen brother me adaneki Bryant koasoia: “Ni ahnsou me I sounpar 15, ei pahpao kohkohsang kiht oh ei nohnou piskenla. I pehm me ira keseiehla oh I mworuskihla met.” Dahme sewese Bryant en dadaur ni ahnsou apwalo? E koasoia: “Tony, me wia emen elder, kin koasoiong ie ni mihting kan oh pil ahnsou teikan. E koasoiaiong ie duwen irail kan me kin lelohng kahpwal ahpw kin ahnekihte peren. E ehukihong ie Melkahka 27:10 oh kin kalapw koasoia duwen Esekaia, me kin papah Siohwa ni lelepek mendahki eh pahpao sohte wiahda mehn kahlemeng mwahu.” Ia duwen ahn eldero sawas eh sewese Bryant? Bryant koasoia, “Pwehki Tony kin kangoange ie, kedekedeo I tepida doadoahngki pali laud en ei ahnsou ong papah Koht.” Elder kan, kumwail tehk mwahu irail kan me duwehte Bryant me ele anahne “lokaia kadek” pwehn kangoange irail.—Lep. Pad. 12:25.
6. Ia duwen Pohl eh doadoahngki koasoipen me lelepek kan pwehn kangoange rie Kristian kan?
6 Pohl katamankihong rie Kristian ko me ‘sounkadehde tohto me duwehte depwek kalaimwun ehu’ kin dadaur pahn kahpwal kan pwehki Siohwa ketin kakehlakairailda laud. (Ipru 12:1) Pohl wehwehki me koasoipen irail kan mahso me powehdi soangsoangen kahpwal koaros kak kihong rie Kristian kan eimah oh sewese irail en medemedewehte “kahnimw en Koht ieias.” (Ipru 12:22) Pil duwehte rahnwet. Kitail kin kehlailda ni atail wadek duwen Siohwa eh ketin sewese Kidion, Parak, Depit, Samuel, oh pil me tohto teikan. (Ipru 11:32-35) Ahpw ia duwen mehn kahlemeng en riatail me lelepek kan nan atail ahnsou? Ni poasen kaun en Sounkadehdehn Siohwa kan, kisinlikou kan kin kalapw alahldi sang riatail Kristian kan me koasoia me arail pwoson kin kehlailda mwurin arail wadek koasoipen emen sapwellimen Siohwa ladu me kin lelepek nan atail ahnsou.
POHL KASALEHIONG RIE KAN DUWEN ARAIL EN AHNEKI POPOHL NANPWUNGARAIL
7. Dahme ke sukuhlki sang ahn Pohl kaweid me kileldi nan Rom 14:19-21?
7 Kitail kin kakehlailihada riatail Kristian kan ni atail kin nda de wia soahng kan me kin kahrehda popohl nan mwomwohdiso. Mehnda ma madamadau en riatail Kristian kan wekpeseng, kitail sohte kin mweidohng met en katohrekitailpeseng. Kitail pil sohte kin ngihtehtehki atail pwuhng ma met sohte kauwehla kaweid en Paipel. Medewehla karasaras wet. Mwomwohdiso en Rom wiawihkihda Kristian kan me mehn Suhs oh kaidehn mehn Suhs. Ni ahnsou me Kosonned en Moseso sohla kadoadoahk, sapwellimen Siohwa tohnkaudok kan sohla anahne dadaur kosonned me pid tungoale soangen mwenge kei. (Mark 7:19) Sang ahnsowo kohla, ekei Kristian mehn Suhs ko medewe me re ahneki saledek en kang soangen mwenge koaros. Ahpw, ekei Kristian mehn Suhs sohte kak wia met. Mwomwohdisou eri tohrohrpeseng pwehki ire wet. Pohl kasalehda kesempwalpen en ahnekihte popohl oh koasoia: “Me keieu mwahu iei en dehr kang uduk de nim wain de wia mehkot me pahn kahrehiong riomw men en dipekelekel.” (Wadek Rom 14:19-21.) Eri Pohl sewese rie Kristian ko en kilang me soangen akamai pwukat kak kauwehla emenemen irail oh pil mwomwohdiso pwon. E pil men wekidala eh mwekid kan pwehn dehr kadipekelekelih meteikan. (1 Kor. 9:19-22) Kitail pil kak kangoange meteikan oh ahnekihte popohl ma kitail sohte kin akamaiki dahme pein kitail mwahuki.
