Komw Wia Emen Sounkadehde Ahnsou Koaros?
1 Ke pahn sapengki ei ong peidek wet? Mendahki sapwellimen Siohwa ladu koaros sohte kak iang doadoahk en kalohki Wehio kaukaule (full-time ministry), e soh pahn pwung me kitail pahn kasik me kitail koaros pahn kaukaule wia Sounkadehde kan? Ei, mehlel.
2 Aramas sohte kak wia emen Kristian ekeite pak. Sises mahsanih duwen Semeo: “Ei poaden wiewia mehkan me e kin ketin kupwurperenki.” (Sohn 8:29) Pohl, me ahneki pepehm duwehte Sises, kin kangoange kitail en “wia kalinganpen Koht.” (1 Kor. 10:31) Ihme kahrehda, kitail koaros anahne kilangwong pein kitail ahnsou koaros nin duwen Sounkadehdehn Siohwa kan. Nin duwen kitail pahn ahneki soangen madamadauo, e pahn kamwekid soahng koaros me kitail wia.
3 Medewehla Mehn Kamehlele kan: Mwomwatail, atail lokaia oh atail wiewia kan pahn kasalehong mehteikan me kitail uhdahn wia Sounkadehde kan en Siohwa. Kitail kin tehk me kitail kin likouki soangen likou me konehng Kristian kan, lokaiaki lokaia min oh wiewia tiahk mwahu ahnsou me kitail kin kalohk oh iang mihding kan. Ahpw, mendahki kitail mihmi ni imwen sukuhl, wasahn doadoahk de mwadong, soahng koaros me kitail kin kasansalehda pahn kadehde ong aramas koaros me kitail kin mourki sapwellimen Siohwa kosonned pwung kan.
4 Sises mahsanih: “Kahnimw ehu me mi pohn dohl ehu sohte kak rirla. . . Ih pil duwen kumwail, amwail marain en sansal mwohn aramas akan pwe re en kilang amwail wiewia mwahu kan oh kapikapingahki Samamwail me ketiket nanleng.” (Madiu 5:14-16) Met pahn mehlel ni soahng koaros me kitail wia ahnsou koaros. Ma mie pak me kitail kin pweiek en kadehde ong mehteikan pwehki wasao me kitail mih ie de dahme kitail wiewia, kitail anahne idek pein rehtail, ‘I kin papah Siohwa ekeite pak de ahnsou koaros?’ Kitail en dehr katiasang ahnsou mwahu kan pwehn koasoiaiong mehteikan duwen rongamwahu en Wehin Koht.
5 Tamataman me kitail kin wahuneki oh kaperenda Siohwa ma kitail kak sapeng, “Ei!” peidek wet, “Komwi emen Sounkadehde ahnsou koaros?”