Met Iei Ahnsoun Kalohk!
1. Dahme kahrehda met iei ahnsou en kalohk?
1 “Kumwail lemmwiki Koht, kapinga oh wauneki Ih.” Tohnleng kan pil kin sewese doadoahk en kalohk wet pwe Rongamwahu en “lohkihong tohn sampah koaros, lokaia koaros, oh sahpw koaros.” Dahme kahrehda? “Pwe e lelehr ahnsoun eh pahn ketin kadeikada tohn sampah kan.” Rahnwet, kitail miher nan ‘ahnsoun kadeik,’ me pahn imwikihla kasohralahn koasoandi suwed wet. E kesempwal aramas en “kaudokiong Ih me ketin kapikada nanleng, sampah, madau, oh utuhnpihl kan.” Sohte pil ehu doadoahk me wiawi nan sampah rahnwet me pahrekiong doadoahk en kalohki “Rongamwahu poatopoat.” Ei, met iei ahnsou en kalohk!—Kaudiahl 14:6, 7.
2. Iaduwen sapwellimen Siohwa ladu kan kin kasalehda me irail kin wehwehki duwen kesempwalpen ahnsou me kitail mihmi loale?
2 Erein sounpahr eisek me ahpwtehn nek, sapwellimen Siohwa ladu kan kalohk awa 12 billion nan doadoahk en kalohki Wehin Koht oh katohnpadahk. Sounkadehde tohto kin kawekila koasoandi en arail mour pwehn kalaudehla arail ahnsoun kalohk oh sawas nan doadoahk en rahk ni pali ngehn. (Madiu 9:37, 38) Karasepe, nan pahr me ahpwtehn nek, sounkalohk 850,000 samwa iang doadoahk en pioneer nan sounpwong koaros. Ong irail me iang doadoahk en Regular Pioneer, irail kin kalohk awa 70 nan ehuehu sounpwong. Ong irail me iang doadoahk en Auxiliary Pioneer, irail kin kalohk awa 50 nan ehuehu sounpwong.
3. Soangen wekidela dah kan ekei sounkalohk kan kin wiahda pwehn kak iang doadoahk en pioneer?
3 Dahme Anahn Pwehn Kak Iang Doadoahk en Pioneer: Pwehki pioneer kan kin wehwehki me “atail ahnsou mwotomwotalahr,” irail kin nantihong kihsang nan arail mour soahng soh-katepe kan. (1 Kor. 7:29, 31) Kahrehda, irail kin rapahki ahl akan en katikitikiala dahme irail kin anahne pwainda pwe irail en sohte anahne kihda ahnsou laud ong doadoahk en mwohni. Karasepe, ekei sounkalohk kan keseula nan ihmw kan me tikitik sang ihmw kan me irail kin mihmi loale mahs. Ekei kin kesehla arail dipwisou kan me irail sohte anahne. (Madiu 6:19-21) Oh pil, pak tohto, irail kin katikitikiala wiewia kan me irail kin wia ong pein nsenarail me sohte katepe. Soahng pwukat koaros irail kin wia pwehn kalaudehla arail ahnsou oh kehl ong doadoahk en kalohk. (Episos 5:15, 16) Sounkalohk tohto me kin ahneki ngenin tounmetei oh peki sawas sang rehn Siohwa kin nantihong koasoanehdi arail koasoandi kan pwe irail en kak iang doadoahk en pioneer.
4. Soahng dah kan me ke kak wia pwehn lel ahmw mehn akadei en iang doadoahk en pioneer ehu rahn?
4 Ke kak iang doadoahk en pioneer? Ke sou idek rehn ekei pioneer kan me kin pweida mwahu nan doadoahk en kalohk ma iaduwen arail kin koasoanehdi arail koasoandi kan pwehn kak iang doadoahk en pioneer? Ke kak iang irail nan doadoahk en kalohk, oh ke pahn kilang uwen arail kin perenki iang doadoahk wet. Ke pil kak wadek artikel kan me kin koasoia duwen doadoahk en pioneer me kin kohda nan pwuhk kan oh nan Atail Doadoahk Ong Wehio. Koasoanehdi ahmw mehn akadei kan pwehn kak sewese iuk en iang doadoahk en pioneer ehu rahn. Ma mie kahpwal akan me ke lelohng nan ahmw mour me kahrehda ke sohte kak pioneer ahnsou wet, kasalehiong Siohwa nan kapakap, oh peki reh en kak sewese iuk kamwahuwihala kahpwal pwukat.—Lepin Padahk 16:3.
5. Iaduwen doadoahk en pioneer kak sewese iuk en koahiekla nan doadoahk en kalohk?
5 Peren oh Kapai kan: Doadoahk en pioneer kin kak sewese kitail en koahiekla ni atail kin doadoahngki Mahsen en Koht, oh met kin pil kalaudehla atail peren. Emen sister pwulopwul me kin iang doadoahk en pioneer koasoia: “E kin wia kapai ehu en doadoahngki Mahsen en Koht ni ahl me pwung oh konehng. Ni ahnsou me ke kin iang doadoahk en pioneer, ke kin doadoahngki Pwuhk Sarawi ahnsou koaros. Ni ahnsou me I kin iang kalohk ihmw-lel-ihmw, I kakehr ese mehnia iren Paipel me I pahn kasalehiong tohnihmw kan.”—2 Tim. 2:15.
6. Soangen wasa dah kan nan ahmw mour me doadoahk en pioneer kak sewese iuk en kamwahuwihala?
6 Iang doadoahk en pioneer pil kin padahkiong sounkalohk kan duwen soahng kan me kak kamwahuwihala arail mour. E kak sewese me pwulopwul kan en esehla koasoanehdi arail ahnsou ong soahng kan me katapan, ese doadoahngki neirail mwohni ni ahl me mwahu, oh sukuhliki iaduwen kitail kak ehuiong aramas teikan. Pwehki arail iang doadoahk en pioneer, irail kin kak ahneki madamadau en mwohneki soahng ngenin kan nan arail mour. (Episos 4:13) Pak tohto, pioneer kan kin kilang iaduwen Siohwa kin sewese aramas me kin wia kupwure oh soangen kapai kan me kin kohsang mwohneki soahng ngenin kan.—Wiewia 11:21; Pilipai 4:11-13.
7. Iaduwen doadoahk en pioneer kak sewese iuk en karanih Siohwa?
7 Ehu kapai me kin kohsang iang doadoahk en pioneer iei met: e kin sewese iuk en karanih Siohwa. E kin kak sewese kitail ni ahnsou me kitail lelohng kasongosong kan. Emen sister me dadaurete mendahki e lelohng kahpwal laud nan ah mour koasoia: “Ahi nanpwung mwahu rehn Siohwa me I kin ahneki pwehki ahi iang doadoahk en pioneer sewese ie en dadaurete mendahki kahpwal laud kan nan ahi mour.” E kapataiong: “I kin inenen perenki ahi pilada en iang doadoahk en Regular Pioneer. E sewese ie en tounmeteiki pein ahi ahnsou oh kehl ni ahl akan me I sohte kin medemedewe mahs.” (Wiewia 20:35) Kitail kak pil ale kapai tohto ni atail pahn iang doadoahk en kalohk me inenen kesempwal ahnsou wet.—Lepin Padahk 10:22.