Wiepe Kapw kan ong Kalohk ong Wehi Pokon
1. Soangen mehn kahlemeng dah me Kristian kan ni mwehin wahnpoaron ko kin wia?
1 Kristian kan ni mwehin wahnpoaron ko kin wia laud sang kalohk ihmw lel ihmw. Re pil kin kalohk ong wehi pokon. (Wiewia 20:20) Karasepe, re kin kohla ni tehnpas sarawi wasa me re ese me aramas tohto kin mi ie. (Wiewia 5:42) Ni wahnpoaron Pohl eh mihmi Adens, rahn koaros e kin kalohk ong irail me mi wasahn netinet akan. (Wiewia 17:17) Rahnwet, kalohk ihmw lel ihmw wiewiahte wiepen kalohk me kitail kin keieu doadoahngki pwehn kalohki rongamwahu. Ahpw kitail pil kin kohla wasahn peidi en sidohsa, wasahn pesines, wasahn mwemweit, ahl lap kan oh wasa teikan pwe kitail en kalohk ong aramas wasa koaros me kitail kak tuhwong irail. Mendahki sounkalohk koaros kin ale kangoang en iang kalohk ong wehi pokon wasa me aramas kak dierek ie, ahpw me tohto pahn iang wia wiepen kalohk kapw kaperen riau ong wehi pokon.
2. Soangen tepin wiepen kalohk kapw dah me tepida ni November 2011?
2 Doadoahk Tohrohr en Kalohk ong Wehi Pokon nan Kahnimw Laud: Nin duwen me kileldi nan 2013 Yearbook (lokaiahn wai) pali 16 oh 17, tepin wiepe kapw ong kalohk ong wehi pokon tepida nan kahnimw en New York ni November 2011. Tehpel kan oh mehn kadahr me mie kilel oh pwuhk kan ni ekei lokaia kan powe kin kohdi ni wasa kan me aramas tohto kin alialu nan kahnimwo. Ehuehu rahn aramas kid kei kin alialu, ekei irail kin kousoan nan ihmw me Sounkadehde kan sohte kak kohla ie oh irail me kin kalapw sohte mi ni imwarail. Aramas tohto kin kasalehda me re perenki neitail pwuhk kan. Nan ehute sounpwong ko me ahpwtehn nek, aramas kin alehdi makasihn 3,797 oh pwuhk 7, 986. Me tohto kin peki onop en Paipel. Pwehki mehn akadei kesempwal iei tapihada onop en Paipel, adres kan en irail me perenki kin mwadang pekederlahng mwomwohdiso me kak kohla rehrail.
3. Ia duwen tepin wiepen kalohk kapw wet eh kin lalaudla?
3 Pwehki pweidahn tepin wiepen kalohk kapw wet, met pahn uhd wiawi nan kahnimw laud teikan me aramas tohto kin mie. Ohpis en Sounkadehdehn Siohwa kan nan wasao pahn kasalehda mehnia kahnimw me pahn paiekihda. Kahnimw kan me mie wasa me kisa de bus tohto kin kohpene ie de diren ohpis laud kan de ihmw laud kan, met kak kahrehda aramas tohto kin alialu wasao. Mwurin mwo, ohpis en Sounkadehdehn Siohwa kan nan wasao pahn ntinglahng mwomwohdiso kan me pahn iang oh pil kihong kaweid teikan. Re kin kalapw doadoahngki pioneer oh pioneer tohrohr kan, ahpw ekei wasa sawaspen pioneer kan pil iang doadoahk wet.
4. Ia duwen kalohk tohrohr ong wehi pokon nan kahnimw laud eh kin wiawi?
4 Ia Duwen Kalohk Eh Kin Wiawi: Irail kan me iang kalohk tohrohr ong wehi pokon nan kahnimw laud kin awih emen me kohdo ni tehpel de dewpen pwuhk ong kasansal me kak wisikseli. Ni emen eh pahn kohdo, e kak ale pwuhk me e men wadek. Pioneer kan perenki sapeng peidek kan me e ahneki ni ar kin doadoahngki Paipel. Ma e ale pwuhk kan, pioneer kan sohte pahn koasoia duwen sawas en mwohni. Ahpw ma e idek ia wasa mwohni kin kohsang ie pwehn apwalih atail doadoahk, re pahn kak kawehwehda me sawas en mwohni kak pekederla ni adres me kileldi nan pwuhko. Ma kak, re pahn idek reh: “Ke men emen en kohwei rehmw?” de “Ke ese me se pil kin kihda onop Paipel ni soh isepe?”
