Ke Kakehr Iang Doadoahk en Pioneer?
1 Atail iren pahr ong 1999 kin katamankin kitail me kitail momour nan sapwellimen Siohwa “rahnen komour.” (2 Kor. 6:2) Ahpw sapwellime rahnen komour pahn kerenieng imwisekla. Mwuri, sapwellime “rahnen kadeik” pahn tepida. (2 Pit. 2:9) E kin kaperen en kilang aramas mwekidki sapwellimen Siohwa kanengamah ni E kin mweidohng aramas arail ahnsou mwahu en ale komourparail!
2 Sapwellimen Siohwa aramas akan kin wia uwen me re kak en lel aramas koaros pwe ren kak mwekid mwohn e pwandala. Ong irail tohto me iang wie sounkalohk kan, met wehwehki me re kakehr iang doadoahk en Pioneer. Iaduwen komwi—ke kakehr iang doadoahk en Pioneer? Dahme kahrehda peidek wet pwarada?
3 Re Kasalehdahr Arail Kalahngan: Nin duwen me pakairki nan Atail Doadoahk Ong Wehio en February 1999, awa kan me Regular oh Auxiliary Pioneer anahne wiahda malaulaula. Ong koasoandi kapw wet, Regular Pioneer kan anahne wiahda awa 70 ehu ehu sounpwong oh awa 840 nan ehu ehu pahr en kalohk. Auxiliary Pioneer kan anahne wiahda awa 50 ehu ehu sounpwong. Ekei irail me iang doadoahk en pioneer kasalehdahr arail kalahnganki koasoandi kapw wet:
“Koasoandi wet duwehte kisakis ehu sang Samatail nanleng!”
“I sohte kak kawehwe ni lokaia uwen ahi perenki oh kalahnganki koasoandi kapw wet!”
“Pwehki koasoandi kapw wet, aht koasoandi kan koaros mengeila sang mahs!”
“Se kin kapakapki me sounkalohk tohto kakehr iang doadoahk en pioneer oh perenkihda kapai kan me kin kohsang kalaudehla arail papah Siohwa.”
4 Ni atail kerenlahng kaimwisekpen sapwellimen Koht rahnen komour, e kin sansal me Siohwa kin kupwurki sapwellime aramas en wie kaimwiseklahn lohk en kaping en kehlailla mwohn Rahno pahn leledo. Rohng wet pahn kehlailla ma (1) irail sounkalohk kan pahn tohtohla oh ma (2) emen emen pahn wia uwen me e kak nan doadoahk en kalohki Wehio. Siohwa, nin duwen “Ih me kin ketin kakairada tuhkeo,” kin kahrehda pali riau pwukat koaros en pweida mwahu pwehki E kin ketin kapaiada irail koaros me ale komourparail.—1 Kor. 3:6, 7; Melkahka 110:3.
5 Kitail en Dehr Mwamwahleki Sapwellimen Koht Kupwurkalahngan: Pohl kaweidki rie Kristian kan duwen sapwellimen Siohwa rahnen komour ni eh mahsanih: “Eri, kiht me kin iang Ih (Siohwa) doadoahk, se peki ni ngidingid kumwail en dehr mwamwahleki sapwellimen Koht kupwurkalahngan.” Kitail sohte pahn “mwamwahleki sapwellimen Koht kupwurkalahngan” ma kitail pahn doadoahngki “ahnsou me mwahu” ong sewese meteikan en ale komourparail. (2 Kor. 6:1, 2) Rahnwet, mahsen en Pohl kin inenen kesempwal oh karuaru. Kristian kan me poakohng Siohwa ni mehlel pahn wia uwen me irail kak en pweida mwahu nan doadoahk en kalohk me Siohwa ketkihong kitail en wia. Ke kakehr kalaudehla ahmw ahnsou ong kalohk oh iang doadoahk en regular pioneer?
