Onop Paipel kan me kin Katohnpadahk
1 Mwurin Pilip koasoaiong ohlen Idiopia “duwen Rongamwahu en Sises,” ohlo idek rehn Pilip: “Dahme kerompwa pwe I en dehr papidaisla?” (Wiewia 8:27-39) Ohlo kesempwalkier sapwellimen Koht nting sarawi kan, oh ihme kahrehda mwurin Pilip sewese ih, e men wiahla emen tohnpadahk. Ahpw kaidehn aramas koaros kin wehwehki pein arail anahn en kasawihada Nting Sarawi kan.
2 Kitail kin kalahnganki pwe sapwellimen Siohwa pwihn sansal kin wiahda brochure kapw ehu, A Book for All People, pwehn kangoangehkin aramas en kasawih dahme Pwuhk Sarawi koasoiaki atail ahnsou. Audepen brochure pahn sewese aramas mongiong mehlel kan, me sukuhl laud kan ahpw sohte nohn wehwehki Pwuhk Sarawi. Brochure wet pahn kamwekid aramas en men wadek Pwuhk Sarawi.
3 Ahnsou me ke pahn tepiada onop en Paipel rehn emen, e pahn mwahu ma ke pahn kousapahlih ire kan me mihmi nan doaropweo Atail Doadoahk Ong Wehio. Ahnsou me ke kin onop reh, medemedewe duwen eh kekeirada pwehn tehk eh anahn akan pwehn sewese ih. Ma e kin wia eh pasepeng kan ni pein eh lokaia, met pahn kasalehda me e kin kalahnganki padahk mehlel sang nan mongiong. Irail me kin wadek oh onop sawaspen Pwuhk Sarawi me Society wiawihda likin pwuhk me irail onopki oh irail me kin iang towehda mihding kan kin mwadang kekeirada. Ke pahn pil kangoange ih en koasoiong mehteikan dahme e kin sukuhliki. Ni ahl kadek, ke pahn kasalehong ih dahme e anahne wia pwehn kekeirada ni pali ngehn. Kitail sohte pahn onop rehn aramas me sohte kin mwekidki dahme irail sukuhliki nan Pwuhk Sarawi. Tohnsukuhl en Paipel kan anahne kasalehda me irail men kalaudehla arail men wehwehki Pwuhk Sarawi, kasalehda me irail kamehlele oh mwekidki padahk mehlel nan arail mour, oh pahn kekeirada oh pahn inoukihong Koht arail mour oh pepdaisla.
4 Nan ekei ihmw kan, kaidehn ihte aramas emente kin onopki Paipel, mwein emen emen nan peneinei kin onop rehn ekei sounkalohk kan. Ahpw e pahn mwahu ma tohnpeneinei koaros kak kohpene oh wia onop ehute pwehki met pahn sewese irail koaros en miniminpene.
5 Sapwellimen Sises kehkehlik iei en katohnpadahk. (Madiu 28:19) Ma kitail pahn wia met, kitail pahn sewese tohnihmw en kekeirada oh pahn idek rehtail, “Dahme kerompwa pwe I en dehr papidaisla?”