Ke Kak Pidelong nan “Wenihmw Laud Ehu me Pahn Kahluwalahng Doadoahk”?
1. Mehnia “wenihmw laud ehu me pahn kahluwalahng doadoahk” kin langada ong kitail?
1 Ni ahnsou me “wenihmw laud ehu me pahn kahluwalahng doadoahk” kin langada ong Pohl, e ngoangki isaneki ahnsou mwahu en kalaudehla ah doadoahk en kalohki Wehio mendahki mie me kin uhwong ih. (1 Korint 16:9, NW) Rahnwet, sounkalohk en Wehio mpen 642,000 nin sampah pwon kin pidelong nan wenihmw laud ehu ong doadoahk sang ni arail wiahla regular pioneer kan.
2. Dahme kahrehda e pahn mwahu kitail en pwurepwurehng kasawih pein atail irair kan?
2 Irair kan Kin Wekila: Mendahki atail irair en ahnsouwet sohte kak mweidong kitail en kalaudehla atail doadoahk en kalohk, atail irair kak wekila. Kahrehda e pahn mwahu kitail en pwurepwurehng kasawih pein atail irair kan oh dehr kin awiawihlahng ehu irair me pahn uhdahn keieu mwahu ong kitail. (Eklesiasdes 11:4) Kowe emen pwulopwul me pahn kereniong kesepwil sang high school? Komwi emen pahpa de nohno, me noumw seri kan pahn kereniong tepida iang sukuhl? Komw pahn kereniong kommoal (retire) sang omwi doadoahk? Mwein soangen wekidekla pwukat pahn kak mweidong uhk ahnsou kan pwehn kak tepida iang doadoahk en regular pioneer. Emen sister me kin lelong kahpwal en roson en paliwar koasoanehdi en tepida doadoahk en pioneer ni ahnsou me e sounpahr 89. Pwekida? Pwehki sistero wereikihsangehr mih nan imwen wini daulih sounpahr ehu, kahrehda e pehm me ah roson pahn kak mweidong ih en iang doadoahk en pioneer.
3. Iaduwen ekei wiahda wekidekla kan pwehn wia doadoahk en pioneer?
3 Me pid duwen Pohl, nin tepio, e pilahn en mwemweit rehn ienge brother kan nan Korint. Ahpw e kawekila ah pilahn kan pwehki rongamwahu. Me tohto me kin wia doadoahk en regular pioneer rahnwet kin anahne wiahda wekidekla tohto kan pwehn wiahte doadoahk en pioneer. Ekei kin kihsang soahng soh katepe kan sang nan arail mour me kahrehda irail ihte anahne doadoahk en part-time pwehn apwalih arail anahn akan. Irail diarada peren nan arail pwais en doadoahk wet. (1 Timoty 6:6-8) Ekei pwopwoud kan kin wiahda wekidekla kan me kahrehda ohl pwopwoud kan te me anahne doadoahk, oh met kin mweidong arail pwoud kan en wia doadoahk en pioneer.
4. Dahme kitail kak wia ma kitail sehse ma kitail kak lel awa kan me kitail anahne wiahda?
4 Ke dehr mwadang lemeleme me ke sohte kak wia doadoahk en pioneer pwehki ke pwunodki me ke sohte pahn kak lel awa kan me ke anahne wiahda. Ke anahne ihte ekis laud sang awa riau nan ehu ehu rahn. Ma ke sehse ma ke kak wia met, ke kak song wia auxiliary pioneer erein sounpwong ehu de riau ahpw wiahki ahmw mehn akadei en wiahda awa 70. Met pahn kak mweidong uhk en wehwehki peren me kin kohsang doadoahk en pioneer. (Melkahka 34:8) Koasoiong irail akan me kin wia doadoahk en pioneer ahnsouwet. Mwein irail kin powehdi kahpwal kan me duwehte ahmw. (Lepin Padahk 15:22) Peki rehn Siohwa en kapaiada ahmw nanti en kalaudehla ahmw doadoahk en kalohk.—1 Sohn 5:14.
5. Dahme kahrehda doadoahk en regular pioneer kin wia doadoahk katapan ehu?
5 Doadoahk Katapan Ehu: En papah nin duwen regular pioneer men kin wahdo kapai tohto. E kak mweidong uhk en kalaudehla ahmw peren ni ahmw pahn kalaudehla ahmw kihkihwei. (Wiewia 20:35) Doadoahk en pioneer pahn kamwahuiala ahmw koahiek en doadoahngki padahk mehlel en Mahsen en Koht ni pwung. (2 Timoty 2:15) Ke pahn ahneki ahnsou mwahu tohto en kilang me Siohwa kin ketin ieiang uhk nan ahmw doadoahk. (Wiewia 11:21; Pilipai 4:11-13) Doadoahk en pioneer pil pahn sewese uhk en kakairada irair en pali ngehn, duwehte dadaurete oh pil e pahn kahrehiong uhk en karanih Siohwa. (Seims 4:8) Ke kak pidelong nan wenihmw laud ehu ong doadoahk oh wiahla emen regular pioneer?