6 Mehn Akadei Ehu me Kitail Kak Lel: Atail mehn akadei, nin duwen sahpw kan me mihmi pahn epwelpen Rahn Ohpis en Guam, kitail men kilang sounkalohk 160 en wie doadoahk en Regular Pioneer mwohn imwin sounpwong en December. Se kamehlele me mehn akadei wet kitail kak lel. Dahme kahrehda se kamehlele met? Pwehki nan March 1998, mie sounkalohk 130 me iang doadoahk en Auxiliary Pioneer. Pali laud en irail iang wiahda awa 60—ihte awa 10 malaulau sang awa 70 me ren wiahda pwehn lel koasoandi kapw ong Regular Pioneer kan! Ma irail meh 30 (sang nanpwungen irail 130 me Auxiliary Pioneer nan March 1998) pahn kak tepiada Regular Pioneer mwohn pahr 2000 tepida, kitail pahn lel atail mehn akadei en Regular Pioneer 160 nan pahr 2000!
7 Koasoandi Ehu me Anahn: Ke lemeleme ke pahn apwalki lel awa 70 nan kalohk nan sounpwong ehu? Mwein e pahn sewese iuk ma ke pahn medemedewe iaduwen ke pahn wia awa 17 nan wihk ehu. Ma ke pahn doadoahngki karasepen koasoandi kan me ntingihdi ni pali 4, kilang ma ke kak koasoanehdi pein ahmw koasoandi ong Regular Pioneer me pahn mwahu ong pein ahmw irair kan. Pwehn kak wiahda koasoandi ehu me mwahu, ke kak koasoiong irail me Regular Pioneer oh kin pweida mwahu nan doadoahk wet oh idek rehrail dahme re kin wia pwehn pweida mwahu ni arail kin wia arail pwukoah koaros (pwukoahn peneinei oh pwukoah teikan). Idek rehn Sounapwalih en Circuit iaduwen pioneer kan nan ahmw wasa kin koasoanehdi arail awahn kalohk nan ehu ehu wihk. Oh pil, peki sawas rehn Siohwa pwehn kapaiada ahmw koasoanehdi ahmw ahnsou pwehn kak pioneer.—Lepin Padahk 16:3.
8 Sawaspene Nin Duwen Peneinei Ehu: Ke lemeleme me kumwail kak sawaspene nin duwen peneinei ehu pwehn kak iang doadoahk en pioneer? Ke kak mwondi oh koasoiong ahmw peneinei oh koasoia iaduwen—ni amwail pahn pilahn oh sawaspene—emen de riemen kak iang doadoahk en pioneer. Ahpw, ni mehlel, ekei pahn diarada me, pwehki arail irair kan, re sohte kak Regular Pioneer ni ahnsouwet. Ma iei, ke kak akadeiong iang doadoahk en Regular Pioneer ehu rahn. Ahpw, ke kak tepiada pilahnih iahd me kak kak tepiada pioneer. Mwein ke kak Auxiliary Pioneer pak kei erein sounpahr wet pwehn ekis ekis nantiong ahmw mehn akadei en Regular Pioneer ehu rahn.
9 Irail Regular Pioneer meh 130 me mihmi pahn epwelpen Rahn Ohpis en Guam ni ahnsouwet kin mihmi nan soangsoangen irair kan. Kaidehn koaros me roson, oh pali laud en irail ahneki pwukoah kan me pid peneinei de pweipwand kan. Irail meh 40 mahki sounpahr 50 de sounpahr 50 samwa, oh ehk riemen en irail me mahki sounpahr 65 samwa. Lime kis ehu en irail me brother kan, oh pali laud en irail brother kan kin pwukoahki pwukoahn peneinei oh mwomwohdiso. Irail koaros “doadoahngki arail ahnsou mwahu” ong doadoahk en pioneer, oh met kin wehwehki me kitail anahne itarki dahme kitail ahnekiher oh nainekiher.—Kolose 4:5.
