Iaduwen Kitail Kak Doadoahngki Pwuhken Knowledge Pwehn Katohnpadahk

¹ Mehn akadei mwahu ehu me Kristian koaros ahneki iei en padahkiong mehteikan padahk mehlel oh katohnpadahkih irail me “warohng mour soutuk.” (Wiewia 13:​48, New World Translation; Madiu 28:19, 20) Sapwellimen Siohwa pwihn kihong kitail mehn doadoahk kaselel ehu pwehn kak wiahda met​—⁠pwuhk ehu me oaralap koasoia Knowledge That Leads to Everlasting Life. Oaralap en pwuhk wet kin kasalehda kesempwalpen onop Paipel, pwe ma kitail men ale mour soutuk, kitail anahne sukuhliki duwen Siohwa, Koht mehlel, oh pil sapwellime Ohl, Sises Krais.​—Sohn 17:⁠3.

² Ni ahnsouwet, pwuhken Knowledge wia pwuhk me kitail kin keieu doadoahngki pwehn onop Paipel rehn aramas. Ni atail doadoahngki pwuhk wet, kitail kak kasukuhlih aramas ni ahl mengei, sansal oh mwotomwot. Met pahn sewese irail tohnsukuhl en Paipel. (Luk 24:32) Ahpw, e sansal me sounkalohk kan anahne wia padahk mwahu kan. Ihme kahrehda, se wiahda insert wet pwehn kihda mehn sawas kan oh mehn kataman kan ong padahk kan me lipwalipw. Ni ahmw doadoahngki ahmw loalokong oh kasawihada irair en tohnihmwo, ke kak ekis ekis doadoahngki ekei mehn sawas kan de mehn sawas kan koaros me mihmi nan insert wet. Nekidala insert wet oh pwurehng tehk mehn sawas kan. Ire kan me mihmi loale pahn sewese iuk en doadoahngki pwuhken Knowledge ni ahl me keieu mwahu pwehn katohnpadahk.

³ Wia Onop en Paipel me Kin Kekeirada: Kilangwohng tohnsukuhl en Paipel nin duwen emen tohnpadahk en Kristian oh emen riatail brother oh sister ni pali ngehn. Ken kadek ong ih oh ngoangki sewese ih en pedolong nan padahk mehlel. Ni ahmw rongorong kanahieng, ke kak wehwehkihla aramaso​—⁠ah mour en mahs oh irair en mour​—⁠oh soahng pwukat pahn sewese iuk en sewese ih en kekeirada ni pali ngehn. Ken kihwei ahmw ahnsou, kehl oh soahng teikan pwehn sewese tohnsukuhlo.​—1 Deselonika 2:⁠8.

⁴ Mwurin e sansal me aramaso men kaukaule onop Paipel, e pahn mwahu en tepida sang irelaud 1 en pwuhken Knowledge oh onop sang wasao kohla. Met pahn sewese tohnsukuhlo en ekis ekis kekeirada ni ah wehwehkihla padahk mehlel, pwe pwuhko kin koasoi duwen padahk kan en Paipel ni ahl me soandi mwahu. Wia onop en Paipel pwehn mengei en wehwehki oh kin kamwekid tohnsukuhl en Paipel en men kekeirada ni pali ngehn. (Rom 12:11) Ke pahn kilang irair en tohnsukuhl oh ma e kin sukuhliki Paipel mwadang oh mwekidki, oh ma iei, ke kak onopkihong ih irelaud ehu nan awa ehu, oh e sohte pahn nohk karuwaru ong tohnsukuhlo. Tohnsukuhl kan kak kekeirada mwahu ma sounpadahk oh tohnsukuhl koaros sohte pahn kauwehla arail koasoandi en onop ehu ehu wihk. Ma koaros idawehn koasoandi wet, pali tohtohn tohnsukuhl kan pahn kak kanokehla pwuhko pwon (irelaud 19 kan koaros) nan sounpwong weneu de ekis reirei sang.

