Kilang Kekeiradahn Doadoahk Karuwaru en Katohnpadahk
1 Mwohn ah mweselsang sampah, Sises kehkehlingkihong sapwellime tohnpadahk kan en “katohnpadahkihla tohnsampah koaros.” Met kin wehwehki me re pahn wia doadoahk lap en kalohk oh padahk oh wahpeseng arail doadoahk en lellahng ni irepen sampah. (Madiu 28:19, 20, New World Translation; Wie. 1:8) Re kin kilangwohng kehkehlik wet me e wia wisik toutou ehu me apwal ren kapwaiada? Kaidehn ih met lamalam en wahnpoaron Sohn. Mwurin e wia doadoahk en katohnpadahk erein sounpar 65, e ntingihdi: “Pwe iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.”—1 Sohn 5:3.
2 Iren Pwuhk Sarawi kan me kilelehdi wiewiahn Kristian kan en mahs kin kadehdehda me re kin ni karuwaru kapwaiada arail pwukoah en padahngki aramas akan en wiahla tohnpadahk en Sises Krais. (2 Tim. 4:1, 2) Re kin wia met, kaidehn ihte pwehki pwukoah ehu, ahpw pwehki ineng en kapinga Koht oh en walahng meteikan koapworopwor en komour. (Wie. 13:47-49) Pwehki irail ko koaros me wiahla tohnpadahk kin uhd katohnpadahkih meteikan, tohnmwomwohdisohn Kristian tohtohla nan tepin pahr en Kristian.—Wie. 5:14; 6:7; 16:5.
3 Doadoahk en Katohnpadahk Mwadangala: Doadoahk en katohnpadahk me keieu laud sang koaros iei me kin wiawi nan senturi 20 wet! Kapahrekihong ahnsouwo lel met, aramas rar kei pwungkiehr rongamwahuwo oh kapwaiada. (Luk 8:15) Pwehki koasoandi suwed wet wie mwotomwotlahr, pwihn en “ladu lelepek oh loalokong” wiahdahr ong kitail dipwisoun doadoahk kan pwehn sewesehki aramas mohngiong mehlel en sukuhliki padahk mehlel mwadang.—Madiu 24:45.
4 Nan 1995, kitail alehdi pwuhken Knowledge That Leads to Everlasting Life, oh mwuri nan 1996, kitail ale brochure What Does God Require of Us? (lokaiahn Pohnpei Dahme Koht Kupwurki Kitail en Wia?) Me pid pwuhken Knowledge, The Watchtower (lokaiahn wai) en January 15, 1996, pali 14, koasoia: “Aramas kan kak onopkihla pwuhk wet me mihmi ni pali 192 erein ahnsou mwotomwot, oh irail ko me ‘warohng mour soutuk’ kak en sukuhliki pwuhk wet uwen me itar pwe ren kak inoukihong Siohwa arail mour oh papidaisla.”—Wiewia 13:48, NW.
5 Nan insert en May 1999 en Atail Doadoahk Ong Wehio, artikel wet me oaralap koasoia “Iaduwen en Katohnpadahk Doadoahngki Pwuhken Knowledge,” kihong kitail mehn akedei wet: “Ke pahn kilang irair en tohnsukuhl oh ma e kin sukuhliki Paipel mwadang oh mwekidki, oh ma iei, ke kak onopkihong ih irelaud ehu nan awa ehu, oh e sohte pahn nohk karuwaru ong tohnsukuhlo. Tohnsukuhl kan kak kekeirada mwahu ma sounpadahk oh tohnsukuhl koaros sohte pahn kauwehla arail koasoandi en onop ehu ehu wihk.” Artikelo pouselahte koasoia: “Ni ahnsou me ke kin kanekehla onopki pwuhken Knowledge rehn emen, e pahn sansal ma aramaso uhdahn men papah Koht de soh.” Pil ehu artikel nan Atail Doadoahk Ong Wehio kawehwehda: “Kitail en kasik me erein ahnsou mwotomwot kiste, emen sounpadahk semen pahn kakehr sewese emen tohnsukuhl me mehlel en alehda loalokong me itar pwehn wiahda ah pilipil loalokong en papah Siohwa.”
