“Se Sohte Kak Tokedihsang Koasoakoasoi”
1 Sises Krais kin tehk kanahieng duwen dahme wiawi nan doadoahk en kalohk. (Madiu 28:20; Mark 13:10) Mendahki ma sounkalohk wenerar samwa kin iang doadoahk en kalohk nan sahpw 234, kitail sohte kak lemeleme me atail doadoahk en kalohk nekier. Lao lel Koht pahn kehsehkin kitail me doadoahk wet nekier, kitail “sohte kak tokedihsang koasoakoasoia” duwen soahng kan me kitail sukuhlikier.—Wiewia 4:20.
2 Mweidohng Sapwellimen Koht Ngehn Sarawi en Sewese Iuk: Sehdan kin doadoahk laud pwehn kaluwetala kitail. (Kaudiahl 12:17) Pwehki kitail soh unsek, atail ineng suwed kan kin kasonge kitail. Mehpwukat koaros kin kahrehong kitail en sohpeiweisang atail doadoahk me keieu kesempwal: doadoahk en kalohk. Ahpw, ma kitail kin likih Siohwa, e pahn kadarodo sapwellime ngehn sarawi pwehn sewese kitail en powehdi kahpwal kan.
3 Ni ahnsou me mwomwohdiso en Kristian nan keieu senturi kin lelohng kalokolok, riatail kan kin kapakapkiong Siohwa sawas pwehn koasoia sapwellime Mahsen ni eimah. Siohwa sapengla arail kapakap, kihong irail sapwellime ngehn sarawi oh kihong irail ngoang oh eimah me re anahne pwehn kalohk. Pwehki met, re nantihong kalohki Rongamwahu ni eimah.—Wiewia 4:29, 31; 5:42.
4 Dehr Luwetala Mendahki Ma Ke Kin Rong Lokaia me kin Kauwe Sapwellimen Siohwa Aramas: Kitail en dehr mweidong dahme aramas akan kin lemeleme de nda duwen kitail de ahnsou me kitail kin rong aramas kauwe sapwellimen Siohwa aramas en kaluwetala kitail. Ahpw, tamanda dahme Piter oh wahnpoaron teikan mahsanih ong Tohn Mwoalen Kopwung Lapalapo, nin duwen me ntingihdi nan Wiewia 5:29-32. Nin duwen me emen sounpadahk en Kosonnedo wehkada, sohte me kak kauhdi doadoahk en Koht. Doadoahk en Koht sohte wiawi sang ni pein atail kehl. Koht kin utungada oh kamwekid sapwellime doadoahk en wiawi, oh Ih kelepw me pahn kahrehda doadoahk wet en pweida!—Sekaraia 4:6.
5 Kitail en peki rehn Siohwa ahnsou koaros en kadarodo sapwellime ngehn sarawi pwehn sewese kitail en kalohki Rongamwahu ni eimah oh ngoang. Kitail en pil nda, duwehte Seremaia, me Mahsen en Koht me pid sapwellime Wehi kin rasehng kisiniei me lullul nan kapehdatail. (Seremaia 20:9) Kitail sohte kak nennenla!