Tehk Kanahieng Omw “Wiepen Padahk”
“Ke en kalohkiseli mahseno, . . . panawih irail oh kakehlaka irail ni omw kin padahk ni kanengamah oh wiepen padahk.”—2 TIM. 4:2, NW.
1. Kaweid dah me Sises ketikihong sapwellime tohnpadahk kan, oh mehn kahlemeng dah me e ketikihdi?
MENDAHKI doadoahk kaselel akan me Sises kin ketin wia pwehn kamwahwihala soumwahu kan ni eh kin ketiket ni sampah, dahme aramas kan kin keieu esehki ih, kaidehn kamwahwihala soumwahu de eh ketin wiahda manaman akan, ah re ese ih me ih sounpadahk emen. (Mark 12:19; 13:1) Me Sises keieu kesempwaliki iei en lohkiseli rongamwahu en Wehin Koht, oh pil duwehte sapwellime werek kan nan rahn wet. Kristian kan alehdi poangoak ieu ren doudoulahte oh wia doadoahk en wia katohnpadahk, ni arail pahn padahkihong aramas akan ren kapwaiada soahng kan koaros me Sises ketin kehkehlingki.—Mad. 28:19, 20.
2. Dahme kitail anahne wia pwe kitail en kapwaiada atail pwukoahn kalohk?
2 Pwe kitail en kak kapwaiada poangoak en katohnpadahk me kohwohng kitail, kitail kin ahnsou koaros raparapahki ahl en kamwahwihala atail koahiek en padahk. Wahnpoaron Pohl kasalehda kesempwalpen koahiek wet ni ahnsou me e ntinglahng ienge sounkalohk Timoty. E mahsanih: “Kanakanahieng pein kowe oh pil kanahieng omw padahk kan. Nantihong wiewia soahng pwukat, pwe ma ke pahn wia, ke pahn doarehla pein kowe oh pil irail kan me kin rong uhk.” (1 Tim. 4:16) Soangen padahk me mih nan ahn Pohl madamadau kaidehn en ihte kihong aramas loalokong. Kalohk en Kristian me kin kamwakid aramas iei me kin lel nan mohngiong en aramas akan oh kin kangoangehkin irailda ren wiahda wekidekla kei nan arail mour. Met wiepe ieu. Eri iaduwen arail pahn kak kamwahwihala “wiepen padahk,” ni ahnsou me kitail pahn kihong aramas teikan rongamwahu en Wehin Koht?—2 Tim. 4:2.
Kamwahwihala Omw “Wiepen Padahk”
3, 4. (a) Iaduwen atail pahn kamwahwihala atail “wiepen padahk”? (b) Iaduwen Theocratic Ministry Sukuhl eh pahn sewesei kitail en wiahla sounpadahk koahiek kei?
3 Ehu dikseneri kawehwehda “wiepe” me iei “koahiek me kitail kin alehdi sang ni sukuhliki, doadoahngki, de kasakasawih.” Kitail anahne tehk kanahieng soangen ahl siluh pwukat koaros, pwe kitail en kak wiahla tohnpadahk me kak kamwakid madamadau en aramas ni atail kin padahngki rongamwahwo. Ihte me kitail pahn kak alekihdi wehwe pwung en padahk pwoat, iei sang ni atail pahn kin kapakap pek sawas oh eri ahpw mwuri kin onohnop padahko. (Wadek Melkahka 119:27, 34.) Kitail en tehk kanahieng duwen irail sounkalohk kan me arail padahk kin kamwakid madamadau en aramas teikan pwe met pahn sewesei kitail en koledi arail wiepen padahk oh kitail alasang irail. Oh ni atail kin kaukaule nantihong kapwaiada doadoahngki dahme kitail sukuhliki pahn kin sewesei kitail kalaudehla atail koahiek.—Luk 6:40; 1 Tim. 4:13-15.