5. Ia duwen iang wiepe kapw wet eh kin kaperen ong ehu pwopwoudo?
5 Iang wiepe kapw wet kin uhdahn kaperen. Ehu pwopwoud ntingihdi: “Kesikesihnen ni tehpel oh kilikilang aramas kid kei rahn koaros kin uhdahn kamwakid at mohngiong duwen doadoahk laud me kin wiewiawi pwehn lel aramas koaros nan sampah pwon. Kilikilang aramas tohto pwukat oh medemedewe duwen Siohwa eh uhdahn ketin nsenohki emenemen irail kin kakehlaka at nanti en pousehlahte mwohneki mahs doadoahk en kalohk nan at mour. Se kak medewe me Siohwa kin ketin kasawih mohngiong en irail koaros me kin alu limwahn tehpel oh raparapahki irail me warohng. Se uhdahn pehm me tohnleng kan kin iang kiht doadoahk.”
6. (a) Ia pil ehu wiepe kapw me mwomwohdiso tohto koasoanehdi pwehn kalohk ong wehi pokon oh ia duwen met eh weksang kalohk tohrohr ong wehi pokon nan kahnimw laud? (b) Ia duwen mwomwohdiso kan ar pahn sawaspene ni arail kin iang kalohk ong wehi pokon?
6 Kalohk ong Wehi Pokon me Kin Koasoandi nan Omw Wasahn Kalohk: Patehng kalohk tohrohr ong wehi pokon nan kahnimw laud, pwihnen elder tohto nan arail wasahn kalohk kin koasoanehdi pil ehu wiepe kapw. Ni arail doadoahngki wiepe kapw wet, sounkalohk kan kin kihdi tehpel de dewpen pwuhk ong kasansal me kak wisikseli nan wasa me aramas tohto kin alialu nan arail wasahn kalohk. Met weksang kalohk tohrohr ong wehi pokon nan kahnimw laud, me ohpis en Sounkadehdehn Siohwa kan en wasao kin pilada wasatehkis me aramas tohto kin alialu ie pwe sounkalohk kan sang mwomwohdiso tohto en iang kalohk ie.—Kilang koakon “Anahne Sawaspene Mwahu.”
7. Ia duwen elder kan ar pahn koasoanehdi kalohk ong wehi pokon nan arail wasa ma e konehng?
7 Elder kan pahn tehk ma mie wasa me aramas tohto kin alialu nan arail wasahn kalohk oh koasoanehdi ma wasao pahn mwahu ong kalohk ong wehi pokon. Wasa kan me tehpel de dewpen pwuhk ong kasansal me kak wisikseli kak mi ie iei wasa me kisa de bus tohto kin kohpene, wasahn tuhpenehn aramas akan, wasahn mwemweit, ahl lap kan, wasahn sidohwa tohto, college campus kan, wasahn sompihr oh wasahn kapokon kan. Mie kamwahupen kihdi tehpel kan ni wasa, rahn oh kuloak me duduwehte. Kihdi tehpel wasa me sidohwa tohto mie mwahu sang wasa me sidohwa laud ehute mie pwehki aramas me kin kohdo wasao kin medemedewehte dahme re rapahki sang sidohwao. Ekei wasa me duwehte ni keilen ahl akan me tohto aramas alialu, e mwahu en kihdi dewpen pwuhk ong kasansal me kak wisik me tikitik. Elder kan kak download sang neitail Web site kilel tohrohr ong kasalehda Kahn Iroir oh Awake! oh pwuhken Paipel Padahngki. Mepwukat kin kaunopadahr pwehn doadoahngkihong wiepen kalohk ong wehi pokon wet. Irail me pahn wia kalohk wet pahn kin wia duwehte irail me kin iang kalohk tohrohr ong wehi pokon nan kahnimw laud. Re pil anahne idawehn kanahieng kaweid me kohsang sounapwalih en kalohk. Ma re alehdi adres en me perenki wadek ahpw sohte kousoan arail wasahn kalohk, re anahne mwadang audehda doaropwehn Please Follow Up (S-43) oh kihong sekteri en mwomwohdiso.
