Doadoahk Tohrohr en Kihpeseng Brochure Kapwo
1 Aramas tohto rahnwet kin pwunodki irair en sampah wet, ahpw aramas malaulaute wehwehki kahrepen soahng kan kin wiawi ahnsouwet, dahme pahn wiawi ni ahnsou kohkohdo, oh dahme re anahne wia pwehn pitsang rahn en kadeik ni ahnsou kohkohdo. (Esekiel 9:4) Pwehn sewese aramas akan en tehkada kesempwalpen ahnsou me kitail mihmi loale, doadoahk tohrohr pahn wiawi en kihpeseng brochure kapwo me oaralap koasoia Keep on the Watch! oh doadoahk wet pahn wiawi sang Ni Ehd, October 18, lel Rahn Sarawi, November 14.
2 Kitail pahn kihla brochure kapw wet ni ahnsou me kitail kalohk ihmw-lel-ihmw, pwurehng pwurala rehn aramas akan (return visit kan), kalohk ahnsou sohte lipilipil, kalohk nan wasahn pisnis de kalohk nanial. Ahpw, kitail sohte pahn kihseli mwahl brochure kapwo (Keep on the Watch!). Kitail pahn kihong ihte aramas akan me kin kasalehda me re perenki dahme Pwuhk Sarawi kin kasalehda duwen wehwehn irair en sampah wet. Ong irail me sohte nohn perenki, kitail kak kihla tract.
3 Aramas akan pahn perenki rong ma ke pahn nda:
◼ “Aramas tohto kin medemedewe laud duwen kahpwal laud kan oh wiewia pwuriamwei kan me wiawi nan sampah rahnwet. [Kihda karasepe ehu sang pein ahmw wasa.] Ke ese me soahng pwukat koaros kohpada nan Paipel? [Mweidohng en sapeng. Mwuri, wadek iren Paipel me konehng ong kahpwalo me ke kasalehda, duwehte Madiu 24:3, 7, 8; Luk 21:7, 10, 11; de 2 Timoty 3:1-5.] Paipel kin kasalehda duwen wehwehn irair en atail ahnsou oh dahme mihmi mwotail. Ke men kalaudehla ahmw wehwehki ire pwukat? [Mweidohng en sapeng. Kihla brochure kapwo ma aramaso uhdahn perenki rong.] Se kin kihla brochure wet ni sohte isepe. Ahpw, ma ke men kihda ahmw kisin sawas ong doadoahk en kalohk wet me kin wiawi sampah pwon, se pahn perenki ale.”
4 De mwein ke pahn diar me aramaso pahn perenki ahmw nda met:
◼ “Aramas tohto rahnwet kin nsensuwedkihla wiewia kapwuriamwei kan nan sampah de mehkot me wiawi nan arail mour me inenen kansensuwed. Ekei kin medemedewe dahme kahrehda Koht sohte kin kauhdi soahng pwukat pwe ren dehr wiawi. Pwuhk Sarawi kin inoukihong kitail me Koht pahn kerenieng kihsang kahpwal kan koaros me aramas kin lokolongki. Menlau tehk soangen kapai kan me Koht pahn wahdohng aramas akan. [Wadek Melkahka 37:10, 11.] Ke men kalaudehla ahmw wehwehki duwen ire pwukat?” Kaimwisekla ahmw koasoi ni ahmw pahn koasoi duwen koasoandi en sawas me kileledi nan parakrap en mwowe.
5 Nantihong en ntingihdi eden aramaso me ale brochure oh wasao me e kin mih ie, oh koasoanehdi en pwurehng pwurala reh pwehn sewese ih ni pali ngehn. Iren sawas kan me pahn kasalehda iaduwen kitail kak wia met nan Atail Doadoahk Ong Wehio en November 2004. Ma aramaso perenki rong ahnsou me ke tepin tuhwong ih, ke kak tepida onop Paipel reh ni ahmw pahn doadoahngki brochure kapwo me oaralap koasoia Keep on the Watch! de pil ehu brochure de pwuhk, duwehte Kupwurki brochure.
6 Brother kan pahn tepida kihpeseng nanpwungatail brochure kapw wet mwurin Service Mihding me kitail pahn koasoiapene artikel wet. E pahn mwahu ma sounkalohk kan (iangahki pioneer kan) pahn ale ihte brochure kan me re pahn anahne ong kihla nan tepin rahn en doadoahk tohrohr en kihpeseng brochure kapw wet. Siohwa en kapaia doadoahk kesempwal wet oh irail akan me mohngiong mehlel me mihmi wasa koaros nin sampah en paiekihda.—Melkahka 90:17.