4 Siohwa iei atail Sounkaweid Lapalap. Ki sapwellime pwihn sansal nin sampah, e kin ketikihda kaweid ong sapwellime ladu kan nan sampah, me pid duwen wiepen arail doadoahk en kalohk. (Ais. 30:20, 21) Pwehki kahrepe wet, mwomwohdiso koaros kin wia Theocratic Ministry Sukuhl nan ehuehu wihk kan koaros, pwehn sewese irail tohnsukuhl kan en wiahla sounkalohk en Wehin Koht ekei me kak wia padahk me pahn kamwakid madamadau en aramas akan. Pwuhken kasukuhl me keieu kesempwal nan sukuhlo iei Paipel. Mahsen en Siohwa kin mahsanihong kitail dahme kitail en padahngki. Patehng met, e pil kin mahsanih mehnia wiepen padahk me konehng oh kin lel madamadau en aramas. Theocratic Ministry Sukuhl, kin kaukaule katamankin kitail me met pahn kalaudehla atail koahiek en wia sounpadahk kei ma atail padahk kin poahsoankihda Mahsen en Koht, doadoahngki mwahu peidek kan, wia padahk mengei, oh kasalehda ni mehlel me kitail kin nsenohki aramas teikan. Kitail kak tehkpene ehuehu ire pwukat. Mwurin mwo, kitail pahn uhd koasoiapene iaduwen atail pahn kamwakid mohngiong en tohnsukuhl men.
Omw Padahk en Poahsoankihda Sapwellimen Koht Mahsen
5. Dahme pahn wia poahsoanpen atail padahk, oh pwekida?
5 Sises, me wia sounpadahk me mih pohnangin aramas koaros, sapwellime padahk kan kin poahsoankihda iren Pwuhk Sarawi kan. (Mad. 21:13; Sohn 6:45; 8:17) E sohte kin mahmahsenki pein ih, ahpw e kin mahsen ni mwaren ih me ketin kadarodo. (Sohn 7:16-18) Iei met mehn karasepe me kitail kin idawehn. Kahrehda, dahme kitail kin koasoia ni atail kalohk sang ihmw-lel-ihmw, de atail kin wia onop en Paipel rehn aramas akan en kin poahsoankihda Mahsen en Koht. (2 Tim. 3:16, 17) Sohte atail koahiek en koasoakoasoi me pahn kak pahrekiong pweida mwahu oh kehl me kin kohsang nan iren Pwuhk Sarawi kan. Mahsen en Paipel me manaman. Soangen ire koaros me kitail kin songosong sewesehki tohnsukuhl en Paipel men en koledi, elen kasukuhl me keieu mwahu iei en kihong ih en pein wadek dahme iren Pwuhk Sarawi kan kin mahsaniheki ireo.—Wadek Ipru 4:12.
6. Iaduwen sounpadahk emen eh pahn kaunopada mwahu pwe tohnsukuhlo en kak uhdahn wehwehki ire me ira onohnopo?
6 Met kitail sohte koasoia me Kristian sounpadahk emen sohte anahne kaunopadahng eh wia onop en Paipel. Kitail pahn kin tehkada mwahu oh medemedewe mehnia iren Pwuhk Sarawi kan me pwarada wasahn kasukuhlo me sounpadahko de tohnsukuhlo pahn wadek. Ni oaralap, e mwahu en wadekpene iren Pwuhk Sarawi kan me kin utungada dahme kitail kin kamehlele. E pil kesempwal en sewese tohnsukuhlo en kak uhdahn wehwehkihla ehuehu ire me e wadek.—1 Kor. 14:8, 9.
Doadoahngki Peidek Mwahu kan
7. Dahme kahrehda doadoahngki peidek wiahki elen kasukuhl mwahu ieu?
7 Koahiek en doadoahngki peidek kan kin kahrehiong aramas en kak medemedewe oh kin sewese sounpadahko en lel mohngiongin tohnsukuhlo. Kahrehda, e konehng ken dehr kawehwe ong tohn sukuhlo iren Pwuhk Sarawi kan, ahpw ndahng en kawehwehiong uhk. Ekei pak peidek ehu de peidek kapatapat kei anahne wiawi pwe en sewese tohnsukuhlo en kak diarada wehwe pwung. Ni omw pahn doadoahngki peidek pwehn onop ong tohnsukuhlo, soangen sawas wet sohte pahn sewesehte ih en kilang kahrepen pasapengo e wia mwo, ahpw e pahn pil pein kamehlelehiong ih me iei madamadau pwungen mwo.—Mad. 17:24-26; Luk 10:36, 37.
