Mwohnki Soahng Kesempwal Kan Nan Ahmw Mour
1 Ia ekei wiewia kesempwal kan me kin kakehlailda atail pali ngehn? Iet ekei: pein onop, iang mihding kan ahnsou koaros, poadidiong kapakap, werekiong irail me mwahu, oh iang kalohk. Kitail sohte kak kehlail ni pali ngehn ma kitail sohte kin mwohnki soahng pwukat nan atail mour.
2 Ahpw, kitail koaros kin peiong ineng suwed kan oh kitail koaros kin anahne kaiahne pein kitail. (Kalesia 5:17) Kitail dehpa pehm me kitail pahn paiekihda mehkot laud ma kitail pahn roporop ong pein kitail. (Seremaia 17:9) Ihme kahrehda, ma kitail pahn pere pein mongiongatail oh sohte men pitih pein kitail, kitail anahne kasawiada pein kitail ahnsou koaros.—Lepin Padahk 4:23; 2 Kor. 13:5.
3 Kasawihada Pein Mongiongomw: Ke kak wia met ni ahmw idek pein uhk peidek pwukat: I kin men wadek Mahsen en Koht? (1 Pit. 2:2) I kin kalahnganki oh kesempwalki iang towehda mihding kan ahnsou koaros? (Ipru 10:24, 25) I kin poadidiong kapakap? (Rom 12:12) I kin men iang mihmi rehn irail kan me kin kesempwalki arail pali ngehn? (Rom 1:11, 12) I kin mwekidki ahi pwukoah en kalohki rongamwahu? (1 Kor. 9:16) Ma kitail kak sapengki “ehi” ong peidek pwukat, met pahn kasalehda me ke kin mwohnki soahng kan me kesempwal nan ahmw mour.
4 Kasawihada Ahmw Koasoandi en Rahn Koaros: Mwurin ahmw kasawihada mongiongomw, ke anahne kasawihada dahme ke kin mwohnki nin duwen ahmw mwekid en ehu ehu rahn. Kitail anahne koasoanehdi ahnsou en wadek Pwuhk Sarawi ehu ehu rahn oh wadek neitail makasihn The Watchtower oh Awake! koaros, iangahki kaunopada ong mihding kan koaros. Kitail anahne koasoanehdi ahnsou ong atail peneinei pwehn onoppene oh kapakappene. Wiahda koasoandi pwehn dehr daulihla atail kilang TV de doadoahngki computer. Nantiong iang mihding kan koaros, oh mwurin mwo koasoanehdi soahng teikan en wiawi likin ansoun mihding kan. Wiahda koasoandi pwe tohnpeneinei koaros en kak iang kalohk wihk kan koaros.
5 Mehlel, ma kitail pahn mwohnki soahng kesempwal kan nan atail mour, kitail pahn uhdahn nsenamwahu.