Iaduwen Kitail Kak Pweida ni Atail Kalohk nan Wasa kan me Wehi Pokon Kin Kohpene Ie
1. Iaduwen Kristian kan rahnwet kin kahlemengih Kristian kan nan keieun senturi ni arail kin kalohk nan wasa kan me wehi pokon kin kohpene ie, oh ia imwilahn met?
1 Duwehte sapwellimen Sises tohnpadahk kan en mahs, Kristian kan en rahnwet kin nantihong kalohki duwen Rongamwahu en Wehin Koht ong aramas koaros sohte lipilipil wasa me irail kin mie. (Wiewia 16:13; 17:17; 20:20, 21) Pwehki irail kin nantihong kalohk nan wasa kan me wehi pokon kin kohpene ie, irail diarada aramas me kin perenki rong oh aramas pwukat kin apwal en diar nan imwarail ni ahnsou me sounkalohk kan kin kalohk ihmw-lel-ihmw.
2. Dahme kahrehda kitail anahne doadoahngki atail loalokong ni ahnsou me kitail kin kalohk nan wasa kan me wehi pokon kin kohpene ie, oh iaduwen kitail kak utungada koasoandi en kalohk nan wasa kan me wehi pokon kin kohpene pwe doadoahk wet en soandi mwahu?
2 Kitail anahne doadoahngki atail loalokong ni ahnsou me kitail kin kalohk nan wasa kan me wehi pokon kin mie. Pali laud en ahnsou, e pahn mwahu en kalohk ni ahl me sohte pahn sansal. Karasepe, ma sounkalohk tohto pahn kalohk nan wasa ehute de kalohk ni pisnis keite, ekei aramas kak pwunodki atail wia met. Met pahn kakete kauwehla wahu en atail doadoahk oh katikitikihala pweidahn kalohk. Dahme kitail kak wia pwe soahng pwukat sohte pahn wiawi? Ekei mwomwohdiso kan me mie wasa kan me mwahu ong kalohk ong wehi pokon diarada me irail kak koasoanehdi wasa pwukat pwehn wia wasahn kalohk kan. (1 Kor. 14:40) Oh pil, kitail kak utungada koasoandi kan me pid duwen wasahn kalohk ni ahnsou me kitail pahn ihte kalohk nan wasa kan me koasoanehdiong pein atail mwomwohdiso. Ahpw, ma “Congregation Service Committee” pahn kihong kitail pwukoa en sewese pil ehu mwomwohdiso, kitail pahn kak kalohk nan pil ehu wasahn kalohk likin wasa kan me kilelediong pein atail mwomwohdiso.—Tehk Atail Doadoahk Ong Wehio en December 1998, pali 4, parakrap 13.
3. Soangen tepin koasoi dah kan me ekei sounkalohk diarada me kin pweida mwahu ni ahnsou me irail kin kalohk nan wasa kan me wehi pokon kin kohpene ie?
3 Tuhwong Aramas akan: Ni ahnsou me Sises koasoiong lih emen me mihmi ni pwarer ehu, e tepikihda ah koasoia mehkot me liho men rong oh ekis ekis kalaudehla ah koasoi ni ah kilang me liho perenki rong dahme e koasoia. (Sohn 4:7-26) Soangen tepin koasoi wet kin pil pweida mwahu nan ekei irair kan rahnwet. Ekei sounkalohk kan diarada me e kin pweida mwahu ma irail kin rahnmwahu oh ekis koasoiong aramas akan pwehn kasalehda me irail nsenohki arail anahn akan mwohn irail kin tepida kalohki duwen Rongamwahu en Wehin Koht. Ekei sounkalohk kan kin koasoia oaralap me aramas tohto kin perenki rong, oh arail wia met kin kalap imwikihla arail kak koasoipene. Ni ahnsou me aramas akan kin kasalehda arail pwunod kan, sounkalohk kan kin rong kanahieng. Sohte pwand, sounkalohk kan kak ehukihong aramas pwukat mehn kamweit me kin kohsang Mahsen en Koht.—Rom 15:4.
4. Iaduwen kitail kak kakairada en aramas arail perenki rong?
4 Kakairada Arail Ineng en Men Rong: Ehu ehu ahnsou me kitail kin kalohk ong aramas emen oh e kin pweida mwahu, kitail en nantihong koasoanehdi pwehn pwurehng pwurala rehrail oh kakairada arail ineng en men rong. Iaduwen atail kak wia met? Ni ahnsou me amwa koasoipene pahn kereniong imwisekla, ke kak ale noumw kisin pwuhken nting oh nda: “I inenen perenki ata koasoipene rahnwet. Kita kak pousehla ata koasoi ehu rahn?” De ke kak nda: “I men ken wadek artikel ehu me I lemeleme ke pahn perenki. I kak wahwei ni imwomw de ni ahmw wasahn doadoahk?” Ekei sounkalohk kan kin idek rehn aramaso: “Ia noumw nempehn telephone?” Soangen peidek pwukat kin kalap imwila mwahu.
5. Soangen mehn akadai dah me mwahu en ahneki ni ahnsou me kitail kin kalohk nan wasa kan me wehi pokon kin kohpene ie?
5 Aramas tohto me sounkalohk kan kin tuhwong nan wasa kan me wehi pokon kin kohpene kin tepida onop Paipel. Soangen Paipel Study pwukat kin wiawi ni imwen aramas akan, ni arail wasahn doadoahk, ni wasa ehu me wehi pokon kin mie—ma konehng Paipel Study, de pil doadoahngki telephone. Kitail en akadeiong tepida onop Paipel rehn aramas akan me kitail kin kalohk ong nan wasa kan me wehi pokon kin kohpene ie.