En Koahiekla Ni Ahmw Kalohk

¹ Mesen lahng rotala, oh ehu soangen ngihl wia lalaudla lao e wiahla ngihl laud douluhl me aramas kak salongponkihla. Dahkot met? Karis en loukust ehu kohkohdo pwehn kauwehla douluhl sahpwo! Kokohp wet me Soel kohpada pahn pil pweida rahnwet ni en sapwellimen Koht ladu keidi kan oh iengarail kan, pokon kalaimwun, pahn wia doadoahk en kalohk.​—⁠Soel 2:⁠9.

² Ahpw, weksang mensiengko loukust me kin kamwenge pein irailte, kitail nin duwen sapwellimen Siohwa ladu kan kin nsenohki mour en irail kan me kitail kin kalohk ong. Kitail men sewese mehteikan en sukuhliki padahk kan sang Mahsen en Koht me kin kamarainih kitail oh sewese irail en mwekidki padahk pwukat pwehn kahluwa irail ong mour soutuk. (Sohn 17:3; 1 Tim. 4:​16) Ihme kahrehda, kitail anahne koahiek ni atail wia doadoahk en kalohk. Mendahki ma kitail kalohk sang ihmw-lel-ihmw de kalohk ahnsou soh-lipilipil, kitail men kalohk ni ahnsou mwahu ehu oh ni ahl mwahu ehu me kitail kak tuhwong aramas tohto. Pwehki “irair en sampah wet kin wia wukwukila,” kitail anahne kasawihada ahl kan oh padahk kan me kitail kin doadoahngki ong kalohk pwehn kilang mehnia ahl kan oh mehnia padahk kan me pahn keieu pweida mwahu.​—⁠1 Kor. 7:​31 (New World Translation).

³ Mendahki kitail kin kalohk ni ahnsou sohte lipilipil pwehn tuhwong aramas, keieun ahl me kitail kin doadoahngki en tuhwong aramas iei kalohk sang ihmw-lel-ihmw. Ke kin diar me aramas sohte kin mihmi ni imwarail kan de re kin memeir ni ahnsou me ke kohla imwarail kan pwehn tuhwong irail? E kin kansensuwed pwe ke kin men tuhwong irail pwehn kalohngki rongamwahu ahpw ke sohte kak tuhwong irail! Iaduwen ke kak powehdi kahpwalo?

⁴ En Materek oh Doadoahngki Atail Loalokong: Nan Israel en mahsie, sounlaid kan kin laid ni pwong. Dahme kahrehda re kin laid ni pwong? Mendahki ma ni pwong sohte kin wia ahnsou mwahu ong sounlaid kan, ahpw e wia ahnsou me keieu mwahu en laid. E wia ahnsou mwahu me re kak koledi mwahmw tohto. Watchtower (lokaiahn wai) en June 15, 1992 (Kahn Iroir en December 1, 1992) koasoiaki met: “Kitail en pil kasawih ni keneinei atail wasahn kalohk akan pwe kitail en kak kohieila, duwehte laid, ni ahnsou me pali laud en aramas mihmi nan ihmw oh men rong.” Nan kahnimw tohto, aramas kin mihmi nan imwarail kan Rahn Kaunop oh Rahn Sarawi kan ni kulok 9 oh 10, ahpw nan soangen ahnsouwo re sohte kin men rong. Ma met kin wiawi nan ahmw wasahn kalohk, ke kak kohla rehrail mwurin kulok 11 de mwurin souwas? Ma kitail wia met, e pahn sewese kitail en tuhwong aramas tohto oh e pahn pil kasalehda limpoak ong mehn mpatail kan, oh ihme pahn kasalehda me kitail ahneki limpoak mehlel en Kristian.​—⁠Madiu 7:12.

⁵ Nan Pilipai 4:5 (NW), wahnpoaron Pohl kin katamankin kitail en ‘doadoahngki ahmw loalokong pwehn wia dahme me mwahu ong aramas koaros.’ Ma kitail men kapwaiada kaweid wet, kitail anahne toupahrek oh materek ni atail pahn koasoanehdi atail ahnsou oh atail padahk kan en kalohk oh wia doadoahk en kalohk ni ngoang. Kitail “sohte men ekihsang aramas mehkot me kitail dehdehki me pahn sewese aramas akan ni atail padahk nan wasahn kapokon kan oh sang ihmw-lel-ihmw” ihme kitail anahne koasoanehdi atail ahnsoun kalohk me pahn keieu mwahu ong tuhwong oh sewese aramas. (Wiewia 20:​20, NW) Duwehte sounlaid kan en Israel en mahs, kitail men ‘laid’ ni ahnsou kan me kitail kak tuhwong aramas oh kalohk ong irail, kaidehn ahnsou kan me mwahu ong kitailte.