⁵ Tepkihda onop koaros koasoipen irelaud me kumwa pahn onopki oh koasoia ekei ire kesempwal kan me re pahn sukuhliki nan irelaudo pwe ren men onop irelaudo. Ke pahn kilang me daidel en irelaud koaros kin wia oaralap en irelaudo, oh ke pahn katamankin tohnsukuhlo oaralapo ahnsou koaros. Sawaspen oaralap kan koaros kin koasoia ire kesempwal oh pahn utungada oaralapo. Ken dehr koasoakoasoi ahnsou koaros. Ahpw, ken nantiong kihda peidek kan pwe tohnsukuhlo pahn koasoia pein ah madamadau kan. Wia peidek kan me pahn kahrehong tohnsukuhlo en medemedewe duwen dahme e wehwehkiehr oh en kalaudehla ah wehwehkihla Pwuhk Sarawi. (Madiu 17:​24-​26; Luk 10:​25-​37; kilang pwuhken School Guidebook, pali 51, parakrap 10.) Tehk kanahieng dahme ntingihdi nan pwuhken Knowledge. Ma ke koasoia ire kan likin ire kesempwal kan nan pwuhko, e kak kahrehong tohnsukuhlo en manokehla ire kesempwal kan oh kak kareireila onopo. (Sohn 16:12) Ma tohnsukuhlo wia peidek me sohte pid duwen onopo, pali laud en ahnsou ke kak sapengla peideko ni imwin onopo. Ma ke pahn wia peidek kan ni imwin onopo, e pahn sewese kumwa en wiahda dahme ke koasoanehdi ong wihko. Kawehwehong tohnsukuhlo me ah peidek kan pahn ekis ekis pasepengla nan pwuhko.​—Kilang pwuhken School Guidebook, pali 94, parakrap 14.

⁶ Ma tohnsukuhlo kin kehlail nan ah kamehlele padahk kan me duwehte Trinity, soul sohte kak mehla, aramas suwed kan pahn isihsla nan kisiniei en ehl, oh padahk likamw kan likin mehpwukat, oh e sohte kin itarki pasepeng kan me ntingihdi nan pwuhken Knowledge, ke kak kihong ih pwuhken Reasoning oh pwuhk ehu me kin koasoia duwen ah peidek. Ndaiong ih me mwurin e pahn wadek pwuhko, ke pahn koasoia ong ih duwen oaralapo.

⁷ Tepkihda oh imwikihla onop koaros kapakap ong Siohwa pwehn peki sawas oh kapai oh met pahn kahrehda wahu en mie nan onopo, oh kahrehong koaros en medemedewe soahng ngehnin kan oh kin kahrehong koaros en sohpeiong Siohwa me iei ih Sounpadahk mehlelo. (Sohn 6:​45) Ma tohnsukuhl kin simoak, mwein ke pahn anahne peki reh en ieremen simoak ahnsou me kumwa kin onop.​—⁠Wiewia 24:16; Seims 4:⁠3.

⁸ Padahk Mwahu Ni Ahmw Doadoahngki Iren Paipel kan, Karasaras kan, Kilel kan, oh Peidek en Kousapahl kan: Mendahki ma sounpadahko onopkiehr pwuhken Knowledge mwowe, sounpadahk koahiek men pahn kousapahlih mehn kasukuhlo mwohn e pahn onop rehn aramaso oh medemedewe aramaso ni ah kaunopada. Met pahn kahrehong sounpadahk en medemedewe peidek kan me tohnsukuhlo mwein pahn kihda. Pwehn wia padahk mwahu, ke anahne wehwehkihla mwahu ire kesempwal kan nan irelaudo. Kilang iren Paipel kan oh iaduwen re pid ire ko me kumwa pahn onopki, oh pilada mehnia iren Paipel kan me ke pahn wadek ahnsou me kumwa pahn onop. Medemedewe duwen iaduwen ke pahn doadoahngki kilel kan oh karasaras kan oh peidek en kousapahl kan ni imwin irelaudo nan ahmw pahn padahk.