8. Ma sohte mie koasoandi ong kalohk ong wehi pokon nan mwomwohdiso, soangen ahnsou oh wasa dah kan me mwahu ong kalohk ong wehi pokon?
8 Kalohk ong Wehi Pokon ni Omw Kin Kalohk: Ekei mwomwohdiso kan sohte ahneki soangen wasa me diren aramas alialu pwehn kihdi tehpel de dewpen pwuhk ong kasansal me kak wisikseli. Ahpw pil nan soangen mwomwohdiso pwukat, kangoang kin kohwong sounkalohk kan ren kak iang kalohk ong wehi pokon ni arail kin kalohk. Mie wasahn netinet, de wasa me sidohwa tohto nan omw wasahn kalohk? Mie wasahn mwemweit de wasa me aramas kin kohpene ie? Mie wasa kan me ekei pak kapokon lap kin wiawi ie ong mehkot nan omw wasahn kalohk? Ma iei, ke pil pahn kak wia kalohk ong wehi pokon.
9. Dahme kahrehda kitail anahne wia uwen atail kak koaros en kalohk ong aramas koaros me kitail diar?
9 Kupwuren Siohwa iei me “aramas koaros en ale komourparail oh marainkihla me mehlel.” (1 Tim. 2:4) Kahrehda, kitail kin song tuhwong aramas tohto ni uwen atail kak ni atail kin kalohki rohng en Wehio mwohn imwi eh pahn leledo. (Mad. 24:14) Nan wasa tohto, e apwal en diar aramas ni imwarail. Ahpw kitail pahn kak koasoiong irail ni arail kin mi wasa me aramas tohto mi ie. Kalohk ong wehi pokon ele ieite ahl me ekei aramas pahn kak rongki rongamwahu. Ihme kahrehda, kitail en uhdahn kapwaiada atail doadoahk en kalohk sang ni atail pahn kalohk ong aramas koaros me kitail diar.—2 Tim. 4:5.
[Koakon nan pali 5]
Anahne Sawaspene Mwahu
Ripoht koasoia me sounkalohk kan sang ekei mwomwohdiso kan kin ekei pak pil iang kalohk ong wehi pokon wasa kohte nan ahl kan, wasahn peidi en sidohsa oh mwohn wasahn pesines de wasa me kisa de bus tohto kin kohpene ie. Sounkalohk kan sang mwomwohdiso teikan kin pil kihdi makasihn kan wasa kohte me aramas kin kommoal ie de lopwolopw oh kalohk ong wasahn pesines kohte. Met kin ekei pak kansensuwedihada soun pesines kan oh mehn mparail kan mehnda ma sounkalohk kan sohte kalohk mwo ahnsoutehkis. Kahrehda, e mwahu en mihmihte nan wasahn kalohk me koasoandiong mwomwohdiso ni omw kin wia kalohk ong wehi pokon.
Ma sounkalohk kan men kalohk ong wehi pokon nan wasahn kalohk en mwomwohdiso teikan, re anahne koasoiong arail sounapwalih en kalohk. Sounapwaliho eri kak koasoiong sounapwalih en kalohk en mwomwohdiso teio pwehn ale mweimwei mwohn irail me kisehn eh mwomwohdiso ar pahn tepida kalohk. Ma mwomwohdiso en ehu lokaia tohrohr kin kalohk wasaohte, sounapwalih en kalohk kan anahne koasoiapene ire wet pwe ren dehr kansensuwedihala aramas nan wasao. Pwehki sawaspene mwahu, soahng koaros kak wiawi “nin duwen me konehng oh koasoandi pwung.”—1 Kor. 14:40.