⁶ Iaduwen kitail kak kawikila atail koasoandi kan? Pali laud en mwomwohdiso kan kin tuhpene ong kalohk kulok 8:30 ni menseng en Rahn Kaunop kan oh Rahn Sarawi kan, oh mwurin mwo, pwihn en kalohk kin inenla wasahn kalohk sang ihmw-lel-ihmw. Ahpw, nan ekei mwomwohdiso kan, pwihn en elder kin kawikila koasoandi wet oh koasoanehdi me pwihn en kalohk pahn kalohk mahs nanial, de nan wasahn pisnis, de pwurehng pwurala rehn aramas akan me re tuhwong rahn teio oh mwurin mwo, kalohk ihmw-lel-ihmw. Koasoandi kapw wet kin kak kahrehda aramas men rong nan wasahn kalohk en ihmw-lel-ihmw.

⁷ Doadoahngki Ahmw Loalokong oh Lokaia Kadek Ong Aramas: Ni atail kin tuhwong aramas ni imwarail kan, kitail kin kilang iaduwen re kin mwekidki de sohte mwekidki dahme kitail kin koasoia. Ekei tohnihmw kan pahn perenki rong, ekei sohte pahn perenki rong, oh ekei men akamai. Ma emen men akamai ong kitail, kitail kak tamataman dahme pwuhken Reasoning From the Scriptures nan pali 7 koasoia: “kitail sohte men akamai ong aramas oh ‘nantiong pwehn kana,’ ma aramas pwukat sohte wauneki padahk mehlel.” Ma tohnihmw kin kasalehda, ni sansal, me e sohte perenki rong, e pahn mwahu ma kitail pahn kohkohla sang wasao. Kitail en dehr lidere aramas ni atail pahn idingkihong aramas en rong kitail de pwungki dahme kitail koasoia. Kitail sohte kin idingkihong aramas dahme kitail kin koasoia. Kitail men doadoahngki atail loalokong oh en dehr wia mehkot pwehn kahrehda sounkalohk teikan en lelong kahpwal kan ehu rahn.

⁸ E pahn mwahu ma kitail pahn tehk dahme kin wiawi ahnsou me kitail kin kalohk sang ihmw-lel-ihmw pwehn pwurehng kohla ahnsou me pahn mwahu ong tohnihmwo. Ahnsou me kitail kin lel ihmw kan, kahdeng kan en imwarail kan pwaindihte wenihmwtok kan? Sohte mwoaroang nan ihmwo? Mwein tohnihmwo wia memeir. E pahn mwahu en pwurodo ehu ahnsou me tohnihmwo pepehd. Kitail kak dauli ihmwo oh ntingihdi iawasa ihmwo mihmi ie. Kitail kak pwurehng pwurala mwohn kitail pahn kohkohlahsang nan wasahn kalohk de kitail kak pwurehng pwurodo mwuhr.

⁹ Ahpw, ekei pak kitail kin kapirida emen de kauwehla doadoahk me e wia, mendahki kitail sohte men wia met. Mwein e pahn lingeringerda de e pahn kasalehda me e kadongodongki ahmw kauwehla ah meir de kauwehla doadoahk me e wia. Dahme ke pahn wia? Nan Lepin Padahk 17:​27, e mahsanih: “Aramas me kin kanengamah ahneki erpit.” Kitail sohte pahn kohluhkihla atail wia doadoahk en kalohk, ahpw ma kitail sohte wehwehki me emen wia memeir de wia doadoahk kesempwal, ahpw kitail kauwehla dahme re wia, e pahn mwahu ma kitail pahn pekmahk rehrail. Kitail kak idek rehrail ahnsou me irail pahn pisek pwehn pwurehng pwurodo rehrail. Ma kitail kasalehda, ni lokaia kamantik, me kitail nsenohki irail oh kesempwalki arail ahnsou, tohnihmwo pahn meleileidi. (Lepin Padahk 15:1) Ma tohnihmw pahn padahkiong kitail me e kin kaukaule doadoahk ni pwong, kitail kak ntingihdi pohn map en wasahn kalohk duwen tohnihmwo pwehn kak tuhwong ih ahnsou me mwahu ong ih.