8. Iaduwen atail kak diarada dahme uhdahn mihmi nan ahn tohnsukuhlo mohngiong?
8 Wiepen onop en neitail pwuhk kan kin wiawi ni mwomwen peidek kan oh pasapeng kan. Ni mehlel, pali laud en aramas akan me ke onop Paipel rehrail pahn mwadangete kakehr sapengla peidek me nting nan pwuhken onopo ni arail pahn kilang nempe en parakrap akan me pahrekiong nempe en peideko. Ahpw pil, sounpadahk tehk wasa men sohte pahn itarkihte pasapengpen peidek pwukat kelehpw. Karasepe, tohnsukuhl emen pahn kak kawehwehda ni pwung dahme Paipel mahsanih duwen dipen nenek. (1 Kor. 6:18) Peidek keneinei kan me pid eh pepehm, pahn kak kasalehda dahme eh madamadau duwen dahme e wie sukusukuhlikio. Sounpadahko eri kak idek: “Dahme kahrehda Paipel mahsaniheki me wia nsenen pwopwoud nanpwungen riemen me sohte pwopwoud e sapwungki? Ia ahmw madamadau duwen Sapwellimen Koht koasoandi en keinapwidi soangen tiahk wet? Ke leme pahn mie kamwahu me kitail kak alehsang atail peikiong sapwellimen Koht koasoandi en tiahk mwakelekel akan?” Pasapeng en soangen peidek pwukat kak kasalehda dahme uhdahn kin mihmi nan mohngiong en tohnsukuhlo.—Wadek Madiu 16:13-17.
Wie en Mengei
9. Dahme kitail en tamataman ni atail pahn ehukihong meteikan kaweid en Pwuhk Sarawi?
9 Pali laud en padahk mehlel akan nan sapwellimen Koht Mahsen kin mengei en wehwehki. Dahme kakete wiawi, mwein ele aramas akan me kitail kin onop Paipel rehrail akan, arail madamadau kin pingkihda padahk kan me re koledihsang nan sarawi likamw. Atail pwukoa nin duwen atail wia sounpadahk kei iei en wiahiong padahk en Paipel akan en mengei en wehwehki. Sounpadahk pweida mwahu kan kin wiahda padahk en Paipel akan en mengei, sansal, oh pwung. Ma kitail pahn idawehn mehn kaweid wet, kitail sohte pahn wiahiong padahk mehlel akan en apwal en wehwehki. Ma e sohte anahn a ieremen nohn wia padahk oaritik. Kitail sohte anahne kawehwehda soahng koaros me kitail wadek nan iren Pwuhk Sarawi ieu. Ni mengei, koasoakoasoiahte dahme anahn pwehn kawasakada iren madamadau me kumwa nantihong wehwehkihpene. Tohnsukuhlo pahn ahpw ekisekis wehwehkihla padahk en Pwuhk Sarawi loal akan ni eh wehwe eh pahn lalaudla.—Ipru 5:13, 14.
10. Dahme pahn kasalehda ia uwen me kitail pahn sukuhliki nan ehu ahnsou en onop Paipel?
10 Ia uwen me aramas pahn onopki ni ehu ahnsou en onop? Pwe kitail en ese, atail pepehm en tenekihda dahme mwahu me anahn. Uwen kak oh irair me tohnsukuhlo oh sounpadahko ahneki kin wekwekin, ahpw kitail en ahnsou koaros tamataman me atail mehn akadei ni atail wia sounpadahk kan iei en sewese tohnsukuhl emen en kauwada pwoson kehlail. Kahrehda kitail kihong ih ahnsou itar en wadek, wehwehki, oh pwungkihla padahk mehlel akan nan sapwellimen Koht Mahseno. Kitail dehr onop daulihala uwen me e kak koledi ni ahnsou kiste. Ahpw ni ahnsowohte kitail en kolokol onopo ni uwen mwadang me konehng. Ma tohnsukuhlo koledier iren madamadau ieu, eri doula oh koasoia pil ehu.—Kol. 2:6, 7.
11. Mehn kahlemeng dah me pid padahk me kitail kak sukuhlikihsang rehn wahnpoaron Pohl?
11 Wahnpoaron Pohl kin padahngki rongamwahwo ni mengei ni eh kin padahk ong irail me kapw akan. Mendahte a wia aramas sukuhl laud emen, e sohte kin doadoahngki lepin lokaia laud akan. (Wadek 1 Korint 2:1, 2.) Padahk mehlel en Pwuhk Sarawi me kin mih ni kawehwe mengei kin koledi madamadau en irail me nan kapehd mehlel akan. Sohte aramas anahne en sukuhl laud pwe en wehwehki.—Mad. 11:25; Wiewia 4:13; 1 Kor. 1:26, 27.
