Soangen Wiepe Kapw oh Kaperen en Kalohk ong Wehipokon
1. Kangoang dahieu me kohwohng mwomwohdiso kan me ahneki wasahn kalohk kan me aramas tohto kin alialu ie?
1 Mwomwohdiso kan me ahneki wasa me aramas tohto kin alialu ie, kin alehdi kangoang en koasoanehdi ahnsoun kalohk ong wehipokon doadoahngki tehpel kan oh dipwisou me ke kak wisikseli pwehn kasansalehda neitail pwuhk kan. Ma re doadoahngki doupen pwuhk me kak wisikseli pwehn kasalehda pwuhk kan, emen sounkalohk pahn kesihnen de mwohndi limwahn dipwisou wet. Ahpw ma re doadoahngki tehpel pwehn kasalehda pwuhk, sounkalohk riemen pahn anahne mi ni tehpel wet. Irail kan me pwukoahki mi limwahn mehn kasansal pwukat pahn nantihong kasalehda kadek oh ese kahrehiong aramas en men keido wasao. Ma aramas men pahn keido kilang mehn kasansalo, emen sounkalohk ko kak tapiada koasoiong, ele e pahn nda, “Mie pak ke kin medewe dahme Paipel mahsanihki duwen ire wet?” Emen de riemen sounkalohk tohrohr me mi ekis keila ahpw sallahng mehn kasansalo pahn pil kak kalokalohk ong aramas kan.
2. Kasalehda ehu rohng me karasahda kesempwalpen kalohk ong wehi pokon ni atail kin doadoahngki tehpel de doupen pwuhk ong kasansalehda neitail pwuhk kan.
2 Soangen wiepen kalohk wet kin imwikihla onop en Paipel tohto. Emen tohnsukuhl en college pilada en ntingihada ripoht ehu duwen Sounkadehdehn Siohwa kan, ahpw e sohte kak diar Wasahn Kaudok en Sounkadehdehn Siohwa kan. Wihk mwurio nan kelen sukuhlo e kilangada tehpel ehu me kasalehda neitail pwuhk kan. Ih eri tepida onop Paipel, oh ahnsouwet tohnsukuhl menet wiahlahr sounkalohk men me papidais oh kin iang wia soangen wiepen kalohk wet.
3. Ia pepehm en ekei sounkalohk kan duwen soangen wiepen kalohk wet?
3 Emen sister me iangehr wiepen kalohk wet nda: “Ekei uhdi ni tehpelo pwehn ale makasihn kapw kan. Ekei saikinte rong duwen Sounkadehdehn Siohwa kan. I kak kilang me soangen wiepen kalohk wet kin kahrehiong me tohto en iang rong.” Emen sister nda, “Met wiepen kalohk kapw oh kaperen ehu pwehki aramas akan kin kohdo rehmw oh, mendahki ma re pil sohte uhdahn men rong, ahpw re men ese dahkot mwo.”
4. Dahme kahrehda e kesempwal en kihdi tehpel ong kasansalehda pwuhk kan ni ahnsou oh wasa me duduwehte nan ehuehu wihk?
4 E kesempwal en kihdi tehpel oh ong kasansalehda pwuhk kan ni wasa, rahn, oh kuloak me duduwehte nan ehuehu wihk. Imwilahn met, aramas akan pahn ahnla kilang soahng pwukat oh kak pein kohla oh idek peidek kan de ale pwuhk kan. Ia duwe, omw mwomwohdiso koasoanehdier en wia kalohk ong wehipokon? Ma iei, ele ke kak iang wia soangen wiepen kalohk wet me kin kaperen oh pweida mwahu pwehn “iang lohkiseli Wehin Koht.”—Luk 9:60.