“Mehkoaros en Wiawihong Kamwahupen Mwomwohdiso”
1 Ahnsou koaros, kitail en wia dahme mwahu ong riatail brother oh sister kan. Met kin wehwehki me kitail pahn nsenohki arail pali ngehn. Ma kitail pahn wia atail pisnis me kitail kin netkihla dipwisou de sahpis ong aramas, kitail pahn tehk kanahieng me soahng koaros me kitail pahn wia sohte pahn kadipekelekelih riatail brother oh sister kan.—2 Kor. 6:3; Pilipai 1:9, 10.
2 Ekei riatail kan kin wia pisnis me re kin kilangwong brother oh sister teikan nin duwen aramas me kak pwainda mehkot sang irail. Ekei pisnis kan kin padahkiong neirail tohndoadoahk kan me re pahn netkihong aramas sohte lipilipil—iangahki irail me kin iang arail pelien lamalam. Ekei riatail kan me kin koasoanehdi tuhpene laud kan pwehn kangoange irail en iang pisnis ehu. De ekei kin koasoanehdi aramas pwehn netkihong riarail kan dipwisou kan de doaropwe kan, soahng kan me pid Internet de cassette kan (video oh audio tape kan). E konehng en isaneki kadek en riatail kan nan mwomwohdiso? Soh!—1 Kor. 10:23, 24, 31-33.
3 Kitail Anahne Kanahieng: Met sohte kin wehwehki me emen Kristian sohte kak wia pisnis rehn pil emen Kristian. Ke kak wia pein ahmw pilipil duwen ire wet. Ahpw, ekei kin men wia pisnis rehn mehteikan me kin kahrehong mehteikan en noahrok, oh re kin peki rehn riatail kan en iang irail de pwain sang irail oh utungada arail pisnis. Pali laud en soangen pisnis pwukat kin sohte pweida, oh irail me iang pid pisnis pwukat kin luhskihla mwohni laud. Mendahki irail me iang pisniso mwekidki ineng en mwadang ale mwohni laud, met sohte wehwehki me irail me kangoange mehteikan en iang soangen pisniso sohte pwukoahki mehkot ma pisniso sohte pweida. E anahne medemedewe mwowe dahme pahn wiawiong rie ko ni pali ngehn oh ni paliwar ma ah pisniso sohte pahn pweida. Irail me ahneki pwukoah nan mwomwohdiso pahn anahne kanahieng duwen dahme re kin wia nin duwen pisnis pwe tohnmwomwohdiso kin wauneki irail, likih irail oh koapworopworki irail. E pahn sapwung en kauwehla likilik me kohwong irail. Pwukoah kan kak kohsang brother men ma mehteikan solahr kin wauneki ih.
4 Atail mehn akadei iei en “mehkoaros en wiawihong kamwahupen mwomwohdiso.” (1 Kor. 14:26) Kitail pahn wia uwen me kitail kak en dehr mweidong wiepen pisnis en pid tohnmwomwohdiso de kahrehong tohnmwomwohdiso en utungada soangen pisnis. E sohte pahn konehng atail tuhpene ong mehkan me ngehnin en pid pisnis.—Ipru 10:24, 25.