8. Dahme Pohl wia ni ahnsou me ire kesempwal ehu pwarada oh kauwe popohl en mwomwohdiso?
8 Pohl wiahda mehn kahlemeng mwahu en ahnekihte popohl rehn irail kan me sohte kin pwungki duwen ire kesempwal kan. Karasepe, ekei nan mwomwohdisohn tepin Kristian ko kin nda me Kristian kan me kaidehn mehn Suhs anahne sirkumsaisla, pwe met de kahrehiong mehn Suhs kan en kauwe irail. (Kal. 6:12) Pohl uhdahn sapwungki arail madamadau ahpw e sohte ngihtehtehki irail en idawehn eh madamadauo. Ni aktikitik e peki kaweid sang wahnpoaron oh elder kan nan Serusalem. (Wiewia 15:1, 2) Pwehki met, e sewese Kristian ko en ahnekihte peren oh popohl nan mwomwohdiso.—Wiewia 15:30, 31.
9. Ia duwen atail kak alasang ahn Pohl mehn kahlemeng?
9 Ma akamai laud wiawi, kitail kin wiahda popohl sang ni atail peki kaweid sang irail kan me Siohwa ketin idihada pwehn apwalih mwomwohdiso. Kaweid en Paipel kan kin kalapw dierek nan neitail sawasepen Paipel de soahng teikan me sapwellimen Siohwa pwihn kin kihda. Ma kitail kin medemedewehte en idawehn kaweid pwukat oh dehr ngihtehtehki pein atail madamadau, kitail pahn sewese wiahda popohl nan mwomwohdiso.
10. Dahme Pohl pil wia pwehn wiahda popohl nan mwomwohdiso?
10 Pohl kin wiahda popohl sang ni eh koasoia irair kaselel kan en rie Kristian ko, ah kaidehn arail sapwung kan. Karasepe, ni kaimwiseklahn nah kisinlikowo ong mehn Rom ko, Pohl koasoia eden aramas tohto oh soahng mwahu kan duwen irail. Kitail kak alasang Pohl sang ni atail sohte pweiek en nda soahng mwahu kan duwen riatail kan. Ni atail wia met, kitail kin kakehlakahda nanpwungmwahu oh limpoak nanpwungen riatail kan nan mwomwohdiso.
11. Ia duwen atail kak pwurehng wiahda popohl ni akamai eh wiawi?
11 Ekei pak Kristian koahiek kan pil kak akamaipene nanpwungarail. Ih met me wiawihong Pohl oh iengeo Parnapas. Emen ira men Mark en iang ira nan ara seiloak en misinerio, a emen soh. Ira “lingeringerdahte akamaida” oh ira tohrohrpeseng. (Wiewia 15:37-39) Ahpw Pohl, Parnapas, oh Mark kapwungala nanpwungarail, oh kasalehda me irail uhdahn kesempwalki popohl oh minimin en mwomwohdiso. Mwuhr, Pohl koasoia soahng mwahu kan duwen Parnapas oh Mark. (1 Kor. 9:6; Kol. 4:10) Kitail pil anahne kapwungala iren sawehwe kan me kitail ele ahneki rehn meteikan nan mwomwohdiso oh pousehlahte medemedewe arail irair mwahu kan. Ni ahl wet, kitail pahn wiahda popohl oh minimin.—Ep. 4:3.