⁹ Ni ahmw pahn doadoahngki mwahu iren Paipel kan, ke kak sewese tohnsukuhlo en kalahnganki ah onopki Paipel. (Wiewia 17:11) Doadoahngki koakon nan pwuhken Knowledge, ni pali 14, me oaralap koasoia “Put Your Bible to Good Use” (“Doadoahngki Mwahu Noumw Pwuhk Sarawi”) oh sewese ih en rapahki iren Paipel kan. Sewese ih en wehwehki wasa kan me audepen iren Paipel ntingihdi nan pwuhko. Ma kak, kasalehda oh wadek iren Paipel kan me audepen iren Paipel sohte ntingihdi nan pwuhko. Mweidong tohnsukuhlo en koasoia iaduwen iren Paipel kan kin kasansalehda oh kawehwehda dahme ntingihdi nan parakrap. Kasansalehda lepin lokaia kan me kin dokedoke ire kesempwal kan pwehn kahrehong tohnsukuhl en wehwehki kahrepe kan ire kan kin wia ire kesempwal kan nan onopo. (Neh. 8:⁠8) Pali laud en ahnsou, sounpadahko sohte anahne kilang ire Paipel kan likin iren Paipel kan me mihmi nan pwuhko. Koasoia kesempwalpen wehwehkihla eden pwuhk en Paipel kan oh ireirekdi en pwuhk pwukat. Mwein e pahn mwahu ma tohnsukuhl pahn wadek pali 27-​30 nan Watchtower [lokaiahn wai] en June 15, 1991. Kangoange ih en doadoahngki New World Translation ma kak. Ke kak ekis ekis kawehwehda soahng kan me mihmi nan New World Translation, iangahki iren Paipel kan me mihmi ni werengen teh kan (marginal references) oh wasao me kin sewese emen en rapahkihda iren Paipel kan (index of Bible words).

¹⁰ Study 34 nan pwuhken Theocratic Ministry School Guidebook kin kawehwehda iaduwen karasaras kan oh kilel kan kin kamwekid madamadau en tohnihmw oh sewese ih en wehwehkihla madamadau kan me kapw ohng ih. Karasaras kan kin kamwekid loalokong oh pepehm en tohnihmwo pwehn sewese ih en uhdahn wehwehkihla padahko. Karasaras kan kin kamwekid tohnihmwo laudsang lepin lokaia kan me ntingihdihte ire mehlel kan. (Madiu 13:34) Pwuhken Knowledge kin audaudki karasaras tohto me kin padahkiong aramas padahk kan en Pwuhk Sarawi ni ahl me mengei en wehwehki oh kin kamwekid aramas en mwekidki padahk mehlel. Karasepe ehu, irelaud 17 kin tepkihda karasaras mwahu ehu me kin kasalehda iaduwen Siohwa kin kihong sapwellime mwomwohdiso mwenge, likou oh ihmw ni pali ngehn. Oh pil, pwuhken Knowledge kin audaudki kilel kaselel tohto me kin kamwekid pepehm en tohnihmwo. Pahnangin sawaspen oaralap “Kaiasada Kaperen Ehu” ni pali 185, tohnsukuhlo pahn kakehlailla eh kamehlele padahk en kaiasada me kin kawehwehda mwahu nan parakrap 18 ma e pahn kilang kilel ni pali 86. Kilel wet pahn kamwekid ih en kamehlele me kaiasada uhdahn pahn wiawi pahn kaundahn Wehin Koht.

¹¹ Tohnsukuhl en Paipel anahne kekeirada ni pali ngehn ehu ehu ahnsou me e kin onop. Ihme kahrehda, e kesempwal en wia peidek en kousapahl kan nan koakon kan ni imwin irelaud koaros me koasoia “Kasawihada Ahmw Loalokong” (“Test Your Knowledge”). Sounpadahko anahne tehk me tohnsukuhlo sohte pahn ihte wia pasepengpen peideko. Pali laud en peidek pwukat wiawihda pwe tohnsukuhlo pahn kasalehda dahme mihmi nan mohngiongi. Karasepe ehu, kilang pali 31, wasao me tohnsukuhl anahne sapengla peidek wet: “Irair dah kei en Siohwa Koht me kin keieu kamwekid komwi?”​—2 Kor. 13:⁠5.

¹² Sewese Tohnsukuhl kan en Kaunopada ong Onop: Ma tohnsukuhl men pahn wadek onopo mwowe, kilelehdi pasepeng kan, oh medemedewe iaduwen e pahn wia pasepeng kan ni pein eh lokaia kan, e pahn kekeirada mwadang. Ki ahmw mehn kahlemeng mwahu oh ahmw kangoange ih, ke kak sewese ih en kaunopada ong amwa onop. Kasalehong ih pein noumw pwuhk oh iaduwen ke kin kilelehdi lepin lokaia kesempwal kan. Kawehwehda iaduwen e kak rapahkihda pasepeng kan ong peidek kan me mihmi pah. Ke kak sewese ih ma kumwa koaros pahn ehupene oh kaunopada ong ehu irelaud. Kangoange ih en kasalehda ah madamadau ni pein eh lokaia. Ihte ahnsouwo e pahn sansalda ma e uhdahn wehwehki dahme kumwa onopki de soh. Ma e kin kalap pasepeng sang dahme ntingihdi nan pwuhko, ke kak kamwekid ih en kasalehda pein eh madamadau kan ma ke pahn idek reh iaduwen e pahn kak kawehwe ireo ong emen tohrohr ni pein eh lokaia.

