Medemedewehte Atail Doadoahk en Katohnpadahk
1. Dahme anahn pwe aramas akan en kak komourla?
1 Ripoht en kalohk en pahr 2014 kasalehda duwen ngoang en sapwellimen Koht aramas akan ar tengedihong kalohki rongamwahu en Wehio. (Mad. 24:14) Sang ni doadoahk en ihmw lel ihmw, doadoahk tohrohr en kihseli kisin doaropwe oh doaropwehn luhk kan, oh wiepe kapw kan ong atail kalohk en wehipokon, kitail kin lohkiong aramas tohto rohng en Paipel tohtohsang mahs. Ahpw, pwe irail en iang komourla, kitail anahne sewese irail en wiahla sapwellimen Sises tohnpadahk kan sang ni atail kin onop rehrail.—1 Tim. 2:4.
2. Soangen peidek dah kei kitail kak pein idek rehtail me kak sewese kitail en kin nantihong tapiada ehu onop en Paipel?
2 Ahnsou Koaros Onopada Pwe Ken Wia Ehu Onop en Paipel: Ahnsou me emen kasalehda me e perenki rong, ke kin nantihong en alehdi ire kan me pid duwen ih oh mwadang pwurala reh pwe ken kak akadeiong tapiada onop en Paipel? Iahd me ke song en tapiada onop en Paipel ni omw tepin tuhwong aramas men? Iahd me ke song en tapiada onop en Paipel rehn emen me ke kin kaukaule wahla makasihn reh? Mie pak me ke kasalehiong iengomw tohndoadoahk kan, mehn mpomw kan, kisehmw kan, oh meteikan me ke ese kasdohn Dahme Kahrehda Ken Onopki Paipel? oh Dahme Kin Wiawi ni Ahnsoun Onop Paipel? Ni omw kin doadoahngki tehpel en kasalehda pwuhk kan, ke kin nantihong en padahkihong irail kan me ale pwuhk me e kin mie onop en Paipel ni soh isepe?
3. Pwe kitail en padahkihong meteikan me mehlelo, dahme anahn?
3 Sawas Sang Siohwa oh Sises: Pwehki e tepikihda lepin lokaiao “kohwei” ni ahnsou me e kehkehlikihong kitail en ‘katohnpadahk,’ Sises kasalehda me kitail anahne nanti laud oh kin tiengla mwowe nan doadoahko. Ahpw, e sohte mweidala kitail en kelehpwiki doadoahk wet ahpw e inoukihda me e pahn ketin ieiang kitail. (Mad. 28:19, 20) Pil patehng met, Siohwa ketikihong kitail sapwellime manaman iangahki mehn doadoahk kan oh kaiahn me kitail anahne pwehn padahkihong aramas akan me mehlelo. (Sek. 4:6; 2 Kor. 4:7) Kitail kak kapakapki kitail en inengieng “kapwaiada kupwure” en iang doadoahk kesempwal wet.—Pil. 2:13.
4. Dahme kahrehda kitail en medemedewehte atail doadoahk en katohnpadahk?
4 En kalohki rongamwahu kin wahdo nsenamwahu laud. Ahpw, atail peren kin laudla ni ahnsou me kitail kin padahkihong aramas emen me mehlelo oh sewese ih en iang kitail keid nan ahl “me kolahng mour.” (Mad. 7:14; 1 Des. 2:19, 20) Me keieu kesempwal iei, sang ni atail pahn medemedewehte atail doadoahk en katohnpadahk, kitail kin kaperenda Siohwa me “sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.”—2 Pit. 3:9.