10 Kitail Kin Itarki Dahme Kitail Ahnekiher oh Nainekiher? Pwehn iang doadoahk en pioneer, mwein ke anahne itarki dahme ke ahnekiher oh nainekiher. Ahmw mour kin duwehte lapalahn ihmw me soahng tohto kin mihmi loale oh soahng pwukat kin kangala ahnsou laud oh mwohni laud oh doadoahk laud pwehn apwalih? Ma iei, mwein ke anahne kawikila ahmw irair kan pwehn pioneer. Ke kak katikitikla ahmw ahnsoun doadoahk en mwohni? Ke kak kawikila ahmw koasoandi pwehn sohla doadoahngki ahmw ahnsou ong soahng kan me sohte katepe de ke anahne katikitikla ahmw ahnsou ong mehn kamweit kan?
11 Pwuhk Sarawi, nan 1 Timoty 6:8, kin kaweidkin kitail: “Eri, ma kitail tungoalenki kisin tungoal akan oh likou, met e itarohng kitail.” Ma kitail kak itarki dahme kitail ahnekiher oh nainekiher, met pahn sewese kitail en wia uwen me kitail kak pwehn papah Siohwa oh mwohnki soahng ngehnin kan. (Madiu 6:22, 33) Nan pwuhken 1998 Yearbook (Pwuhken Pahr en 1998) ni pali 104, me kin koasoia Sapahn, e kin koasoia iren sawas tohto duwen dahme kahrehda sounkalohk tohto kin ngoangki doadoahk en kalohk wasao. Tehk duwen iren sawas ehu: “E kin sansal me imwen mehn Sapahn kan sohte kin diren dipwisou kan, ihme e sohte kin kangala ahnsou laud en kamwakelehda, oh ihme mour kin mengei.” Met soh kin kasalehda mour en 1 Timoty 6:8?
12 Nan sampah pwon, sapwellimen Koht ladu kan kin ngoangki kalohki rongamwahu mwohn sapwellimen Siohwa rahnen komour pahn imwisekla oh ngoang wet kin laud sang mahs. Oh e inenen mwahu pwe nan pahr me ahpwtehn nek, average en irail me iang doadoahk en pioneer kerenieng sounkalohk 700,000. Ke kak kawikila ahmw koasoandi pwehn iang irail wia doadoahk en pioneer? Se kangoange komwi en kasawihada ahmw irair kan oh kapakap pwehn sapengla peidek wet: “Ke kakehr iang doadoahk en pioneer?”
[Blurb on page 3]
ATAIL MEHN AKADEI: REGULAR PIONEER 160!
[Koakon nan pali 4]
Karasepen Koasoandi kan en Regular Pioneer kan
Anahne: Awa 17 nan ehu ehu wihk
Rahn Ehu Erein Wihk iangahki Rahn Kaunop oh Rahn Sarawi
Rahn Awa depe
Ni Alem 8
Rahn Kaunop 6
Rahn Sarawi 3
Awa Koaros Patpene: 17
Rahn Riau Erein Wihk iangahki Rahn Kaunop
Rahn Awa depe
Ni Are 7
Ni Epeng 7
Rahn Kaunop 3
Awa Koaros Patpene: 17
Rahn Siluh Erein Wihk iangahki Rahn Sarawi
Rahn Awa depe
Ni Ehd 5
Ni Esil 5
Ni Alem 5
Rahn Sarawi 2
Awa Koaros Patpene: 17
Ni Soutik en Rahn Riau iangahki Rahn Kaunop oh Rahn Sarawi
Rahn Awa depe
Ni Ehd 3
Ni Esil 3
Rahn Kaunop 8
Rahn Sarawi 3
Awa Koaros Patpene: 17
Koasoanehdi Pein Ahmw Koasoandi en Regular Pioneer
Rahn Awa depe
Ni Ehd
Ni Are
Ni Esil
Ni Epeng
Ni Alem
Rahn Kaunop
Rahn Sarawi
Awa Koaros Patpene: 17