¹³ Kangoange tohnsukuhlo en wadek iren Paipel kan me audepe kan sohte ntingihdi nan pwuhko ahnsou me e kin kaunopada pwehki sohte itar ahnsou en wadek iren Paipel kan koaros ahnsoun onopo. Kapinga ih ni eh kin nannanti kaunopada ong amwa onopo. (2 Piter 1:⁠5; kilang Watchtower [lokaiahn wai] en August 15, 1993, pali 13-​14, ong dahme sounpadahko oh tohnsukuhl kak wia pwehn kekeirada ni wia padahk de sukuhliki padahk mehlel.) Ni ahl wet, tohnsukuhlo pahn sukuhliki iaduwen e kak kaunopada ong mihding kan oh wia pasepeng katapan kan nan mihding kan en mwomwohdiso. E pil pahn sukuhliki iaduwen e pahn wia pein ah onop oh met pahn sewese ih en kekeirada ni pali ngehn mendahki ma e kanokehlahr pwuhken Knowledge.​—1 Tim. 4:​15; 1 Piter 2:⁠2.

¹⁴ Kahluwa Tohnsukuhl kan ong Sapwellimen Siohwa Pwihn: Sounpadahk men me nannanti katohnpadahkih aramas akan ahneki pwukoah en kahluwa tohnsukuhlo ong sapwellimen Siohwa pwihn. Tohnsukuhlo pahn kak kekeirada mwadang ni pali ngehn ma e pahn pohnese oh kalahnganki pwihno oh wehwehki me e anahne wiahla tohnpwihno. Kitail men kilang me e kin perenki ehuong sapwellimen Koht aramas akan oh e perenki miniminiong kitail nan Kingdom Hall, oh me e kin perenki ale kangoang ni pali ngehn oh pali pepehm me mwomwohdiso en Kristian kin kihda.​—1 Tim. 3:​15.

¹⁵ Brochure me oaralap koasoia Jehovah’s Witnesses​—Unitedly Doing God’s Will Worldwide wiawihda pwehn sewese aramas en pohnese pwihn sansal me Siohwa doadoahngki rahnwet pwehn wia kupwure. Ni ahnsou me e sansal me aramaso kesempwalki oh nsenohki ah onop, dahme ke soh kihong tohnsukuhl nah brochure wet? Sang nin tepio, luke tohnsukuhl en iang towehda mihding kan. Kahwehwehda dahme kin wiawi ahnsoun mihding kan. Ke kak padahkiong ih oaralap en Kapahrek en Wehi Pokon en Rahn Sarawi kohkohdo oh kasalehong ih artikel nan Kahn Iroir en Rahn Sarawi kohkohdo. Ele mwein ke kak kahre ih en kohla kilang Kingdom Hall ni ahnsou me sohte mihding kin wiawi pwe e sohte pahn salo ni ahnsou me e tepin iang mihding. Ele mwein ke kak idek reh ma e anahne mehn peidaid pwehn iang mihding kan. Ahnsou me e iang towehda mihding, kasamwo ih. (Madiu 7:​12) Padahkihong Sounkadehde teikan oh iangahki elder kan ihs ih. Ele mwein e pahn tepida kilangwohng tohnmwomwohdiso duwehte ah peneinei ni pali ngehn. (Madiu 12:​49, 50; Mark 10:​29, 30) Ele mwein ke kak kihong ih en akadeiong iang ehu mihding ehu ehu wihk oh ahnsou me e lel mehn akadeio, en kihong ih pil ehu mehn akadei.​—Ipru 10:​24, 25.