POHL KAKEHLAKAHDA PWOSON EN RIE KRISTIAN KAN
12. Soangen kahpwal dah kan me riatail kan kin lelohng?
12 Kitail kin kakehlailihada riatail Kristian kan ni atail kakehlakahda arail pwoson Siohwa. Ekei kin lelohng kapailok sang kisehrail kan me sohte kin papah Siohwa, de pil sang iengarail tohndoadoahk de tohnsukuhl kan. Ekei ele ahneki soumwahu laud de pil nannanti en powehdi arail nsensuwedkihla mehkot me aramas wiahiong irail. Pil ekei me wia Kristian papidais kei sounpar tohto pil kin awiawihete erein ahnsou werei pwe koasoandi wet en imwisekla. Irair pwukat kak kasonge pwoson en Kristian kan rahnwet. Irail kan nan mwomwohdisohn tepin Kristian ko pil ahneki soangen kahpwal pwukat. Dahme Pohl wia pwehn kakehlakahda rie Kristian ko?
Duwehte Pohl, ia duwen atail kak kakehlailihada meteikan? (Menlau kilang parakrap 13)b
13. Ia duwen Pohl eh sewese rie kan me tohn uhwong kan kin kapailoke pwehki dahme re kamehlele?
13 Pohl doadoahngki Paipel pwehn kakehlailihada rie Kristian kan. Karasepe, Kristian mehn Suhs kan ele sehse ia duwen arail pahn sapeng tohn arail peneinei kan me kin nda me lamalam en mehn Suhs mwahusang lamalam en Kristian. Nein Pohl kisinlikou ong mehn Ipru kan uhdahn kakehlakahda Kristian ko. (Ipru 1:5, 6; 2:2, 3; 9:24, 25) Dahme e kawehwehiong irail kak sewese irail en ese dahme irail pahn sapengki tohn uhwong kan. Rahnwet, kitail kak sewese riatail kan me kin lelohng uhwong ren doadoahngki sawasepen Paipel kan pwehn kawehwehda kahrepen arail pwoson. Oh ma meteikan kin kapailokehki neitail me pwulopwul kan ar kamehlele duwen kepikipik, kitail kak sewese irail en tehk iren sawas kan nan kisin pwuhk ko Was Life Created? oh The Origin of Life—Five Questions Worth Asking pwehn kawehwehda kahrepen arail kamehlele me mour kapikipikda.
Duwehte Pohl, ia duwen atail kak kakehlailihada meteikan? (Menlau kilang parakrap 14)c
14. Mendahki Pohl kin soupisengki kalohk oh katohnpadahk, dahme e kin wia?
14 Pohl kangoange rie Kristian kan en kasalehda limpoak sang ni “wiewia mwahu kan.” (Ipru 10:24) E sewese irail kaidehn sang ni dahme e ndahte, ahpw sang ni eh wiewia kan. Karasepe, ni rie Kristian ko nan Sudia lelohng duhpek laud, Pohl wahlahng irail soahng kan me irail anahne. (Wiewia 11:27-30) Ni mehlel, mendahki Pohl kin soupisengki kalohk oh katohnpadahk, e kin ahnsou koaros rapahki ahl akan en sewese irail kan me anahne sawas. (Kal. 2:10) Ni eh wia met, e kakehlailihada rie Kristian ko en kamehlele me Siohwa pahn ketin apwalih irail. Rahnwet, ni atail kin toukihda atail ahnsou, kehl, oh koahiek pwehn sewese riatail kan me lelohng kahpwal laud kan duwehte melimel ape, kitail pil kin kakehlailihada arail pwoson. Kitail pil kak wia met sang ni atail kaukaule kihda sawas en mwohni ong doadoahk en kalohk sampah pwon. Ni ahl pwukat oh ahl teikan, kitail kin sewese riatail kan en likih me Siohwa sohte pahn ketin likidmeliehirailla.
Duwehte Pohl, ia duwen atail kak kakehlailihada meteikan? (Menlau kilang parakrap 15-16)d
15-16. Ia duwen atail kak sewese irail kan me arail pwoson ele luwetala?
