Kihseli ong Koaros Doaropweo Kingdom News No. 35
1 Sounpwong kan en October oh November kin wia ansoun kedirepw ong kitail koaros. Kitail pahn sawaspene oh kihla doaropweo Kingdom News No. 35 nan sampah pwon. Ih atail pwais en wahla pakair kesempwal ong aramas me kin mihmi nan atail wasahn kalohk. Kitail pahn pakairki pasepeng en peidek wet, “Aramas Koaros Pahn Kak Limpoakpene?” Ahnsou me doadoahk tohrohr wet pahn wiawi, kitail pahn kihseli Kingdom News No. 35 Ni Ehd lel Ni Alim. Rahn Kaunop oh Rahn Sarawi, likin kihseli Kingdom News, kitail pahn kihseli makasihn kapw kan.
2 Ihs Me Kak Iang Doadoahk Wet? Duwehte rahn teikan me doadoahk tohrohr kan kin wiawi, elder kan kin tiengala mwowe. Koaros pahn perenki kihseli Kingdom News, ihme kahrehda sounkalohk tohto pahn iang doadoahk en auxiliary pioneer nan October de November de sounpwong pwukat koaros. Sounkalohk teikan pahn men kalaudehla arail ahnsou en kalohk.
3 Ke kin onop rehn emen me onopkiehr pali laud en pwuhken Knowledge oh kerenieng kak warohng iang doadoahk en kalohk? Mwein e kak wiahla emen sounkalohk me saikinte pepdais mwohn doadoahk en kihseli Kingdom News pwehn kak iang doadoahk tohrohr wet. Ihte me e anahne sukuhliki iei padahk mengei pwehn kak kihla doaropwe kapwo. Karasepe, sounkalohk men kak nda: “Audepen doaropwe wet inenen kesempwal, ihme kahrehda doaropwe wet kin kohpeseng nan sounpwong wet sampah pwon ni lokaia 169. I men ken ale noumw doaropwe wet.” Seri kan pil kak iang doadoahk wet.
4 Brother kan me kin wia Onop en Pwuhk en Mwomwohdiso kak kangoange tohn Onop en Pwuhk koaros en iang doadoahk en kihseli Kingdom News No. 35. Mwein ekei sounkalohk kan me sohla kin kalohk pahn men pwurehng iang kalohk ma mehteikan kangoange irail. Elder kan kak mwemweitla rehrail oh tehk pwehn kilang dahme irail anahne wia pwehn pwurehng iang kalohk oh iang sounkalohk koahiek kan erein doadoahk tohrohr wet.
5 Iahd Kitail Pahn Tuhpene Ong Kalohk? Pwehki doadoahk wet pahn kahrehda mwekid laud nan mwomwohdiso, elder kan anahne koasoanehdi koasoandi kan en tuhpene ong kalohk me pahn mwahu ong sounkalohk kan. Elder kan kak koasoanehdi tuhpene ong kalohk en wiawi rahn koaros oh ni soutik kan ma konehng. Ahnsoun tuhpene pahn wiawihda pwehn mengei ong sounkalohk kan oh pioneer kan pwe ren kak iang doadoahk kesempwal wet. Elder kan pahn pil koasoanehdi tuhpene ong kalohk mwurin souwas ong irail tohnsukuhl kan oh tohndoadoahk kan oh mehteikan. Eldero me kin koasoanehdi koasoandi en kalohk pahn tehk ma mie wasahn kalohk itar (ihmw-lel-ihmw oh wasahn pisnes) pwe koaros en kak iang doadoahk wet ahnsou me irail kak ong. Ma sounkalohk tohto kin mihmi nan wasakiste, irail anahne medemedewe duwen sounkalohk depe me pahn konehng en kalohk nan wasao.
6 Iaduwen Ihmw kan me Kitail Sohte Kin Tuhwong Aramas: Kitail men tuhwong koaros me kitail kak pwehn kawehwehda dahme kahrehda irail anahne wadek Kingdom News No. 35. Eri, ma sohte aramas mihmi nan ihmw ahnsou me ke kin kohla, ntingihdi adres en ihmwo oh pwurehng kohla ni ehu ahnsou tohrohr. Ni ahnsou me doadoahk tohrohr nek, oh ke saikinte tuhwong tohnihmwo, ke kak kihdi ehu Kingdom News ni wehnihmwo oh tehk me irail me kin alu daulih imwarail sohte kak kilang doaropweo. Nan wasa kan me aramas kin mihmi ie, nantiong kihong irail me kin alialuseli liki neirail Kingdom News. Ahnsou me ke pahn kalohk wasa doh kan, ke kak kihdi neirail Kingdom News ni wehnihmwo ma sohte aramas mihmi ni ihmwo.
7 Ia Atail Mehn Akadei? Mwomwohdiso kan pahn nantiong en kihseli Kingdom News koaros oh en lel ong ihmw koaros mwohn November 16. Ma amwail wasahn kalohk uhdahn laud oh ma sounkalohk kan sohte pahn lelong keper, sounkalohk kan kak kelepw kohla ni ihmw kan. Met pahn kak sewese kitail en tuhwong aramas tohto pwehn kalohki rongamwahu. (Madiu 10:11) Mwein e pahn mwahu ma ke pahn kolokol doaropwe kan nan pehomwen, oh weuwa noumw Paipel nan ahmw poked de ahmw kopwou, oh sohte doadoahngki ehd laud. Ntingihdi eden aramas kan me men rong.
8 Ke Onopadahr Pwehn Tepida? Uwen tohto en Kingdom News me konehng ehu ehu wasa pekederlahngehr mwomwohdiso koaros. Doaropwe 250 me pahn kohwong special oh regular oh auxiliary pioneer kan pwe ren kihla, oh meh 50 pahn kohwong sounkalohk teikan. Kitail anahne doadoahk laud. Ke men iang doadoahk kaperen wet? Ei, uhdahn. Kitail anahne wia uwen me kitail kak en pakairkihseli wasa koaros duwen audepen Kingdom News No. 35 me poahsoanda pohn Pwuhk Sarawi!