Ke Wia Emen Pioneer Mahs?
1. Kapai dahieu me me tohto paiekihda? Ahpw dahme ekei anahne wia?
1 Erein sounpar tohto, me tohto kin paiekihda pwais en “padahk oh kawehwe Rongamwahu” nin duwen pioneer kei. (Wiewia 5:42) Ahpw ekei anahne uhdihsang wia doadoahk en pioneer pwehki soangsoangen kahrepe kan. Ma ke wia emen pioneer mahs, mie pak ke kin kasawih omw irair en nan ahnsou wet pwe ken tehk ma ke kak pwurehng wiahla pioneer men?
2. Dahme kahrehda irail kan me wia doadoahk en pioneer mahs kak pwurehng kasawih arail irair en ahnsou wet?
2 Irair kan Kin Wekidekla: Mwein solahr kahrepe me kahrehda ken uhdihsang wia doadoahk en pioneer. Karasepe, ma ke uhdihsang wia doadoahk en pioneer pwehki omw sohte kak wiahda awa 90 nan sounpwong ehu, ke kak pwurehng tepida pwehki met ke anahne wiahdahte awa 70? Ke solahr anahne doadoahk en mwohni laud duwehte mahs, de omw pwukoa nan peneinei tikitikla? Emen sister me uhdihsang wia doadoahk en pioneer pwehki kahpwal en paliwar pwurehng tepida ni eh sounpar 89. E sohte pwurala ni imwen wini daulih sounpar ehu kahrehda e pehm me eh irair en paliwar kak mweidohng ih en pwurehng iang wia doadoahk en pioneer!
3. Ia duwen tohnpeneinei ar kak sawaspene pwehn sewese emen rehrail en kak iang wia doadoahk en pioneer?
3 Mwein ke sohte iang wia doadoahk en pioneer mahs, ahpw mie emen tohn omw peneinei me uhdihsang wia doadoahk en pioneer pwehn apwalih emen tohnpeneinei, mwein emen me mahlahr. (1 Tim. 5:4, 8) Ma ei, kowe de meteikan nan peneinei kak sewese ih? Kumwail sou koasoiapene irair wet? (Lep. Pad. 15:22) Ma tohnpeneinei kin sawaspene pwe emen rehrail en kak wia doadoahk en pioneer, irail koaros kak pehm me irail kin iang doadoahk wet.
4. Dahme ke kak wia ma ke sohte kak pwurehng wia doadoahk en pioneer ni ahnsou wet?
4 Ke dehr nsensuwedkihla ma omw irair en ahnsou wet sohte kak mweidohng uhk ken pwurehng tepida iang wia doadoahk en pioneer. Omw ineng en men wia met kin kaperenda Siohwa. (2 Kor. 8:12) Ke alehdi koahiek sang omw doadoahk en pioneer. Eri doadoahngki met nan omw doadoahk en kalohk ni ahnsou wet. Kapakapki omw ineng en men wia doadoahk en pioneer oh tetehk ma ke kak wekidala omw irair kan. (1 Sohn 5:14) Mwein ehu rahn Siohwa pahn ketikihong uhk “ahnsou kaselel ehu ong doadoahk laud” pwe ken kak pwurehng ahneki peren en wia doadoahk en pioneer!—1 Kor. 16:9.