Doadoahngki Omw Ahnsoun Kalohk en Lipwalipw
1 Koaros ahneki soahngen awa kohte me re kak doadoahngki ehuehu wihk. Ahnsou ko me kitail kin doadoahngki pwehn lohkiseli rongamwahuwo kin keieu kesempwal pwehki e kin wia awahn doadoahk en komour. (Rom 1:16) Kitail kin kasalehda atail kalahnganki met ni atail kin kaunopada mwahu ong kalohk, kitail kin mwadang kohdohng mihding en kalohk, oh mwadang kohla nan wasahn kalohk kan. Kitail en kalkalohk ah kaidehn awiawih. Pwehki Siohwa ketin padahkihong kitailehr me “ong soahng koaros mie ahnsouwi,” kitail anahne doadoahngki ahnsouwo me kitail koasoanehdi ong kalohk en uhdahn mie lipwe.—Eklesiasdes 3:1, New World Translation.
2 Doadoahngki Omw Ahnsou ni Loalokong: Kapai tohto kin kohdohng kitail ni ahnsou me kitail kin loalopwoatong kolokol koasoandi ehu me kin mweidohng kitail en kaukaule iang kalohk. Ni mehlel, imwila mwahu kan me kitail alehda nan kalohk kin pahrekiong uwen reirei en ahnsouwo me kitail kin doadoahngki nan kalohk. Ni atail kin wiahda kisin wekidekla kan nan atail koasoandi, kitail kak kalaudehla atail ahnsou nan kalohk? Karasepe ehu, mwurin atail kihseli makasihn ni Rahn Kaunop, kitail kak wiahda ekei awa kan ni atail wia atail return visit kan? Ma kitail ekis kalohkehr Rahn Sarawi, kitail kak doadoahngkihla ekei awa kan en wia return visit kan de Bible study kan? Kitail kak pil wia kalohk nanial likin ahnsou me kitail kin kalohk sang ihmw lel ihmw? Ni ahl pwukat oh ahl teikan, kitail kak kamwahuwiala atail kalohk.
3 Ni ahnsou me kitail kin kalohk, kitail kak luhsla ahnsou kesempwal kan ma kitail sohte kin kanahieng. Ni mehlel, ni ahnsou me irair en nan wehwe kin suwed, kommoal mwotomwot kak kakehlailkitailda oh sewese kitail en wohnlahte mwowe. Ahpw, kitail en toupahrek, pwehki soahngen kommoal kan sohte kin ahnsou koaros anahn.
4 Nan rahn pwukat, e kin wie apwalla en tuhwong aramas kan nan imwarail kan. Pwehn powehdi kahpwal wet, sounkalohk tohto kin wia arail doadoahk en kalohk sang ihmw lel ihmw ni soangsoangen kuloak kan. Dahme ke soh song kalohk ni soutik kan de mwurin souwas kan?
5 E pahn mwahu ma kitail sohte pahn kin koasoakoasoipene nanpwungatail nin doken atail kin wia doadoahk en kalohk nanial akan. Ahpw, kitail en kesihnenda dohsang emenemen oh kohla tuhwong aramas kan pwe kitail en tepida koasoiong irail. Eri, kitail pahn doadoahngki atail ahnsou ni lipwalipw oh kitail pahn ale peren laud sang atail kalohk.
6 Rapahkihda Ahnsou Mwahu en Kalohk: Ni ahnsou me emen tohnihmw koasoia me e sohte men rong, emen Sounkadehde kalelepek reh ma mie aramas nan ihmwo me e kak koasoiong. Met kahluwalahng en koasoiong emen ohl nan ihmwo, me erein sounpar tohto kin sousoumwahu oh kin wonohnte nan peht. Koapworopworo me Mahsen en Koht kin kasalehda karehong ih en pwurehng nsenohkihda soahng kan nan mour. Sohte pwand, e sohla kin wonohnte nan peht, ahpw e kin iang towehda mihding kan ni Kingdom Hall, oh ehukihong meteikan ah koapworopwor!
7 Emen sister pwulopwul doadoahngki iren sawas me koasoia me kitail en kalohk erein awao mwohn Pwuhk Study en Mwomwohdiso. Ni tepin ihmwo, e tuhwong emen serepein me mahki sounpar 13 me kin rongorong kanahieng oh alehda pwuhk kan. Mandahn rahno, nan sukuhl, sister pwulopwulo kilangada serepein ohte. Mwurinte met, sistero idek reh ma e men onop Paipel, oh serepeino pwungki.
8 Wiahiong Omw Ahnsoun Kalohk En Mie Katepe: Iang kalohk kaukaule kin sewese kitail en kekeirada atail koahiek en koasoia padahk mehlel. Ke kak kamwahuwiala omw koahiek en tepiada koasoiong aramas kan ni ihmw akan ni omw pahn doadoahngki tepin koasoi kan me lipwalipw? Ke kak wiahla emen sounpadahk koahiek ni ahnsou me ke wia Bible study kan? Ni omw pahn wia met, ke kak uhdahn wiahiong omw ahnsou nan kalohk en mie katepe oh wiahiong omw kalohk en mie wah.—1 Tim. 4:16.
9 Pwehki “ahnsou me luhluhwe mwotomwotlahr,” atail mour anahne en audaudkihda doadoahk kan en Kristian. (1 Korint 7:29, NW) Koasoanehdi ahnsoun doadoahk en kalohk anahne en keieu nan atail mour. Kitail en ngoangki iang kisehn doadoahk en kalohk. Ahnsou kin wia mehn sawas kaselel ehu me Siohwa ketikihongehr kitail. Ahnsou koaros doadoahngki omw ahnsou ni loalokong oh wiahiong pwehn mie lipwe.
[Koakon nan pali 4]
Tehk Iren Sawas Pwukat:
◼ Kohdohng ni mihding en kalohk mwadang.
◼ Ma kak, tohn pwihn en kalohk me pahn wia ehu wasahn kalohk en malaulau.
◼ Liksang pwapwand kohlahng wasahn kalohk.
◼ Kalohk nan wasahn kalohk ni ahnsou me pali moron en aramas kin mihmi nan ihmw.
◼ Kalohk kelepw ekei pak ma e sohte keper en wia met.
◼ Wia return visit kan me kin karanih wasahn kalohk en ihmw lel ihmw.
◼ Wie kalokalohkte ni ahnsou me meteikan me iang uhk kalohk kin pwapwand ni ehu ihmw.
◼ Ni ahnsou kan me kak, kalohk reirei sang awa ehu.