Wia Onop en Paipel Rehn Aramas akan me Ke Pahn Koasoiong Irail ni Arail Wenihmw de Doadoahngki Telephone
1. Ia kahrepen atail kin wia onop Paipel rehn aramas akan?
1 Ia uwen kaperen en tepida onop Paipel rehn aramas emen! Ahpw, ni mehlel, en diar emen me men onop Paipel iei tepin koasoandio. Kahrepen atail kin onop Paipel rehn aramas men iei en sewese ih en wiahla tohnpadahk mehlel en Krais. (Madiu 28:19, 20) Dahme kak sewese kitail en alehdi mehn akadei wet?
2. Ia mwomwen sounkalohk men kak wia onop en Paipel rehn aramas ni arail wenihmw de nan telephone, oh dahme kahrehda re kin pweida?
2 Aramas Kedirepw kan: Aramas akan kin inenen kedirepw nan rahn pwukat. Nan ekei wasa, aramas malaulaute me kin kak en koasoanehdi awa ehu pwe en onop Paipel. Pwehn kak sewese soangen aramas pwukat, kitail kin ale mehn kangoang en tepida onop Paipel rehrail ni ahnsou mwotomwot ni arail wenihmw de nan telephone. Mwein nin tepio, onop pwukat pahn mwadang oh mwein ke kak wadek oh kawehwe iren Paipel riau de siluh oh wia parakrap ehu de riau nan pwuhken Loalokong de pwuhken Mour Kohkohlahte. Ia uwen e kin wia mehn kaping ong irail sounkalohk kan me ahnsou wet kin wia onop en Paipel rehn aramas ni arail wenihmw de nan telephone!
3. Dahme kahrehda kitail anahne nantihong en kalaudehla atail ahnsou en onop Paipel ong irail akan me kitail kin koasoiong ni arail wenihmw?
3 Ahpw, iaduwen—kitail pahn itarki en ihte koasoiong aramas akan ni arail wenihmw kan ahnsou koaros kitail kin kohla? Soh. Mendahki kitail pahn doadoahngki atail loalokong oh kitail sohte pahn koasoi werei ni atail tepin onop rehn aramas akan, Atail Doadoahk Ong Wehio en May 1990, pali 8 koasoia: “Ni ahnsou me ke tepidahr onop Paipel rehn aramas men, oh e sansal me e men kalaudehla ah wehwehki padahk mehlel, eri, anahne kalaudehla ahnsou.” Met kesempwal. Karasepe: Seri men me duhpek mwein kin anahne ken tepikihda kihong ih kisin mwenge tikitik lao e medila. Kitail sohte kak kasik serio en kehlailda oh kekeirada ma kitail pahn doulahte kihong ih kisin mwenge tikitik kohkohlahte. Duwehte aramas me kin onop Paipel, e kin anahne onop kaukaule oh soandi mwahu pwehn kak kekeirada oh mahla ni pali ngehn oh wiahla sapwellimen Koht ladu koahiek men.—Ipru 5:13, 14.
4. Ia kamwahupen onop Paipel nan ihmw?
4 Onop Paipel nan Ihmw: E pahn mwahu en onop Paipel nan wasa ieu me sohte nohn tohto aramas—duwehte nan ihmw de wasa teikan me meleilei. Met pahn wia kamwahu ehu ong ni emen e pahn sukuhliki oh wehwehkihla Mahsen en Koht. (Madiu 13:23) Met pahn pil sewese sounkalohk me onop rehn aramaso en kak nsenohki ahn aramaso anahn en pali ngehn. Oh pil, en kalaudehla ahnsoun onop pahn kahrehiong ara pahn kak onopki iren Paipel kan ni oaritik oh pahn pil kakehle ah pwoson Mahsen en Koht.—Rom 10:17.
5. Iaduwen atail kak wekidala onop me kin wiawi ni wenihmw akan en uhd wiawi nan ihmw?
5 Iaduwen ahmw pahn kak kahrehiong onop me kin wiawi ni wenihmw akan en uhd wiawi nan ihmw? Mwurin ahnsou kei me ke onop rehn aramaso ni ahnsou mwotomwot, ke soh idek reh ma e men onop ekis reireisang mwo oh kasalehda ni oaritik ia uwen werei? De ke kak idek rehn aramaso, “Mie ahmw ahnsou rahnwet me kita kak mwohndi oh koasoiapene ire wet?” de “Ia uwen ahnsou me ke mwahuki kita en koasoiapene duwen ire wet rahnwet?” Ma ke kin nantihong wia mehpwukat ahpw sohte pweida, ke kak doulahte wia onop ni ah wenihmw ni ahnsou mwotomwot. Ni ahnsou me konehng, nantihong wiahda wekidekla pwe kumwa en onop nan ihmw.
6. Ia atail mehn akadei ni atail kin wia atail doadoahk en kalohk, oh iaduwen iren sawas kan nan artikel wet kak sewese kitail en alehdi mehn akadei wet?
6 Ni atail kin doulahte rapahki irail me kin perenki rong, kitail en dehr manokehla kahrepen atail kin tepiada oh wia onop en Paipel rehn aramas akan. Atail mehn akadei iei en sewese irail me mohngiong mehlel kan en inoukihong Siohwa arail mour oh papidaisla nin duwen sapwellimen Siohwa ladu kan. Siohwa en kapai atail nannanti ni atail kin doula kapwaiada mehn akadei wet.—2 Timoty 4:5.