¹⁶ Ni amwa onopki pwuhken Knowledge, kasalehda ire kan me kin kasalehda ia uwen kesempwal en kaukaule iang towehda mihding en mwomwohdiso kan. Kasalehda pali 52, 115, 137-9, 159, oh pil irelaud 17. Kasalehda pein ahmw pepehm kan me ke kin kalahnganki sapwellimen Siohwa pwihn. (Madiu 24:​45-​47) Koasoiaiong ih soahng mwahu kan me pid mwomwohdiso nan pein ahmw wasa oh dahme ke kin sukuhliki sang nan mihding kan. (Melkahka 84:10; 133:​1-3) E pahn mwahu ma tohnsukuhlo kak kilang video koaros me Society wiahda, tepikihda video me oaralap koasoia Jehovah’s Witnesses​—The Organization Behind the Name. Ma ke men tehk ire kan me kin pid sewese tohnsukuhl kan ong sapwellimen Siohwa pwihn, kilang Watchtower [lokaiahn wai] en November 1, 1984, pali 14-​18, oh insert en Our Kingdom Ministry [lokaiahn wai] en April 1993.

¹⁷ Kangoange Tohnsukuhl kan en Kalohk ohng Mehteikan: Atail mehn akadei iei en katohnpadahkih aramas oh sewese irail en kadehde duwen Siohwa. (Aiseia 43:​10-​12) Met wehwehki me sounpadahko pahn kangoange nah tohnsukuhl en koasoiaiong mehteikan duwen dahme e kin sukuhliki sang nan Paipel. Kitail kak wia met ni mengei ni atail pahn idek rehn tohnsukuhlo: “Iaduwen ke kak kawehwe padahk mehlel wet ong ahmw peneinei?” de “Mehnia iren Paipel ke pahn doadoahngki ma ke men kasansalehda ire wet ong kompoakepahmw?” Kasalehong ih wasa kan nan pwuhken Knowledge me kangoange kitail koaros en kadehde, duwehte pali 22, 93-5, 105-6, oh pil irelaud 18. Ni ahnsou me konehng, ke kak kihong tohnsukuhlo doaropwe kan (tract kan) pwehn en koasoi ong mehteikan oh e kak kihong irail doaropwe pwukat. Ke kak ndaiong ih me e kak luke tohn ah peneinei en iang amwa onop. Mie kompoakepah kan me pil men onop? Idek reh ma e kak padahkiong uhk ihs me e kin ese me kin perenki rong.

¹⁸ Ni tohnsukuhlo kin iang towehda Theocratic Ministry School oh Service Mihding, e pahn ale kaiahn kan oh kangoang pwehn sewese ih en wiahla sounkalohk en rongamwahu. Ni ahnsou me e pahn padahkiong uhk me e men wiahla tohnsukuhl en Theocratic Ministry School oh e men wiahla sounkalohk me saikinte papidais, ke pahn tehk pwuhken Our Ministry [lokaiahn wai] ni pali 98 oh 99 pwehn kilang ma e kin kapwaiada soahng koaros. Ma mie mehkot nan ah mour me kahrehda e saikinte warohng en iang kalohk, ke pahn rapahkihda ire kan nan pwuhken Society kan me pid ireo pwehn sewese ih. Karasepe ehu, mwein emen tohnsukuhl kin apwalki kesehla simoak de kesehla wini en kasaliel kan. Pwuhken Reasoning kin kihda ire kehlail kan sang nan Pwuhk Sarawi duwen dahme kahrehda Kristian kan anahne liksang soangen tiahk suwed pwukat, oh ni pali 112, e kin koasoia iaduwen aramas teikan kesehla tiahk suwed kan. Iang ih kapakapki duwen ire wet, oh ni ahmw wia met, e pahn sewese ih en kilang uwen kesempwal en likih Siohwa pwehn sewese kitail.​—Seims 4:⁠8.