6 Pwuhken Knowledge Kin Wahdo Imwila Mwahu Kan: Ni ahnsouwo me emen peinakapw pahn papidaisla, e koasoiahda ah pepehm ong onopki pwuhken Knowledge. Erein ahnsoukis serepeino kin wie onohnopki pwuhken Mour Kohkohlahte. Ni ahnsou me pwuhken Knowledge tepida kohpeseng, sistero me kin onop reh uhd kin onopkihong ih pwuhk kapw wet. Mwurinte met, serepeino wehwehkihdahr me pein ih anahne en wiahda ah pilipil, oh e mwekidiki en kekeirada mwadang sang ahnsouwo kohla. Serepeino, me ahnsouwet wialahr riatail, koasoia: “Pwuhken Mour Kohkohlahte sewese ie en poakohng Siohwa, ahpw pwuhken Knowledge sewese ie en wiahda ahi pilipil en papah ih.”
7 Tehk duwen ia uwen mwadang emen lih sukuhlkihdi padahk mehlel. Mwurin keriau en ah onop, liho iang towehda mihding ni Kingdom Hall erein mwemweit en sounapwalih en circuit. Nan wihko, ni kesiluh en ah onop, liho padahkihong sounapwaliho me e wiadahr ah inou ong Siohwa oh e men wiahla emen sounkalohk me saikinte papidais. Liho tuhwong elder kan, me pwungiehr en wiahla emen sounkalohk, oh wihk en mwuri e tepida kalohk. E uhdahn loaleniong ah onop en Paipel me kahrehda e kommoal sang ah doadoahk en mwohni ekei rahn pwe en onop pahn pak riau de siluh nan ehu ehu wihk oh kin kalohk pak tohto. Ekei pak, nan ehu ahnsoun onop, e kin onopkihla irelaud riau de siluh. Liho tepiada kapwaiada dahme e kin sukuhlki nan irair koaros en ah mour, oh kanekehla pwuhken Knowledge nan erein wihk pahieu, oh kekeirada lau e papidaisla!
8 Emen ohl me pwoudiki emen sister kin koasoia me ih iei “ohl pwopwoud men me seupwoson.” Ehu rahn, emen brother peki me e pahn onopkihong ih Paipel oh doadoahngki pwuhken Knowledge ihte ma ohlo pahn pwungki me e kak uhdi mwurin keieun ara onop de ahnsou soh lipilipil mwuri. Ohlo koasoia me e pahn song wia met, mendahki ahnsou me e pwulopwul e sohte nohn sukuhl oh pil erein sounpar 20 e sohte kin onopki pwuhken sarawi kan. Ia ah pepehm ong onopki pwuhken Knowledge? E koasoia: “E inenen kaperen en diarada me mehn sawas wet en Paipel kin ntingdi ni ahl me mengei. Ire kan loale me sansal oh kin kawehwehda pwung me kahrehda murinte met, I kin kasikasik aht onop en mwuri. Ahi sounpadahk kin ni koahiek idawehnla wiepen onop me Society kasalehda, oh ki sawas en ngehnin Siohwa, I papidaisla mwurin sounpwong pahieu. I kak uhdahn nda ni mehlel me ma kitail pahn kekeirada atail limpoak ong wia doadoahk en katohnpadahk, oh kaukaule raparapahki irail ko me mohngiong mehlel nan kalohk, oh doadoahngki pwuhken Knowledge oh pwuhken sawas teikan en Paipel me Society kin wiahda oh, me keieu kesempwal, kapakapki kaweid en Siohwa, kitail kak ahneki kapai tohrohr en sewese katohnpadahkihla meteikan.” Ekperiens pwukat inenen kaselel. Ahpw, pali moron en neitail tohnsukuhl kan sohte kin mwadang pedolong nan padahk mehlel duwehte met.