Sewese Tohnsukuhl akan en Kesempwaliki Dahme Irail Onohnop
12, 13. Dahme kak kamwakid madamadau en tohnsukuhl emen en doadoahngki nan eh mour dahme e wie suksukuhliki? Karasahda.
12 Pwe en kak kamwakid madamadau, atail padahk anahne en lel mohngiongin tohnsukuhlo. Tohnsukuhlo en wehwehki iaduwen mahseno eh pahn sewese eh mour, iaduwen eh pahn wia kamwahu ieu ong ih, oh iaduwen eh mour eh pahn mwahula sang mahs ma e pahn doadoahngki kaweid en Pwuhk Sarawi.—Ais. 48:17, 18.
13 Karasepe, mwein kitail kin onohnop Ipru 10:24, 25, me kin kangoangehki Kristian akan en iang iangarail teikan oh pokonpene pwe irail en kak ale kangoang en Pwuhk Sarawi oh ahnekihpene werek limpoak. Ma tohnsukuhlo saikinte iang towehda mihding en mwomwohdiso kan, kitail kak oaralapihada ong ih iaduwen mihding pwukat ar kin wiawi oh padahk dah me kin wiawi. Kitail kak nda me mihding kan iei kisehn atail kaudok oh kasalehda me e kin sewese atail mour. Mwurin mwo kitail ele kak luke tohnsukuhlo en iang towehda. Eh mwekidiki poangoak en Pwuhk Sarawi kan, en poahsoankihda eh men peikiong Siohwa, ah kaidehn pwehn kaperenihada aramas me kin wia onop reh.—Kal. 6:4, 5.
14, 15. (a) Dahme tohnsukuhl en Paipel emen kak sukuhliki duwen Siohwa? (b) Iaduwen loalokongkihla sapwellimen Koht irair kak wia kamwahu ong tohnsukuhl en Paipel emen?
14 Utupen kamwahu me tohnsukuhl akan kin alehsang arail onop Paipel oh kapwaiada mour en padahk kan iei arail kin esehla oh poakohngala Siohwa. (Ais. 42:8) Kaidehn e wiahte Sahm limpoak emen oh Soun kapikipik oh sapwellimaniki lahng oh sampah, ahpw e pil ketin kasalehda sapwellime irair oh koahiek kan ong irail me poakohng oh papah ih. (Wadek Eksodus 34:6, 7.) Ni ahnsou me Moses kereniongehr en kahluwa wehin Israel sang nan kanaudok en Isip, Siohwa ketin kawehwehda pein ih ni eh ketin doadoahngki mahsen pwukat: “Ngehi iei uhdahn ngehi.” (Eks. 3:13-15) Met kin wehwehki me Siohwa pahn ketin wiahla soahng sohte lipilipil me anahn pwe en kak ketin wiahda sapwellime koasoandi kan ong sapwellime aramas pilipil akan. Kahrehda mehn Israel akan esehla me Siohwa ketin wia Soundoar, Soun mahwen, Soun ketikihda atail anahn akan, oh Soun kaunsekihala inou kan oh pil soangen pwukoa tohrohr teikan.—Eks. 15:2, 3; 16:2-5; Sos. 23:14.
15 Ele neitail tohnsukuhl akan sohte kin ale nan arail mour sapwellimen Siohwa sawas manaman akan, me duwehte dahme Moses alehier. Ahpw ni neitail tohnsukuhl akan arail kin kekeirda nan pwoson oh nan arail perenki dahme irail sukuhlikihier akan oh irail tepidahr doadoahngki nan arail mour, ni mehlel irail pahn kilang anahnepen irail en likih Siohwa ong lamalam kehlail, erpit, oh kaweid. Ni arail pahn wia met, irail pil pahn esehla duwen Siohwa nan sapwellime pwukoa en wia Sounkaweid erpit oh likilik, oh Sounsawas me kin sapankihda arail anahn akan koaros.—Mel. 55:22; 63:7; Lep. Pad. 3:5, 6.
Kasalehda Nsenoh ni Limpoak
16. Dahme kahrehda koahiek me kitail ipwikihdi kaidehn iei me keieu kesempwal ong atail pahn wiahla tohnpadahk pweida mwahu men?