¹⁹ Ma ke men tehk duwen koasoandi en ihs me warohng en iang kalohk, ke kak kilang Watchtower [lokaiahn wai] en January 15, 1996, pali 16, parakrap 6. Ni ahnsou me noumw tohnsukuhl kak iang kalohk, e pahn mwahu ma kumwa pahn praktis dahme e pahn nda ni tepin rahn me e pahn iang kalohk. Ni ahl me mwahu, padahkiong ih duwen dahme aramas kan kin kalap nda oh wia ahnsou me sounkalohk kan kin koasoiong irail. E pahn mwahu ma kumwa kak kalohk ihmw-lel-ihmw tepin rahn me noumw tohnsukuhl pahn iang kalohk, oh mwurin mwo ke kak kaiahne ih en pwurehng pwurala rehn aramas oh tepida onop Paipel rehrail oh soahng pwukat. Ma ke pahn wia ahmw padahk ni mwotomwot oh mengei, e pahn mengei ohng ih en alasang ahmw padahk. Ken kangoange ih oh kasalehda me ke perenki doadoahk en kalohk oh e pahn kilang soahng pwukat oh kahlemengih. (Wiewia 18:25) Mehn akadei en tohnpadahk kapw kan iei en wiahla emen sounkalohk en rongamwahu me kin ngoangki iang kalohk ahnsou koaros. Ele mwein ke kak sewese ih en koasoanehdi ah koasoandi en iang kalohk. Ma ke men sewese ih en koahiekla ni eh pahn kalohk ohng aramas teikan, ke kak kangoange ih en wadek Watchtower [lokaiahn wai] en August 15, 1984, pali 15-​25; July 15, 1988, pali 9-​20; January 15, 1991, pali 15-​20; oh January 1, 1994, pali 20-5.

²⁰ Kamwekid Tohnsukuhl kan en Men Inoukihong Siohwa Arail Mour oh Papidaisla: Emen tohnsukuhl, nin duwen e kin mehlel ong eh rapahki padahk mehlel, kak sukuhliki Pwuhk Sarawi sang pwuhken Knowledge pwehn kak inoukihong Siohwa ah mour oh papidaisla. (Pil kilang Wiewia 8:​27-​39; 16:​25-​34.) Ahpw, mwohn emen pahn mwekidki dahme e sukuhliki oh men inoukihong Siohwa ah mour, e anahne wiahda nanpwung mwahu rehn Siohwa. (Melkahka 73:​25-​28) Erein amwa onop, sewese ih en kalahnganki sapwellimen Siohwa irair kan. Kasalehong ih pein ahmw pepehm loal kan duwen Koht. Sewese noumw tohnsukuhl en kekeirada nanpwung mwahu rehn Siohwa. Ma e kin wehwehki oh poakohng Koht, e kak papah Ih ni lelepek, pwehki lelepek ong Koht kin mwekidki atail pepehm duwen Siohwa.​—1 Tim. 4:​7, 8; kilang pwuhken School Guidebook, pali 76, parakrap 11.

²¹ Nantiong pwehn lel mohngiong en noumw tohnsukuhl. (Mel. 119:11; Wiewia 16:14; Rom 10:10) E anahne wehwehki iaduwen padahk mehlel pahn kamwekid ah mour oh e anahne pilada iaduwen e pahn mwekidki dahme e sukuhliki. (Rom 12:⁠2) E kin uhdahn kamehlele padahk mehlel kan me e kin sukuhliki ehu ehu wihk? (1 Deselonika 2:​13) Pwehn tehk duwen met, ke kak idek rehn tohnsukuhlo peidek kan me kin kahrehong ih en kasalehda pein ah madamadau kan duwehte: Ia ahmw pepehm duwen met? Iaduwen ke kak doadoahngki met nan ahmw mour? Sang dahme e koasoia ke pahn wehwehki ma e anahne sawas pwehn lel mohngiongih. (Luk 8:​15; kilang pwuhken School Guidebook, pali 52, parakrap 11.) Nting kan me mihmi ni kilel kan en pali 172 oh 174 en pwuhken Knowledge kin wia peidek kan duwehte: “Ke inoukihong Koht ahmw mour ni kapakap?” oh pil “Dahme kin kerempwa uhk sang ahmw papidaisla?” Peidek pwukat kin kamwekid tohnsukuhl kan en mwekidki dahme re sukuhliki.

²² Koasoandio me emen en idawehn ong iahd emen sounkalohk me saikinte papidais kak papidaisla mihmi nan Watchtower [lokaiahn wai] en January 15, 1996, pali 17, parakrap 9. Pwuhken Knowledge ntingihdi pwehn sewese aramaso en sapeng “Peidek kan Ong Irail me Men Papidais” me ntingihdi nan pwuhken Our Ministry (appendix), me elder kan pahn kousapahlih reh. Ma ke kin kasansalehda pasepeng kan ong peidek kan me ntingihdi nan pwuhken Knowledge, met pahn sewese tohnsukuhlo en kaunopada mwahu ahnsou me elder kan pahn wia peidek kan ahnsou me e men papidais.

