Isaneki Omw Ahnsou Mwahu Koaros nan Kalohk
Sounkadehdehn Siohwa kan wiahda awa 1,945,487,604 nan kalohk erein pahr en kalohk en 2014. Mehn kadehde sansal wet kasalehda me kitail kin kedirepwki sapwellimen Siohwa doadoahk! (Mel. 110:3; 1 Kor. 15:58) Pwehki “ahnsou mwotomwotalahr,” kitail kak doadoahngki awa kesempwal kan nan kalohk pwehn kak koasoiong aramas tohto?—1 Kor. 7:29.
Isaneki mwahu atail ahnsou nan kalohk kin anahne wiahda koasoandi kan. Karasepe, ma ke kin kaukaule doadoahngki awa de ehu wiepen doadoahk en kalohk oh sohte koasoiong emen, ke kak wiahda koasoandi kan pwe ken kak diarada oh koasoiong aramas tohto? Irair kan kin wekiwekila sang ehu wasa lel ehu wasa. Ahpw, ele ire kan me mi pah kak sewesei iuk en isaneki ahnsou mwahu koaros pwe ken dehr “pakepakere mwahl nan wehwe.”—1 Kor. 9:26.
Kalohk en Ihmw-lel-Ihmw: Sounpar eisek samwalahro ko, sounkalohk kan kin tepikihda arail rahn nan kalohk sang kalohk en ihmw lel ihmw. Ahpw, pwehki me tohto kin doadoahk nin rahn akan, ke sou soahng en kalohk en ihmw lel ihmw ni soutik kan de mwohn eh pahn rotorotala, ahnsou me ekei aramas kan kin mi ni imwarail kan oh kommoal? Erein rahn ehu, kalohk nanial akan de wasahn pesines kan ele pahn mwomwen tikitik ahpw kak imwila mwahu.
Kalohk ong Wehipokon: Tehpel kan oh doupen pwuhk ong kasansal me kak wisikseli anahne en kohda wasa me aramas tohto kin alialu ie nan wasahn kalohk en mwomwohdiso kan. (Menlau kilang Atail Doadoahk ong Wehio July 2013, pali 5.) Ma malaulaula aramas me kin alialu ie nan wasa ehu ong kalohk ong wehipokon, Wiliepen Pwihn en Elder kan ele pahn pilada me dewpen pwuhk ong kasansal me kak wisikseli de tehpel en pwuhk kan en kohla ehu wasa tohrohr me aramas tohto kin alialu ie.
Pwurehng Pwurala Rehn Aramas oh Onop en Paipel kan: Ia duwe, ke kak wiahda omw koasoandi ong irail kan me ke kin pwurehng pwurala oh omw onop en Paipel kan erein ahnsou me ekei soangen wiepen kalohk teikan sohte kin nohn pweida mwahu? Karasepe, ma kalohk en ihmw lel ihmw kin pweida mwahu ni menseng en Rahn kaunop kan, ke kak koasoanehdi en kohla rehn omw onop en Paipel kan ni mwurin souwas de ni soutik kan? Ia duwe, ni ahnsoun pwurehng pwurala rehn irail kan me perenki rong, sounkalohk kan kak kohpeseng ni pwihn tikitik kan nan ehuehu sidohsa pwehn kak kalaudehla arail doadoahk en kalohk?
Pwehki eh mehlel me kitail kak kilelehdi neitail awahn kalohk kan ahnsou koaros me kitail kin iang kalohk, atail peren kin laudla ni atail kin pweida mwahu. Ma ke esehda me ahnsou me ke kin iang ehu wiepen kalohk me sohte kin pweida mwahu nan ahnsou me ke koasoanehdi, song wia ehu wiepen kalohk tohrohr. Kapakapohng Siohwa, “Kaunen rahket” pwehn ale sapwellime kaweid pwe ken kak isaneki ahnsou mwahu koaros nan kalohk!—Mad. 9:38.