Dahme Kahrehda Irail Men Pioneer?
1 Kokohp kin kasalehda duwen Krais me e pahn ‘ngoangki lingan en Tehnpas en Koht kin ngkengken loale rasehng kisiniei.’ (Mel. 69:9) Sapwellimen Sises ngoang kamwekid ih en mwohnki doadoahk en kalohk. (Luk 4:43; Sohn 18:37) Soangen ngoang en kalohk duwehte met sansaldahr nan doadoahk en kalohk en Sounkadehde kan en Siohwa rahnwet. Pahr en kalohk me ahpwtehn nek, average en sounkalohk nan sampah pwon me iang doadoahk en pioneer iei me 645,509. Pwehki kitail kin tamataman atail inoukihong Koht atail mour, emen emen kitail anahne medemedewe laud ma kitail kak koasoanehdi en auxiliary de regular pioneer.—Mel. 110:3; Eklesiasdes 12:1; Rom 12:1.
2 Pwehki kitail mihmi nan sampah me aramas kin roporop ong pein irail oh pil noahroke kepwe kan, pali laud en aramas nan sampah sohte kak wehwehki iaduwen emen pahn mwahuki wia doadoahk ehu me sohte pweipwei oh sohte kin ale kaping laud. Dahme kahrehda ekei sounkalohk kan men pioneerki? Pwehki irail ese me irail kin iang wia doadoahk en kamourala aramas. Arail limpoak laud ong Siohwa oh aramas teikan kin kamwekid irail oh irail pil wehwehki arail pwukoah en men sewese aramas en diarada kamourparail. (Rom 1:14-16; 1 Tim. 2:4; 4:16) Pwopwoud ehu me kin pioneer oaralapiehda arail pepehm kan duwen peidek powe ni ara nda: “Dahme kahrehda se kin pioneerki? Ma se sohte pioneer, kiht kak kawehwe ong Siohwa dahme sohki?
3 Pil emen sister ntingihdi met pwehn kawehwe dahme kahrehda e tepida pioneer: “Ngehi oh ahi pwoud koasoanehdi en mourki eh doadoahkohte, met wehwehki se sohte pahn pwainda soahng kan me sohte anahn. Ahpw, Siohwa inenen kapaiada kiht, sohte pak ehu se uhdahn anahne mehkot . . . I pil diarada karepen ahi mour—sewese ira me anahne sawas ni pali ngehn pwe ren sukuhliki me Siohwa, Koht mehlel, me sohte kin dohsang irail ma irail pahn rapahki ih.” Pwehki pioneer kan wehwehki me atail ahnsou mwotomwotlahr, irail kin itarki anahn kan en mour nin doken arail kin me irail nantiong rapahki takai kesempwal kan ni pali ngehn me pahn mour kohkohlahte.—1 Tim. 6:8, 18, 19.
4 Ma ahmw irair kan pahn mweidong uhk en pioneer, dahme ke soh pahn iang riatail brother oh sister rar rar kei nan sampah pwon me kin pioneer? Ni ahl wet, ke kak pehmada perenohte me irail kin anehki.