²³ Sewese Irail me Men Kanekehla Onop Paipel ni Imwarail: Ni ahnsou me ke kin kanekehla onopki pwuhken Knowledge rehn emen, e pahn sansal ma aramaso uhdahn men papah Koht de soh. (Madiu 13:23) Ihme kahrehda, ni kaimwseklahn pwuhko, sawaspen oaralap koasoia: “Dahme Komw Pahn Wia?” Parakrap kan me kin kaimwsekla pwuhko kin kahrehong tohnsukuhlo en medemedewe laud duwen nanpwungen ih oh Koht, anahnpen mwekidki dahme e sukuhliki, oh anahnpen mwekid mwadang pwehn kasalehda ah limpoak ong Siohwa. Sohte koasoandi en onop pil ehu pwuhk tohrohr pahn wiawi mwurin emen kanekehla pwuhken Knowledge. Ni ahl kadek oh sansal, kawehwehong tohnsukuhlo me sohte mwekidki loalokong en Koht, dahme e anahne wia ma e men kekeirada ni pali ngehn. Ke pahn tuhwong oh koasoiong ih ekei pak pwe e pahn kak tamataman dahme e pahn wia ma e men ale mour soutuk.​—Ekl. 12:13.

²⁴ Tohnpadahk kapw men me kin mwekidki padahk mehlel oh papidaisla pahn anahne kekeirada ni ah wehwehkihla padahk mehlel pwehn wiahla emen me mah ni pali ngehn. (Kol. 2:​6, 7) Pwehki kumwa sohte pahn onopki pil ehu pwuhk mwurin kumwa kanekehla pwuhken Knowledge, ke pahn kasalehong tohnsukuhlo me ke kak sewese ih ni ah pahn nantiong kekeirada ni pali ngehn. (Kalesia 6:​10; Ipru 6:⁠1) E kak kekeirada ni pali ngehn ni eh pahn wadek Pwuhk Sarawi rahn koaros oh pein onopki The Watchtower oh sawaspen Pwuhk Sarawi teikan me ‘ladu lelepek oh loalokong’ wiahda, oh kaunopada oh iang towehda mihding kan oh koasoiong rie kan ni pali ngehn duwen padahk mehlel. (Madiu 24:45-​47; Mel. 1:2; Wiewia 2:​41, 42; Kol. 1:​9, 10) Ni eh pahn wadek pwuhken Our Ministry oh doadoahngki iren kaweid kan me mihmi loale, e pahn kak soandi mwahu ong ah koasoandi en pali ngehn oh ihme e pahn kak wia ah kalohk ni ahl me keieu mwahu.​—2 Tim. 2:2; 4:⁠5.

²⁵ Kekeirada ni Ahmw Koahiek en Padahk: Pwukoah kohwong kitail koaros en “katohnpadahk . . . , padahkihong irail.” (Madiu 28:​19, 20) Pwehki koahiek en padahk kin pid doadoahk en katohnpadahk, kitail en nannanti kekeirada ni atail koahiek en padahk. (1 Tim. 4:​16; 2 Tim. 4:⁠2) Pwehn sukuhliki pil ekei mehn sawas kan me pahn sewese komwi en kekeirada ni ahmw koahiek en padahk, ke kak wadek: pwuhken School Guidebook, irelaud 10: “Developing the Art of Teaching” oh irelaud 15: “Reaching the Heart of Your Listeners”; oh nan pwuhken Insight, Volume 2: “Teacher, Teaching”; oh The Watchtower [lokaiahn wai] en August 1, 1984, artikel me oaralap koasoia “Building With Fire-Resistant Materials” oh pil “When You Teach, Reach the Heart”; oh March 1, 1986: “Do You Effectively Reason From the Scriptures?”; oh February 15, 1996 “How to Find Joy in Disciple Making”.

²⁶ Ni ahmw pahn nantiong en katohnpadahk oh doadoahngki pwuhken Knowledge, poadidiong Siohwa ni kapakap, pwe Ih “me kin ketin kakairada tuhkeo,” nin duwen e pahn kapaiada ahmw nannanti en lel mohngiong en aramas ki rongamwahu en Wehio. (1 Kor. 3:​5-7) Ni ahmw pahn padahkihong mehteikan en wehwehki oh kalahnganki oh mwekidki loalokong me kin kahluwalahng mour soutuk, ke pahn pehm soangen peren me keieu mwahu!