15 Pohl doulahte sewese irail kan me arail pwoson luwetala. E poakeirailla oh kin koasoiong irail ni ahl me pahn kangoange irail. (Ipru 6:9; 10:39) Karasepe, nan nah kisinlikowo ong mehn Ipru ko, e kin kalapw doadoahngki lepin lokaiao “kitail,” me kasalehda me pein ih pil anahne kapwaiada kaweid me e kihong irail. (Ipru 2:1, 3) Duwehte Pohl, kitail sohte kin uhdihsang atail sewese irail kan me arail pwoson luwetala. Kitail kin kakehlahda irail sang ni atail kin uhdahn nsenohki irail. Ni ahl wet kitail kin kamehlelehiong irail me kitail poakohng irail. Mwomwen atail koasoi kak kansenamwahwih oh kangoange irail.
16 Pohl kamehlelehiong rie Kristian kan me Siohwa kin ketin mwahngih arail doadoahk mwahu kan. (Ipru 10:32-34) Kitail pil kak wia met ni atail sewese riatail men me eh pwoson ele luwetala. Kitail kak peki en koasoiaiong kitail ia duwen eh iangala padahk mehlel, de kangoange ih en tamanda ahnsou kan me e pehm sapwellimen Siohwa sawas. Kitail kak doadoahngki ahnsowo en kamehlelehiong me Siohwa kin ketin tamatamante eh poakohng ih, oh me E sohte pahn ketin likidmeliehla ih ni ahnsou kohkohdo. (Ipru 6:10; 13:5, 6) Mwein atail koasoiapene soahng pwukat pahn kangoange riatailo en pousehlahte papah Siohwa.
‘KANGKANGOANGE EMENEMEN’
17. Soangen koahiek dah kan me kitail kak pousehlahte kakairada?
17 Duwehte sounkauwada ihmw men eh kin ekisekis kamwahwihala eh koahiek, kitail pil kak kamwahwihala atail kin kakehlailihada emenemen. Kitail kak sewese kakehlailih meteikan ni ar dadaur pahn kahpwal kan sang ni atail ehukihong irail mehn kahlemeng en irail kan mahso me kin dadaurete. Kitail kak wiahda popohl sang ni atail koasoia soahng mwahu kan me kitail kilang rehn meteikan, kolokolete popohl ni ahnsou me kahpwal wiawi, oh pwurehng wiahda popohl ni akamai eh wiawi. Oh kitail kak pousehlahte kakehlailihada pwoson en riatail Kristian kan sang ni atail kin ehukihong irail ire kesempwal kan en Paipel, kihda sawas kan me konehng arail irairo, oh pil sewese emen me eh pwoson ele luwetala.
18. Dahme ke koasoanehdi teng en wia?
18 Irail kan me kin iang sewese kauwada atail Wasahn Kaudok kan kin peren oh nsenamwahu. Kitail kak ahneki peren oh nsenamwahu ni atail sewese kakehlakahda pwoson en riatail Kristian kan nan mwomwohdiso. Weksang ihmw kan me pahn kedekedeo ohla, imwilahn atail doadoahk kak mihmi kohkohlahte! Eri kitail en koasoanehdi teng en “kangkangoange oh kangkakehlailih emenemen.”—1 Des. 5:11.
KOUL 100 Kasamwo Irail ni Kadek
a Mour nan koasoandi wet uhdahn apwal. Riatail Kristian kan kin mi pahn apwal tohto. Ahpw kitail kak sewese irail ma kitail rapahki ahl akan en kangoange irail. E pahn mwahu ma kitail tehkpene mehn kahlemeng en wahnpoaron Pohl.
b WEHWEHN KILEL: Pahpa men kasalehiong nah serepeino ia duwen eh kak doadoahngki iren sawas kan sang sawaspen Paipel kan pwehn pelianda kasongosong en iang kasarawih Krismas.
c WEHWEHN KILEL: Pwopwoud ehu seiloakla wasa ehu me kahpwal laud wiawi pwe ira en iang sawas.
d WEHWEHN KILEL: Elder men mwemweitla rehn brother men me eh pwoson luwetala. E kasalehiong brothero ekei kilel duwen Sukuhl en Pioneer me ira iang sounpar kei samwalahro. Kilel ko katamandohng ira ahnsou kaperen me ira ahneki. Brothero men pwurehng ahneki peren me e ahneki ni ahnsou me e papah Siohwa. Kedekedeo, e pwurodo nan mwomwohdiso.