“Iaduwen I Pahn Kak . . . Ma Sohte Me Sewese Ie?”
1 Ni ahnsou me sounkalohk Pilip idek rehn ohlen Idiopia me e wehwehki dahme e wadek sang nan Mahsen en Koht, ohlo sapengki: “Ia duwen ei pahn kak wehwehki, ma sohte me pahn kawehwehiong ie?” Ni peren, Pilip sewese ih en wehwehki rongamwahu me pid Sises, oh met imwikihla ohlo mwadang papidaisla. (Wiewia 8:26-38) Ni ahl wet, Pilip peikiong kehkehlik sang Krais en ‘padahkiong tohn wehi kan koaros pwe re en wiahla nei tohnpadahk: papidaisihirailla.’—Madiu 28:19, 20.
2 Kitail anahne peikiong kehkehlik en katohnpadahk, duwehte me Pilip wia. Ahpw, soangen mwadang en kekeirada ni pali ngehn me ohlen Idiopia wia sohte kin kalap wiawi rehn irail me kin onop Paipel rehtail. Ohlo, me iangala pelien lamalam en mehn Suhs, kin wehwehki laud Mahsen en Koht oh e kin perenki rong oh kin mwekidki dahme e kin sukuhliki, ahpw, ihte me e saikinte wia: wehwehkihla me Sises iei Mesaia me kokohp kan kin kasalehda. E kin apwal ma irail me kin onop Paipel rehtail sohte kin nohn ese Pwuhk Sarawi, de re kin kamehlele padahk likamw kan sang pelien lamalam kan rahn pwukat, de re kin ahneki kahpwal tohto nan arail mour. Dahme pahn sewese kitail en sewese irail me kin onop Paipel rehtail en men inoukihong arail mour ong Koht oh papidaisla?
3 En Wehwehki Anahn en Irail me kin Onop Paipel Rehtail: Insert en Atail Doadoahk Ong Wehio en July 1999 kin koasoia ia uwen werei kitail pahn onop rehn aramas, ni atail kin doadoahngki brochure Kupwurki de pwuhken Knowledge. E koasoia: “E konehng en kasawihada kekeiradahn onopo nin duwen irair oh loalokong en tohnsukuhlo. . . . Kitail anahne tamataman me kitail sohte men onop rehn aramas men mwadang pwehn mwadang kanekehla pwuhko, ahpw e sohte uhdahn wehwehki padahk mehlel en Mahsen en Koht. Tohnsukuhl koaros anahne poahsoan en arail pwoson Mahsen en Koht en tengeteng.” Eri, e sohte pahn konehng en onop pwuhken Knowledge ni karuwaru pwehki kitail nantihong kanekehla erein sounpwong weneu. Mwein ekei aramas anahne onop werei sang sounpwong weneu pwehn kak kekeirada lao lel e papidaisla. Ni ahmw kin onop rehn aramas wihk koaros, en kawehwe mwahu lao lel aramaso uhdahn wehwehki dahme e sukuhliki sang Mahsen en Koht, mendahki ke anahne ahnsou laud en kawehwe ireo. Ekei pak, amwa onopki ehu ehu irelaud nan pwuhken Knowledge pahn reireiki wihk riau de siluh. Met pahn mweidong kitail ahnsou en wadek oh kawehwe ong aramas me kin onop Paipel rehtail iren Paipel kan me mihmi nan parakrap kan.—Rom 12:2.
4 Ahpw, dahme kitail kak wia ma aramaso kanekehla ah onopki pwuhken Knowledge ahpw e saikinte wehwehki padahk mehlel oh saikinte men inoukihong Koht ah mour? (1 Kor. 14:20) Dahme ke kak wia en kahluwa ih pwehn keid nan ahl me pahn kahluwalahng mour soutuk?—Madiu 7:14.
5 Kaitarala Anahn en Pali Ngehn en Aramas akan me kin Onop Paipel Rehtail: Ma e sansal me aramaso wie kekeirada, mendahki eh kekeirada kin wawai, oh e kalahnganki dahme e kin sukuhliki, ke kak pousehla ahmw onop reh oh onopki pil ehu pwuhk mwurin ke kanekehla ahmw onop en brochure Require oh pwuhken Knowledge. Emen emen aramas kin wekpeseng, nin duwen dahme e anahne, ahpw ma e anahne onop pil ehu pwuhk, ke kak pousehla amwa onop nan pwuhken True Peace de pwuhken Kaudok de pwuhken God’s Word. Pali laud en sounkalohk kan nainekier pwuhk pwukat ma mwomwohdiso sohte kolokol pwuhk pwukat. Ma anahn, mwomwohdiso kak oaht pwuhken God’s Word sang Brooklyn. Pali laud en ahnsou, kitail pahn onopkihong aramas akan brochure Require oh pwuhken Knowledge mahs. Ma kitail anahne pousehla atail onop mwurin aramaso papidaislahr, kitail kak wadek Bible study, return visit kan, oh awa kan me kitail kin kohla rehn aramaso oh kitail kak ripohtki soahng pwukat lao lel kitail kanekehla keriaun pwuhk.
6 Met kin wehwehki me irail me ahpwtehn papidaisla oh onop pwuhk ehute pahn kak pwurehng onop oh onopki pil ehu pwuhk? Met sohte pahn wiawi ma sohte anahn mie. Ahpw, ma re sohla kin kalohk de re pehm me re sohte kekeirada nan padahk mehlel, mwein re pahn pehm me re anahne sawas pwehn doadoahngki dahme re sukuhliki nan padahk mehlel nan arail mour. Ahpw, mwohn ke pahn pwurehng onop rehn emen me papidaislaier, e pahn mwahu en tuhwong Sounapwalih en Kalohk. Ahpw, ma ke kin ese ekei aramas me onopki pwuhken Knowledge mahs ahpw saikinte inoukihong Siohwa arail mour oh papidaisla, ke kak idek rehrail ma re men pwurehng onop Paipel rehmw.
7 E kin wia kilel en limpoak en Kristian ma kitail kin tehk mwahu anahn en aramas akan me kin onop Paipel rehtail. Atail mehn akadei iei en sewese aramaso en wehwehkihla padahk mehlel en Mahsen en Koht. Ma met kin wiawi, aramaso kak mourki padahk mehlel oh e kak inoukihong Siohwa ah mour oh papidaiskihla pihl.—Mel. 40:8; Episos 3:17-19.
8 Ke tamataman dahme wiawi mwurin ohlen Idiopia papidaisla? “E ahpw douluhlla nan eh seiloak pereperen kohla” nin duwen emen sapwellimen Sises Krais tohnpadahk kapw. (Wiewia 8:39, 40) Kitail pahn kak diarada peren mehlel met oh ahnsou kohkohlahte ma kitail pahn pweida mwahu ni atail kin sewese aramas akan en diarada padahk mehlel!