9 Ekei Tohnsukuhl kan kin Kekeirada Mwadang sang Meteikan: Kitail en pohnese me koahiek en sounpadahk kan oh tohnsukuhl kan en Mahsen en Koht kin wekpeseng. Kekeiradahn pali ngehn kak pwand de mwadang. Ekei tohnsukuhl kan kin kekeirada mwadang sang meteikan. En emen kekeirada ni pali ngehn kin kohsang ah sukuhl, uwen loalen ah kalahnganki soahng kan me ngehnin, oh uwen loalen ah loalopwoat ong Siohwa. Kaidehn aramas koaros me kitail kin onop ohng kin “ngoangki” en onopki Pwuhk Sarawi rahn koaros, duwehte mehn Peria kan en mahs me pwosonla.—Wiewia 17:11, 12.
10 Ihme kahrehda, insert en Atail Doadoahk Ong Wehio en June 1998, “Anahnepen—Onop en Paipel Tohto,” kin kihda kaweid wet: “Ni mehlel, kaidehn tohnsukuhl en Paipel koaros kin kekeirada duwepenehte. Ekei sohte ahneki lamalam ngehnin duwehte meteikan oh pil sohte mwadang duwehte meteikan en koledi soahng kan me re sukuhliki. Mouren ekei me inenen kedirepw oh sohte kak ahneki ahnsou laud en onopkihla irelaud ehu pwon ehuehu wihk. Ihme kahrehda, nan ekei irair e konehng en onop pak tohto sang ehu pwehn kanekehla ekei irelaud kan oh pil onop sounpwong tohto pwehn kanekehla pwuhko.”
11 Irail kan me Katohnpadahk en Ahneki Lamalam Toupahrek: E konehng en kasawihada kekeiradahn onopo ninduwen irair oh loalokong en tohnsukuhlo. Pwehki kitail kin ale kangoang en tepiada onop kan nan brochure Kupwurki, ele e pahn anahne sounpwong riau de siluh pwehn kanekehla brochure mwohn atail pahn tepiada onop nan pwuhken Knowledge. Ma kitail kin doadoahngki iren sawas kan koaros me kileledi nan insert en Atail Doadoahk Ong Wehio en May 1999, kitail pahn anahne sounpwong weneu lel sounpwong duwau pwehn kanekehla pwuhken Knowledge. Ekei me ahpwtehn tepiada onop nan pwuhken Knowledge kin uhd keseula onopo ong nan brochureo Kupwurki pwehn sewese tohnsukuhlo sukuhlki mwadang padahk mengei kan en padahk mehlel. Mwuri re kin pwurehng pwurelahng onopki pwuhken Knowledge. Ma emen tepikihda onopki pwuhken Knowledge oh kekeirada mwahu, e pahn mwahu en onopki brochure Kupwurki mwurin ah kanekehla pwuhken Knowledge pwehn mwadang kousapahlih padahk mengei kan en Mahsen en Koht. Kitail anahne tamataman me kitail sohte men onop rehn aramas men mwadang pwehn mwadang kanekehla pwuhko, ahpw e sohte uhdahn wehwehki padahk mehlel en Mahsen en Koht. Tohnsukuhl koaros anahne poahsoanen arail pwoson Mahsen en Koht en tengeteng.
12 Pwehki atail wehwehki iawasa kitail mie ni ireirekdohn ahnsou, e inenen karuwaru sang mahso en sewese meteikan sukuhlki padahk mehlel. Likin atail pahn kapakapki me kitail en rapahkihda irail me kapw kan me men onop Paipel, kitail en kapakapki irail ko me se kin onopohng. Eri, kitail pahn perenki papidaisla tohnpadahk tohto “nin rahn akan koaros lao lel ni imwin koasoandi wet.”—Madiu 28:20, NW.