16 Ma ke pepehm me ke sohte ahneki uwen koahiek en padahk nin duwen me ke mwahuki, ke dehr mworusala. Siohwa oh Sises kin ketin kaweid koasoandi en kasukuhl me wiewiawi ahnsou wet nan sampah pwon. (Wiewia 1:7, 8; Kaud. 14:6) Ira pahn kak kapai atail nannanti kan pwe atail koasoi en kak kamwakid aramas emen me ahneki mohngiong pwung. (Sohn 6:44) Ahn sounpadahk emen eh limpoak mehlel ong nah tohnsukuhl pahn kapahrakihala soangen soakoahiek koaros. Wahnpoaron Pohl kasalehda me e wehwehki kesempwalpen limpoak ong irail akan me wia nah tohnsukuhl.—Wadek 1 Deselonika 2:7, 8.
17. Iaduwen atail kak kasalehda nsenoh mehlel ong emenemen tohnsukuhl en Paipel akan?
17 Ni ahlohte, kitail kak kasalehda nsenohki mehlel emenemen neitail tohnsukuhl en Paipel kan sang ni atail kin kihong ahnsou pwe kitail en esehla ih. Ni ahnsou kitail onop mour en padahk en Pwuhk Sarawi kan reh, kitail pahn kakete esehla eh irair akan me e mihmi loale. Kitail kak kasawihada me e kin tepidahr mourki ekei soahng kan me e sukuhlikihsang nan Paipel. Ahpw ele e kin anahne wia wekidekla kan ong nan soangen wasa kei. Eri sang ni atail kin sewese tohnsukuhlo en kilangada iaduwen eh pahn kak doadoahngki dahme e kin suksukuhliki sang nan Paipel nan eh mour, eri kitail pahn kak sewese ih ni limpoak pwe en wiahla tohnpadahk en Krais mehlel emen.
18. Dahme kahrehda e kesempwal en iang neitail tohnsukuhl men kapakap oh pil kapakapki ih?
18 Me keieu kesempwal sang koaros, kitail kak iang tohnsukuhlo kapakap oh pil kapakapki ih. En wehwe mwahu ong ih me atail mehn akadei iei en sewese ih en esehla mehlel eh Sounkapikadao, oh karanihala ih, oh ale kamwahu sang ni Sapwellime elen kaweid. (Wadek Melkahka 25:4, 5.) Ni ahnsou me kitail kin kapakapki sapwellimen Siohwa kapai en iang ahn tohnsukuhl men eh kin songosong en doadoahngki dahme e kin suksukuhliki, tohnsukuhlo pahn kilangada kesempwalpen en ‘kapwaiada mahsen en Koht.’ (Seims 1:22) Oh ni tohnsukuhlo eh pahn kin rong atail loalenohng atail kapakap, pil ih pahn esehla iaduwen eh pahn wia kapakap. Ia uwen kaperen ni atail kin sewese tohnsukuhl en Paipel akan ren kakairada pein arail ehuong Siohwa!
19. Dahme kitail pahn tehkpene nan artikel en mwurin met?
19 E kin wia mehn kangoangpatail en ese me pohnangin Sounkadehde wenerar (million weneu) nan sampah pwon kin kedirepwki en kamwahwihala oh koahiekla ni ar ‘wiepen padahk’ pwehn sewese irail me ahneki mohngiong mehlel akan en kak kapwaiada mehkan koaros me Sises ketin kehkehliki. Ia pweida kan me kohsang atail doadoahk en kalohk? Pasapengpen peidek wet iei me kitail pahn tehkpene nan artikel en mwurin met.
Ke Tamataman?
• Dahme kahrehda Kristian akan anahnehki kamwahwihala arail “wiepen padahk”?
• Doadoahngki mehnia ahl pahn kak wiahiong atail padahk en kak kamwakid madamadau?
• Dahme pahn kak kapahrek soh itar akan me kitail ahneki ong atail koahiek en padahk?
[Kawehwehpen kilel kan nan ehu ehu pali 11]
Ke kihlongehr edomw nan Theocratic Ministry Sukuhl?
[Kawehwehpen kilel kan nan ehu ehu pali 12]
Dahme e kesempwaliki ken kangoangehki noumw tohnsukuhlo en wadek Paipel?
[Kawehwehpen kilel kan nan ehu ehu pali 14]
Iang noumw tohnsukuhlo kapakap oh pil kapakapki ih