Ia Kamwahupen Ahneki Pein Omw Wasahn Kalohk?
1. Dahkot pein omw wasahn kalohk?
1 Dahkot pein omw wasahn kalohk? Nan mwomwohdiso kan me mie wasahn kalohk tohto, ke kak ahneki pein omw wasahn kalohk, ele wasa ehu me karanih omw wasahn kousoan. Pwuhken Organized, pali 103 kawehwehda: “Ahneki pein omw wasahn kalohk pahn seweseiuk ken kak doadoahngki pali laud en omw ahnsou ong kalohk. Patehng met, ele ke men luke emen sounkalohk en iang uhk kalohk nan pein omw wasahn kalohk.”
2. Ia duwen omw kak doadoahngki pein omw wasahn kalohk en patehng omw iang pwihnen kalohk?
2 En Kapatahiong Omw Iang Pwihnen Kalohk: Ma ke ale pein omw wasahn kalohk me karanih wasahn omw doadoahk, ke kak kalohk erein ahnsoun kommoal en mwenge de mwohn omw pwurala ni imwomwo, ele iang sounkalohk men me doadoahk karanih omw wasahn doadoahk. Ma ke ale ehu wasahn kalohk me karanih imwomwo, kowe oh omw peneinei kak doadoahngki ong kalohk en ni soutik. Uhdahn ma ke sohte iang towehda tuhpenehn kalohk, e konehng ken kapakapki sapwellimen Siohwa kaweid mwohn omw tepida kalohk. (Pil. 4:6) Patehng met, ke anahne doadoahngki omw ahnsou ni toupahrek ong kalohk nan pein omw wasahn kalohk pil iangahki utung koasoandi en omw pwihn en kalohk en mwomwohdiso. E pahn keieu mwahu en iang omw pwihn en kalohk ni imwin wihk kan pwe tohto kin iang tuhpenehn kalohk.
3. Ia kamwahu kan en ahneki pein omw wasahn kalohk?
3 Kamwahu kan: Ma mie pein omw wasahn kalohk, e pahn mie wasahn omw kalohk ni ahnsou sohte lipilipil ma omw koasoandi mweidohng. Ke kak kalaudehla omw ahnsoun kalohk oh katikala ahnsoun tangatang. Kamwahu pwukat kin kahrehda ekei ren kak wia sawaspen pioneer kan de pioneer kan. Pwehki tohnihmw kan me men rong kin mi wasatehkis, e kin mengei en pwurala oh onop Paipel rehrail. Me tohto diarada me arail kalohk nan pein arail wasahn kalohk kin sewese irail en esehla tohnihmw kan oh tohnihmwo kin kakairada arail likih, ahpw ni mehlel ma re kalohk wasao pak tohto mwohn arail kapwurehla wasahn kalohko pwe meteikan en uhd doadoahngki. Ia duwe, omw ahneki pein omw wasahn kalohk pahn seweseiuk oh omw peneinei en kalaudehla oh kapwaiada douluhl amwail doadoahk en kalohk?—2 Tim. 4:5.