Pali 1: Wia Onop en Paipel Rehn Aramas akan Ni Ahl me Pahn Sewese Irail en Kekeirada Mwahu
Dahkot Paipel Study?
1 Nan sampah pwon, sapwellimen Siohwa aramas akan kin onop Paipel rehn aramas million pak 6 ehu ehu sounpwong. Ni atail pahn doadoahngki wiepen padahk oh kasukuhl kan, kitail kak sewese irail me kin onop Paipel rehtail en kekeirada mwahu ni pali ngehn lao lel arail pahn inoukihong Siohwa arail mour oh papidaisla “pwe irail en pil kak warohng kasukuhlih meteikan.” (2 Tim. 2:2) Ke men sewese aramas me ke onop reh en kekeirada mwahu ni pali ngehn? Tepida sang artikel wet, Atail Doadoahk Ong Wehio pahn kasalehda artikel kei me pahn koasoia duwen ire kan me pahn sewesehda onop en Paipel me kin pweida mwahu.
2 Iahd me Konehng en Ripohtki Ahmw Paipel Study: Ma ke kin kaukaule koasoiaiong emen duwen Paipel, mehnda ma mwotomwot, oh ke kin doadoahngki Paipel iangahki sawaspen Paipel kan me konehng en onopki, met wehwehki me ke onop Paipel rehn aramaso. Ke kak onop Paipel rehn aramas ni ahnsou me kumwa kesikesihnen ni wenihmwo de ke kak pil onop Paipel rehn aramas ni amwa doadoahngki telephone. Ke kak ripohtki ahmw Paipel study mwurin ahmw pahn onop reh pak siluh (tepin onop kak wia kamwomwada koasoandi en onop) oh ma ke kamehlele me aramaso pahn pousehla onop Paipel.
3 Pali laud en ahnsou, kitail kin doadoahngki Kupwurki brochure de pwuhken Loalokong en onop Paipel rehn aramas akan. Mwurin amwa kanekehla onopki Kupwurki brochure oh pwuhken Loalokong oh ke kilang me e wia kekeirada ni pali ngehn, mehnda ma e ekis ekis kekeirada, oh e kin kalahnganki dahme e sukuhliki, ke kak tepida onop pwuhken Kaudok (Worship God). Ke kak doadoahngki brochure Ke Kak Kompoakepahnki Koht! en onop rehn irail me sohte sukuhl de ekis sukuhl oh apwaliki wadawad.
4 Doadoahk en onop Paipel rehn aramas kin sewese aramas rar rar kei en wiahla tohnpadahk mehlel kan en Sises Krais. (Madiu 28:19, 20) Sang ni ahmw pahn doadoahngki kaweid nan artikel kan me mihmi pahn oaralap wet nan sounpwong kohkohdo kan, ke kak sewese aramas me ke kin onop Paipel reh en kekeirada ni pali ngehn.