Peren kin Kohsang Iang Doadoahk en Regular Pioneer
1 Ma ke wia emen pwulopwul, ke uhdahn kin medemedewe duwen ahnsou kohkohdo. Lepin Padahk 21:5 padahkiong kitail me “koasoandi kan en me pwerisek men kin inenen wiahda kamwahu laud.” E pahn wia mehkot mwahu ong uhk ma ke pahn medemedewe laud duwen ahmw mehn akadei kan ong ahmw mour. Ni ahmw pahn medemedewe dahme ke pahn wia ahnsou kohkohdo, menlau medemedewe duwen iang doadoahk en Regular Pioneer. Pwekihda?
2 Idek rehn ekei aramas laud me Regular Pioneer ahnsou me re pwulopwul dahme re lemeleme duwen doadoahk wet oh re uhdahn pahn koasoia: “Sounpahr pwuko wia sounpahr kan me keieu mwahu nan ahi mour!” Emen brother me pehmehr duwen peren kan me kin kohsang iang doadoahk en Regular Pioneer ahnsou me e pwulopwul koasoia: “E kin wia ahnsou nan ahi mour me inenen kansenamwahu pwe I pahn medemedewe ahnsou me I pwulopwul oh I kak nda me I kapwaiada kaweid wet: ‘Eri, tamanda Sounwiepomw nindokon ahmw wie pwulopwulte.’ ” (Ekl. 12:1) Ma ke pahn koasoanehdi ahnsouwet ahmw koasoandi kan ong ahnsou kohkohdo, kowe oh ahmw pahpa oh nohno, ke kak koasoanehdi ahl ehu me ke pahn kak ahneki peren ni ahmw wie mwahnakapw de peinakapw.
3 Pahpa oh Nohno kan, Kumwail Kangoange Noumw kan en Iang Doadoahk en Regular Pioneer: Siohwa, nin duwen Samatail limpoak men, kin mwahngih mehnia elen mour me keieu mwahu ong kitail. (Aiseia 30:21) Ni E ketikihong kitail kaweid limpoak, e kin wia mehn kahlemeng mwahu ong pahpa oh nohno Kristian kan. E sohte pahn mwahu en mweidohng noumw seri kan en pilada mehnia elen mour me keieu mwahu ong irail, pwe ke anahne kaiahne oh kaweidkin irail en wehwehki mehnia elen mour me Siohwa kin ketin kupwurki oh E pahn kak kapaiada irail nan arail mour. Eri, ni arail pahn lalaudla, ahmw kaiahne irail pahn sewese irail en “kasawihada mwahu dahme mwahu oh dahme suwed.” (Ipru 5:14) Aramas laud kan wehwehkiher sang pein arail mour me re sohte kak likih pein arail pilipil kan; re anahne likih Siohwa pwe E pahn ketin kasalehiong irail ahl me pwung. (Lepin Padahk 3:5, 6) Irail me pwulopwul anahne pil wia met pwehki re saikinte lelohng soahng tohto nan arail mour.
4 Pahpa oh nohno kan, ni amwail pahn kilang noumwail seri kan lalaudla oh lel sounpahr en “teenage” (sounpahr 13 lel 19) de pil mwohn ahnsowo, koasoiong irail ni mehlel duwen dahme re pahn wia nan pahr kohkohdo kan. Irail sounkaweid kan nan sukuhl, arail sounpadahk kan oh iengarail tohnsukuhl kan pahn songen kamwekid irail en pilada soangen mehn akadei kan me pid sampah duwehte ale paien sampah tohto de ndand nan sampah de ale doadoahk pweilaud de soahng pwukat. Sewese noumw seri kan en pilada soangen class kan me pahn sewese irail pwe ren kak apwalih pein irail ni paliwar ahpw ni ahnsowohte en mwohneki Wehio nan arail mour. (1 Tim. 6:6-11) Pali laud en ahnsou, ihte me anahn ong apwalih pein emen ah anahn en paliwar pwe e kak mwadang tepida doadoahk en Regular Pioneer iei iang high sukuhl iangahki ekis kaiahn likin mwo (vocational and/or on-the-job training).
5 E pahn mwahu ma kumwail, pahpa oh nohno kan, en pil kangoange noumw me pwulopwul kan en kiripw ma re kak. Ma re men pwopwoud mwuhr, re aleier kaiahn mwahu ong apwalih pwukoah kan. (Kilang inset en Atail Doadoahk Ong Wehio en June 2001, parakrap 19, pahnangin oaralap me koasoia “Ke Kak Iang Doadoahk wet?”) Ni ahmw pahn koasoi ni ahl me mwahu duwen doadoahk en Regular Pioneer, kalohk wasa kan me anahn mie, doadoahk nan Bethel oh doadoahk en misineri, ahmw koasoia duwen mehpwukat pahn kahrehong irail en, sangete ahnsou me re tikitik, inengieng en doadoahngki arail mour ni ahl me pahn kaperenda Siohwa, wahdo kamwahu ong meteikan, oh kihong pein irail peren laud.
6 Kumwail me Pwulopwul kan, Kihong Doadoahk en Regular Pioneer en Keieu Nan Amwail Mour: Kumwail me pwulopwul kan, kumwail sohte anahne medemedewe duwen ia mwomwen doadoahk en pioneer. Ke kak song wia met ni ahmw pahn Auxiliary Pioneer ahnsou me ke kak erein ahnsou me ke sukuhl iangahki ahnsoun kommoal en sukuhl. Eri, soangen ahnsou pwukat ke kakete wehwehki ia uwen kansenamwahu oh kaperen doadoahk en pioneer! Ke kak koasoanehdi pwehn iang doadoahk en Auxiliary Pioneer nanpwungen met oh imwin sounpwong en summer (August)?
7 Ma ke wia emen brother pwulopwul nan sapwellimen Koht pwihn, e pahn mwahu ma ke pahn medemedewe laud ma ke kakete wiahla Ministerial Servant ehu rahn. (1 Tim. 3:8-10, 12) Oh pil, medemedewe ma ke men iang doadoahk nan Bethel de iang sukuhl en Ministerial Training School ahnsou me ke lel sounpahr me ke kak iang soahng pwukat. Ahmw iangehr doadoahk en Regular Pioneer pahn sewese iuk en wehwehki duwen soahng kesempwal pwukat duwehte: koasoanehdi ahmw ahnsou, koasoanehdi ahmw mour, iaduwen ke kak miniminiong meteikan, oh iaduwen ke pahn kapwaiada ahmw pwukoah kan. Soahng pwukat pahn sewese iuk en kaunopada ong mehn akadei teikan me ke akadeiong mwuri.
8 Mehkot me kesempwal ma ke men pweida nan doadoahk en Regular Pioneer iei ahneki ngoang oh pwerisekiong soahng kan me pid papah Siohwa. Wahnpoaron Pohl kin kangoange meteikan en ahneki soangen madamadau, oh e kasalehda duwen kapai kan me pahn kohsang met: “Sohte lipilipil soahng dah me kumwail wia, kumwail loalenohng duwehte ma kumwail wia doadoahk ong Siohwa, . . . Kumwail en tamataman me Siohwa pahn ketin katingih kumwail.” (Kol. 3:23, 24, New World Translation) Siohwa uhdahn pahn kapaiada iuk ni ahmw pahn ahneki peren nan doadoahk en Regular Pioneer!