Kalohk Nanial me Kin Pweida Mwahu
1. Ia ehu ahl me kitail kak alasang Sises?
1 Erein sapwellimen Sises doadoahk en kalohk, e sohte kin ketin pweiek ni eh kin mahsaniong aramas akan me mi nanial oh wasahn pokon kan. (Luk 9:57-61; Sohn 4:7) E kupwurki ehukihong aramas tohto duwen sapwellime rohng kesempwal. Rahnwet, kalohk nanial kin wia ehu ahl kaselel en sewese aramas akan ren esehla Koht. (Lep. Pad. 1:20) Kitail pahn pweida mwahu ma kitail pahn kohla rehn aramas akan oh medewe dahme konehng.
2. Dahme kitail kin nantihong wia ni atail kin kalohk nanial?
2 Kohla Rehn Aramas akan: E kin mwahu en kohla rehn aramas akan sang atail en kesihnen de mwohd wasakis oh awih ren kohdo rehtail. Ken pohkomwokomw, kilang masarail, oh kasalehda kadek. Ma mie iengomw sounkalohk, e pahn mwahu ma emenemen pahn kohla koasoiong aramaso de aramas ko. Ke pahn pil anahne nantihong ese ia duwen omw pahn kak pwurehng koasoiong aramaso me perenki rong. Ma konehng, mwurin amwa koasoi, idek ni kadek ia duwen omw pahn pwurehng tuhwong ih. Ekei sounkalohk kin kalohk wasaohte pwe ren kak pwurehng koasoiong aramas akan me re tuhwong pwehn kalaudehla arail men rong padahk mehlel.
3. Ia duwen atail kak medewe dahme konehng ahnsou me kitail kin kalohk nanial?
3 Medewe Dahme Konehng: Medewe mwahu ni omw pahn pilada ia wasa ken kesihnen nanialo oh ihs me ke pahn koasoiong. Ke sohte anahne kalohk ong koaros nanialo. Tehk mwahu aramas akan. Karasepe, ma aramaso mwomwen karuwaru, e pahn mwahu ken dehr koasoiong ih. Ni omw kalohk limwahn wasahn pesines, kanahieng pwe ken dehr kansensuwedihala kaun en pesineso. E kin mwahu en kalohk ong aramas akan ni ar pahn pedoisang wasahn pesines kan, a kaidehn ahnsou me re pedolong. Kanahieng pwe ke de kamasakihada irail ni omw koasoiong irail. Pil medewe mwahu ni omw pahn kihla pwuhk kan. Ma aramas akan sohte nohk perenki rong, ke kak kihlahte kisin doaropwe a kaidehn Kahn Iroir.
4. Dahme kahrehda kalohk nanial kin wia koasoandi en kalohk ehu me kaperen oh kin pweida mwahu?
4 Kalohk nanial kahrehda kitail en kak kamwerehdi weren padahk mehlel ni ahnsou mwotomwot. (Ekl. 11:6) Mwein kitail kak tuhwong ekei me kitail sohte kak tuhwong ni imwarail kan ahnsou me kitail kalohk ihmw lel ihmw. Ke sou koasoanehdi ken iang kalohk nanial, koasoandi ehu me kaperen oh kin pweida mwahu?