¹⁰ Pwehki aramas tohto sohte mihmi nan imwarail kan ahnsou me kitail kin kalohk sang ihmw-lel-ihmw, kitail kin nantiong tuhwong irail pwehn ehukihong irail rongamwahu me kin kamourala aramas. (Rom 10:13) Ahpw, kitail anahne doadoahngki atail loalokong. Ma kitail sohte tuhwong irail ni rahn, kitail kak nantiong en pwurehng pwurala ni soutik, oh ma kitail nantiong en tuhwong pak kei, ahpw sohte kak, kitail kak song en tuhwong tohnihmw ni atail doadoahngki telepohn. Ma kitail sohte kak tuhwong, kitail kak kihdi doaropwe ehu pahn wenihmwo, keieu nan wasahn kalohk kan me kitail kin kalapw kohla. Mwein kitail kak tuhwong tohnihmwo ahnsou me kitail pahn pwurehng kalohk nan wasahn kalohko.

¹¹ Koasoanehdi Mwahu oh Wia Doadoahk en Kalohk Ni Wahu: Ma brother kan koasoanehdi mwahu pwihn en kalohk, re sohte pahn koasoanehdi sounkalohk tohto en kalohk wasahkiste. Ekei tohnihmw kan kin lingeringerda de masapwehkada ahnsou me sidohsa tohto pahn peidi mwohn imwarail oh sounkalohk tohto pahn doudi sang sidohsa kan. Kitail sohte men tohnihmw kan en lemeleme me kitail kin kadarala sounkalohk tohto wasahkiste pwehn “kamasapwehkih” tohnihmw kan wasao. Koasoanehdi mwahu pwihn en kalohk nan wasahn tuhpenehn kalohk. Tohnihmw kan sohte pahn masapwehkada ma sounkalohk malaulau, duwehte peneinei ehu, pahn kalohk wasahkis oh pil e pahn mwahu pwe e pahn soandi mwahu.

¹² Pahpa oh nohno kan anahne apwalih neirail seri kan ahnsou me irail iang kalohk. Seri kan anahne tiahk mwahu ahnsoun kalohk. Pahpa oh nohno kan sohte pahn mweidong neirail seri kan en mwadongseli de aluseli mwahl ahnsou me pahpa oh nohno koasoiong tohnihmw pwehki met pahn kahrehda tohnihmwo en sohte rong kanaieng padahko.

¹³ Sounkalohk tohto perenki iang kalohk ong aramas nanial akan, nan wasahn peidi sidohsa kan, de wasa teikan pwehki aramas kin perenki rong. Ahpw, ahnsou me kitail kin kalohk nan soangen wasa kan, kitail pil anahne tiahk mwahu oh lokaia mwahu ahnsou koaros. Nan ekei mwomwohdiso kan me kin wia kalohk ni soangen wasa kan, re wiahda map kan. Ahnsou me brother kan kin koasoanehdi pwihn en kalohk, re kak kihong emen sounkalohk de sounkalohk kei map ehu. Ni ahl wet, doadoahk en kalohk pahn soandi mwahu oh pil sounkalohk malaulau pahn mihmi nan ehu wasa, nin duwen dahme 1 Korint 14:40 kasalehda, “Kumwail wiahda mehkoaros nin duwen me konehng oh koasoandi pwung.”

¹⁴ Atail likou oh kapwat anahne kasalehda atail wauneki Siohwa oh me kitail wia sounkalohk kei me kin weuwa mwaren Siohwa. Kitail anahne pil tehk duwen neitail mehn kalohk kan me kitail kin doadoahngki ahnsoun kalohk. Ieremen doadoahngki ehd oh kopwou kan oh Pwuhk Sarawi me mwomw suwed (pwelipwel, tei, meringlahr) pwe soahng pwukat pahn kak kauwehla mwaren Siohwa de kahrehong tohnihmw en sohte perenki rong. Ehu lepin koasoi kin koasoia me likou oh kapwat kin wia “duwehte elen mwadang wehwehkihda aramas men . . . ihs ih oh soangen aramas dah ih.” Ihme kahrehda, kitail anahne doadoahngki likou oh kapwat kan me mwakelekel, mwomw mwahu oh soandi mwahu ahnsou koaros pwe kitail en “momourkihte soangen mour me konehng rongamwahu en Krais.”​—⁠Pilipai 1:27; pil kilang 1 Timoty 2:9, 10.

¹⁵ Nan 1 Korint 9:​26, wahnpoaron Pohl koasoia: “Ihme I sohte kin tang, pweiengki; oh ihme I kin pei, rasehng sounpaker men me sohte kin pakepakere mwahl nan wehwe.” Ma kitail kalemengih Pohl, kitail en nantiong koahiekla nan doadoahk en kalohk. Kitail en doadoahngki atail loalokong nin duwen Kristian kan me kisehn “karis en loukust” oh me kin ngoangki doadoahk en kalohk oh men ehukihong aramas koaros rongamwahu.